ຂະບວນການແຂ່ງຂັນ ຮັກຊາດ ແລະ ພັດທະນາ ຕິດພັນກັບການສົ່ງເສີມຜະລິດເປັນສິນຄ້າ

ຄະນະນໍາກະຊວງກະສິກໍາ ແລະ ປ່າໄມ້ ຖືເອົາວຽກງານແຂ່ງຂັນ-ຍ້ອງຍໍ ພາຍໃຕ້ຄຳຂວັນ “ຮັກຊາດ ແລະ ພັດທະນາ”ຕິດພັນກັບການສົ່ງເສີມການຜະລິດກະສິກຳເປັນສິນຄ້າ, ໂດຍໄດ້ອອກເປັນຂໍ້ຕົກລົງ ຂອງລັດຖະມົນຕີກະຊວງກະສິກຳ ແລະ ປ່າໄມ້ ສະບັບເລກທີ 5079/ກປ, ລົງວັນທີ 24 ພະຈິກ 2022ວ່າດ້ວຍການເປີດຂະບວນການແຂ່ງຂັນ-ຍ້ອງຍໍພາຍໃຕ້ຄຳຂວັນ “ຮັກຊາດ ແລະ ພັດທະນາ” ແຕ່ປີ 2021-2025 ເພື່ອເປັນບ່ອນອີງໃຫ້ການຈັດຕັ້ງທຸກພາກສ່ວນຜັນຂະຫຍາຍຕາມໜ້າທີ່ການເມືອງຂອງຕົນ ແລະ ເພື່ອກະຕຸກຊຸກຍູ້ ປຸກລະດົມ ພະນັກງານ-ລັດຖະກອນ ທົ່ວຂະແໜງການ ເຂົ້າຮ່ວມຢ່າງພ້ອມພຽງ.

ທ່ານ ນາງ ອຸລາພອນ ພົງສະຫວັດ ຮອງຫົວໜ້າກົມຈັດຕັ້ງ ແລະ ພະນັກງານ ກະຊວງກະສິກໍາ-ປ່າໄມ້ ກ່າວວ່າ:

ກະຊວງໄດ້ກຳນົດ 3 ເນື້ອໃນ 4 ເປົ້າໝາຍ ເປັນຂໍ້ແຂ່ງຂັນທົ່ວຂະແໜງການ, 3 ເນື້ອໃນປະກອບມີ: (1) ວຽກດີ: ປະຕິບັດວຽກງານໄດ້ຕາມຄາດໝາຍ ຫຼື ລື່ນຄາດໝາຍທີ່ວາງໄວ້ ໂດຍມີຕົວຊີ້ວັດຢັ້ງຢືນຜົນສຳເລັດ; ມີປະສິດທິພາບ ແລະ ປະສິດທິຜົນໃນການເຄື່ອນໄຫວວຽກງານໃນທົ່ວຂະແໜງກະສິກຳ ແລະ ປ່າໄມ້;(2)ພະນັກງານໜັກແໜ້ນ: ຮັກລະບອບປະຊາທິປະໄຕປະຊາຊົນ, ຮັກມູນເຊື້ອຂອງຊາດ, ຮັກວັດທະນະທຳ-ຮີດຄອງປະເພນີອັນດີງາມຂອງຊາດ; ມີທັດສະນະການເມືອງໜັກແໜ້ນ, ອຸດົມການທີ່ຖືກຕ້ອງ, ມີສະຕິຊາດ, ສະຕິເອກະລາດ; ສູ້ຊົນພັດທະນາຕົນເອງ ໃຫ້ມີຄວາມຮູ້, ຄວາມສາມາດເກັ່ງສະເພາະດ້ານ, ກຳແໜ້ນ ແລະ ຜັນຂະຫຍາຍແນວທາງແຜນນະໂຍບາຍຂອງພັກ-ລັດ ໃຫ້ເປັນແຜນການ, ແຜນງານ, ໂຄງການ ແລະ ການຄວບຄຸມບັນຊາປະຕິບັດຕົວຈິງ, ຄວາມເດັດຂາດໃນການແກ້ໄຂບັນຫາ ແລະ ປະກົດການຫຍໍ້ທໍ້ຕ່າງໆ ແລະ ມີຈັນຍາບັນຕໍ່ວິຊາຊີບຂອງຕົນ; ແບບແຜນວິທີເຮັດວຽກ: ປະຕິບັດຫຼັກການລວມສູນປະຊາທິປະໄຕ, ເສີມຂະຫຍາຍຫົວຄິດປະດິດສ້າງຂອງໝູ່ຄະນະ, ຂອງມະຫາຊົນ, ລົງຕິດແທດກັບຕົວຈິງ, ມີສະຕິໃນການເຄົາລົບ ແລະ ປະຕິບັດມະຕິ-ຄຳສັ່ງຂອງຂັ້ນເທິງ ແລະ ໝູ່ຄະນະ; ພະນັກງານ ຕ້ອງປະຕິບັດການຫັນທິດລົງຮາກຖານ ແລະ ການລົງຕິດແທດກັບຕົວຈິງ; ມີທັດສະນະມະຫາຊົນ, ຄວາມສາມາດປຸກລະດົມ ແລະ ເຕົ້າໂຮມຄວາມສາມັກຄີ ແລະ ນໍ້າໃຈຮັບໃຊ້ປະຊາຊົນ,ມີແບບແຜນດຳລົງຊີວິດປອດໃສຂາວສະອາດ; ສູ້ຊົນຕີລາຄາເປັນພະນັກງານ-ລັດຖະກອນປະເພດແຂງ;(3)ການຈັດຕັ້ງເຂັ້ມແຂງ: ສະແດງອອກດ້ານຄວາມສາມາດນຳພາດ້ານການເມືອງ-ແນວຄິດ, ການຈັດຕັ້ງ, ອົງການຈັດຕັ້ງມະຫາຊົນ ແລະ ແບບແຜນວິທີນຳພາ; ຊີ້ນຳ-ນຳພາການຈັດຕັ້ງປະຕິບັດວຽກງານວິຊາສະເພາະ, ແຜນພັດທະນາເສດຖະກິດ-ສັງຄົມ ແລະ ນະໂຍບາຍການຕ່າງປະເທດຂອງພັກ-ລັດ; ເພີ່ມທະວີຄົ້ນຄວ້ານຳໃຊ້ ວິທະຍາສາດ, ເຕັກໂນໂລຊີ; ຫັນເປັນອຸດສາຫະກຳ ແລະ ທັນສະໄໝ; ສູ້ຊົນພັດທະນາທາງດ້ານອົງປະກອບການຈັດຕັ້ງ ແລະ ບຸກຄະລາກອນ ໃຫ້ມີຄວາມກ້າວໜ້າ ແລະ ມີຄຸນນະພາບ; ນຳພາເຮັດໃຫ້ການຈັດຕັ້ງມີຄວາມສະຫງົບ, ໜັກແໜ້ນ, ເຂັ້ມແຂງ, ປອດໃສ; ມີຄວາມສາມັກຄີເປັນປຶກແຜ່ນໃນການຈັດຕັ້ງ; ຮັບປະກັນໂຄງປະກອບການຈັດຕັ້ງ ຫັນເປັນໜຸ່ມ, ເພດ, ເຜົ່າ, ແລະ ສ້າງພະນັກງານໄປຕາມແຜນກຳນົດພະນັກງານນຳພາ-ຄຸ້ມຄອງ, ເນື້ອໃນ 4 ເປົ້າໝາຍປະກອບມີ: (1). ຄໍ້າປະກັນຄວາມໝັ້ນຄົງດ້ານສະບຽງອາຫານ ແລະ ໂພຊະນະການ; (2). ຜະລິດກະສິກໍາເປັນສິນຄ້າ,(3). ປ່າໄມ້ພັດທະນາແບບຍືນຍົງ ແລະ (4). ຊົນນະບົດພັດທະນາ. ໃນແຕ່ລະເປົ້າໝາຍໄດ້ກໍໍານົດຄາດໝາຍສູ້ຊົນ,ຕົວຊີ້ບອກຢ່າງລະອຽດ ແລະ ໄດ້ຈັບມືແຂ່ງຂັນ ໃນວັນທີ 10 ກຸມພາ 2023.ຜ່ານການຈັດຕັ້ງປະຕິບັດຕົວຈິງໄດ້ປະກອບສ່ວນຍູ້ແຮງໃນເປົ້າໝາຍທີ່ກໍານົດອອກໃນຂໍ້ແຂ່ງຂັນ ໂດຍສະເພາະເປົ້າໝາຍການຜະລິດກະສິກໍາເປັນສິນຄ້າ ເຫັນວ່າບັນດາຄາດໝາຍສູ້ຊົນໄດ້ຮັບການຈັດຕັ້ງປະຕິບັດມີຜົນສຳເລັດ ສະແດງອອກຄື: ການຜະລິດກະສິກຳ ເປັນສິນຄ້າ ໄດ້ຂະຫຍາຍຕົວຢ່າງຕໍ່ເນື່ອງ, ການນຳໃຊ້ເຕັກໂນໂລຊີທີ່ທັນສະໄໝ ເຂົ້າໃນການຜະລິດ, ການຜະລິດເປັນກຸ່ມ, ເປັນຟາມ ນັບແຕ່ລະດັບຄອບຄົວຈົນເຖິງຜູ້ປະກອບການທຸລະກິດກະສິກຳ-ປ່າໄມ້ ໄດ້ຮັບການພັດທະນາຂຶ້ນ ຊຶ່ງເປັນພື້ນຖານສຳຄັນໃຫ້ແກ່ການຜະລິດກະສິກຳ-ປ່າໄມ້ ເປັນສິນຄ້າເພື່ອຊົມໃຊ້ພາຍໃນ ທົດແທນການນຳເຂົ້າ ແລະ ເປັນສິນຄ້າເພື່ອສົ່ງອອກ; ໄດ້ເຈລະຈາເຕັກນິກເປີດຕະຫຼາດກັບປະເທດຄູ່ຄ້າ ເພື່ອການສົ່ງອອກ ຜະລິດຕະພັນກະສິກຳ ແລະ ປ່າໄມ້ ທີ່ເປັນທ່າແຮງ ຂອງ ສປປ ລາວ ເພີ່ມຂຶ້ນຫຼາຍລາຍການ;ໃນປີ 2024 ລວມຍອດຜະລິດຕະພັນກະສິກໍາ ແລະ ປ່າໄມ້ ຂະຫຍາຍຕົວ ໃນລະດັບ 2.6% ຂຶ້ນໄປ, ໃນນັ້ນ: ປູກຝັງ ຂະຫຍາຍຕົວ 2%, ລ້ຽງສັດ ຂະຫຍາຍຕົວ 3.5%, ປ່າໄມ້ ຂະຫຍາຍຕົວ 3%, ປະມົງ ຂະຫຍາຍຕົວ 4.3% ແລະ ປະກອບສ່ວນໃນ ລວມຍອດຜະລິດຕະພັນພາຍໃນ (GDP) 20.8%; ການສົ່ງອອກຜະລິດຕະພັນກະສິກໍາ ແລະ ປ່າໄມ້ ໃນເດືອນມັງກອນ ຫາ ເດືອນກັນຍາ ປີ 2024 ປະຕິບັດໄດ້ 1,235 ລ້ານກວ່າໂດລາ ບັນລຸລື່ນແຜນການ 2%.

ທ່ານ ນາງ ອຸລາພອນ ພົງສະຫວັດ ກ່າວຕື່ມວ່າ:ສໍາລັບການຈັດຕັ້ງຂະບວນການແຂ່ງຂັນ ຮັກຊາດ ແລະ ພັດທະນາ ປີ 2025 ກະຊວງກະສິກໍາ-ປ່າໄມ້ຈະສືບຕໍ່ຄົ້ນຄວ້າ,ເຊື່ອມຊຶມບັນດາມະຕິ,ຄໍາສັ່ງ,ບົດແນະນໍາ ຕ່າງໆ ຂອງຂັ້ນເທິງໃນແຕ່ລະໄລຍະ, ກໍານົດເນື້ອໃນການແຂ່ງຂັນດ້ານຕ່າງໆ,ຈັດຕັ້ງເປີດຂະບວນການແຂ່ງຂັນຮັກຊາດ ແລະ ພັດທະນາດ້ວຍການກໍານົດບັນດາຄາດໝາຍສູ້ຊົນ ແລະ ໄລຍະເວລາຈັດຕັ້ງປະຕິບັດຈະແຈ້ງ,ຕິດຕາມຊຸກຍູ້ຂະບວນການໃຫ້ມີບັນຍາກາດຟົດຟື້ນແຕ່ລະໄລຍະບົນພື້ນຖານເນື້ອໃນການແຂ່ງຂັນຕ່າງໆ ທີ່ວາງອອກ;ຊຸກຍູ້ຂະບວນການແຂ່ງຂັນຮັກຊາດແລະພັດທະນາໃຫ້ກວ້າງຂວາງເລິກເຊິ່ງແລະຕໍ່ເນື່ອງ, ໂຄສະນາເຜີຍແຜ່ຂະບວນການແຂ່ງຂັນ-ຍ້ອງຍໍໃຫ້ແຂງແຮງ,ປຸກລະດົມພົນລະເມືອງລາວທຸກຄົນທຸກການຈັດຕັ້ງຂອງພັກ-ລັດ, ອົງການຈັດຕັ້ງມະຫາຊົນ ແລະ ທຸກພາກສ່ວນເສດຖະກິດທັງພາກລັດ ແລະ ເອກະຊົນເຂົ້າຮ່ວມຢ່າງແຂງແຮງ ເພື່ອແຂ່ງຂັນກັນສ້າງຂະບວນການພັດທະນາ ແລະ ແກ້ໄຂຄວາມທຸກຍາກຢູ່ຊົນນະບົດ ໃຫ້ເປັນຂະບວນການຟົດຟື້ນ, ຮັບປະກັນໃຫ້ບັນລຸຕາມຄາດໝາຍ.