ສາລະວັນຈັດກິດຈະກຳອອກກຳລັງກາຍເພື່ອສຸຂະພາບ ລະນຶກວັນສາກົນລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ

ທ່ານ ທອງດີ ຈັນທະວົງ ໄດ້ຫວນຄືນ ວັນສາກົນ ເພື່ອລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ ໄດ້ຖືກປະກາດເປັນຄັ້ງທຳອິດ ໃນກອງປະຊຸມນັກເຄື່ອນໄຫວສົ່ງເສີມດ້ານສິດທິຂອງແມ່ຍິງ ເພື່ອລະນຶກເຖິງວິລະກຳຂອງສາມເອື້ອຍນ້ອງ ຈາກສາທາລະນະລັດໂດມີນີແກນ ທີ່ຖືກລອບຄາດຕະກຳຢ່າງໂຫດຮ້າຍປ່າເຖື່ອນ ໃນວັນທີ 25 ພະຈິກ 1960 ຊຶ່ງທົ່ວໂລກໄດ້ຮັບຮູ້ວ່າເປັນວັນຕ້ານຄວາມຮຸນແຮງຕໍ່ແມ່ຍິງ ແລະ ເດັກຍິງ. ຄວາມຮຸນແຮງຕໍ່ແມ່ຍິງເກີດຂຶ້ນໄດ້ໃນທຸກເມື່ອທຸກເວລາ ໃນທຸກສະຖານທີ່ ໂດຍບໍ່ຈຳແນກຊັ້ນວັນນະເຊື້ອຊາດ, ສາສະໜາ, ວັດທະນະທຳ, ຖານະໃນສັງຄົມ, ລະດັບການສຶກສາ ແລະ ແຜ່ລາມໄປທຸກບ່ອນ, ຢູ່ໃນໂລກປັດຈຸບັນ ແມ່ຍິງ ປະສົບຄວາມຮຸນແຮງເພີ່ມຂຶ້ນເລື້ອຍໆໃນສະພາບຕ່າງໆ ລວມໃນສະຖານທີ່ເຮັດວຽກ ແລະ ຢູ່ຫ່າງໄກຜ່ານທາງ ອອນລາຍ ຊຶ່ງມີ 38% ແລະ 85% ທີ່ໃຊ້ເວັບອອນລາຍ ໄດ້ເຫັນຄວາມຮຸນແຮງທາງດີຈິຕອນຕໍ່ແມ່ຍິງຄົນອື່ນໆ, ໃນຍຸກໂລກາພິວັດແຫ່ງການເຂົ້າເຖິງ ແລະ ນຳໃຊ້ເຕັກໂນໂລຊີຂໍ້ມູນຂ່າວສານຢ່າງກວ້າງຂວາງ, ຄວາມຮຸນແຮງຜ່ານອິນເຕີເນັດ, ໂທລະສັບມືຖື, ຮູບແບບການຄ້າມະນຸດ, ການເຄື່ອນຍ້າຍແຮງງານຜິດກົດໝາຍ ແລະ ອື່ນໆ. ໃນໂອກາດນີ້, ທ່ານຍັງໄດ້ຮຽກຮ້ອງມາຍັງອົງການຈັດຕັ້ງທຸກພາກສ່ວນ ທັງພາກລັດ-ເອກະຊົນ ແລະ ສັງຄົມ ຈົ່ງສືບຕໍ່ໂຄສະນາເຜີຍແຜ່ ແລະ ປູກຈິດສຳນຶກທົ່ວປວງຊົນ ໃຫ້ມີຄວາມຮັບຮູ້ເຂົ້າໃຈອັນຖືກຕ້ອງ ໃນການປະຕິບັດກົດໝາຍ ແລະ ນະໂຍບາຍທີ່ເປັນການສົ່ງເສີມຄວາມສະເໝີພາບຍິງ-ຊາຍ, ເອົາໃຈໃສ່ປັບປຸງ ແລະ ສ້າງຄວາມເຂັ້ມແຂງໂດຍສະເພາະ ໃຫ້ການບໍລິການຊ່ວຍເຫຼືອແມ່ຍິງ ແລະ ເດັກຍິງທີ່ຖືກເຄາະຮ້າຍຈາກການຄ້າມະນຸດ.

ການກິດຈະກຳອອກກຳລັງກາຍຄັ້ງນີ້, ເພື່ອແນໃສ່ໃຫ້ເອື້ອຍນ້ອງແມ່ຍິງທຸກຄົນ ມີສຸຂະພາບແຂງແຮງ ທັງເປັນການສ້າງຂະບວນການຂໍ່ານັບຮັບຕ້ອນ ວັນສະຖາປະນາ ສປປ ລາວ ຄົບຮອບ 50 ປີ ແລະ ວັນເກີດປະທານໄກສອນ ພົມວິຫານ ຄົບຮອບ 105 ປີ ທີ່ຈະມາເຖິງໃນມໍ່ນີ້.

(ຂ່າວ: ທິດລານີ ໂຄດໂຍທາ)