 |
ໃນໂອກາດນີ້, ສະຫາຍ ນາງ ດັ້ງ ຖິ ຫ້າຍ ເຕິມ ໄດ້ກ່າວສະແດງຄວາມພາກພູມໃຈຕໍ່ໝາກຜົນຂອງການພົວພັນແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ໃນຕະຫຼອດໄລຍະຂອງການປົກປັກຮັກສາ ແລະ ສ້າງສາພັດທະນາປະເທດຊາດຜ່ານມາ . ພ້ອມນັ້ນຍັງໄດ້ສະແດງຄວາມຍິນດີ ແລະ ຊື່ນຊົມຕໍ່ໝາກຜົນສໍາເລັດແຫ່ງການພັດທະນາເສດຖະກິດ-ສັງຄົມຂອງ ສປປ ລາວ ເວົ້າລວມ, ເວົ້າສະເພາະກໍຄືແຂວງຄໍາມ່ວນໃນໄລຍະ 50 ປີຜ່ານມາ ຊຶ່ງເຫັນໄດ້ວ່າເສດຖະກິດຂອງລາວມີການຂະຫຍາຍຕົວດີຂຶ້ນ, ໂດຍສະເພາະແມ່ນຜົນສໍາເລັດໃນການພັດທະນາທາງດ້ານພື້ນຖານໂຄງລ່າງ ແລະ ຄຸນນະພາບຊີວິດການເປັນຢູ່ຂອງປະຊາຊົນ, ການຍົກສູງບົດບາດຂອງ ສປປ ລາວ ໃນເວທີສາກົນ.
ສໍາລັບແຂວງຄໍາມ່ວນກົງສູນໃຫຍ່ ຫວຽດນາມ ໄດ້ຊົມເຊີຍຜົນສໍາເລັດໃນການພັດທະນາດ້ານເສດຖະກິດ-ສັງຄົມ, ການຮັກສາຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍ. ສະຫາຍໄດ້ສະແດງຄວາມເຊື້ອໝັ້ນວ່າ ພາຍໃຕ້ການນໍາພາຂອງຄະນະນໍາຂອງແຂວງ ປະຊາຊົນແຂວງຄໍາມ່ວນຈະບັນລຸຜົນສໍາເລັດໃໝ່ໃຫຍ່ຫຼວງກວ່າເກົ່າ ໃນການພັດທະນາເສດຖະກິດ-ສັງຄົມຂອງແຂວງ ແລະ ປະກອບສ່ວນສໍາຄັນເຂົ້າໃນການພັດທະນາປະເທດຊາດ.
ໃນນາມການນໍາແຂວງ, ສະຫາຍ ສົມສະອາດ ອຸ່ນສີດາ ໄດ້ຕີລາສູງຕໍ່ຄວາມສໍາພັນແບບພິເສດ ແລະ ຄວາມສາມັກຄີອັນແໜ້ນແຟ້ນລະຫວ່າງປະຊາຊົນສອງປະເທດລາວ-ຫວຽດນາມທີ່ໄດ້ບົ່ມເຜາະ ແລະ ຖືກທົດສອບຜ່ານການຕໍ່ສູ້ປົດປ່ອຍປະເທດ ແລະ ການກໍ່ສ້າງປະເທດຈົນມາເຖິງປັດຈຸບັນ, ສະຫາຍໄດ້ເນັ້ນຢໍ້າວ່າ: ຄວາມສໍາພັນດັ່ງກ່າວແມ່ນຊັບສົມບັດອັນລໍ້າຄ່າ ແລະ ເປັນພື້ນຖານສໍາຄັນສໍາລັບການຮ່ວມມືໃນທຸກດ້ານລະຫວ່າງສອງປະເທດໂດຍສະເພາະແມ່ນແຂວງຄໍາມ່ວນກັບບັນດາແຂວງອື່ນໆຂອງ ສສ ຫວຽດນາມ.
ໃນໂອກາດອັນມີຄວາມໝາຍສໍາຄັນນີ້, ສະຫາຍກົງສູນໃຫຍ່ແຫ່ງ ສສ ຫວຽດນາມ ປະຈໍາແຂວງສະຫວັນນະເຂດ ໄດ້ອວຍພອນໃຫ້ຄະນະການນໍາຂອງແຂວງຄໍາມ່ວນຈົ່ງມີສຸຂະພາບແຂງແຮງ,ປະສົບຜົນສໍາເລັດໃນໜ້າທີ່ວຽກງານ, ສືບຕໍ່ນໍາພາປະຊາຊົນລາວບັນດາເຜົ່າພາຍໃນແຂວງຄໍາມ່ວນພັດທະນາ ສ້າງສາບ້ານເມືອງໃຫ້ມີຄວາມຈະເລີນກ້າວໜ້າຢ່າງບໍ່ຢຸດຢັ້ງ.
(ຂ່າວ-ພາບ: ແດງສະຫວັດ ແສນພານິດ)
ຄໍາເຫັນ