 |
ກອງປະຊຸມປຶກສາຫາລືການຕອບໂຕ້ສຸກເສີນ ແລະ ການກຽມຄວາມພ້ອມຮັບມືແກ້ໄຂໄພພິບັດນໍ້າຖ້ວມ ໄດ້ຈັດຂຶ້ນໃນວັນທີ 3 ກໍລະກົດຜ່ານມາທີ່ຫ້ອງວ່າການແຂວງ ໂດຍການເປັນປະທານຂອງ ທ່ານ ເດດສັກດາ ມະນີຄໍາ ຮອງປະທານຄະນະກໍາມະການປົກຄອງແຂວງປະທານຄະນະກໍາມະການຄຸ້ມຄອງໄພພິບັດຂັ້ນແຂວງ, ມີຄະນະກໍາມະການໄພພິບັດຂັ້ນແຂວງ ແລະ ບັນດາເມືອງເຂົ້າຮ່ວມ.
 |
ທ່ານ ແສງເພັດ ຄໍາສຸກຖາວົງ ຮອງຫົວໜ້າພະແນກ ຮສສ ແຂວງ ໄດ້ລາຍງານວ່າ: ໄພນໍ້າຖ້ວມ ເກີດຂຶ້ນຢູ່ແຂວງຄໍາມ່ວນມີ 2 ໄລຍະ ຄື: ໄລຍະທີ 1 ແຕ່ວັນທີ 3-17 ກໍລະກົດ, ມີ 121 ບ້ານ, 6,291 ຄອບຄົວ, 31,381 ຄົນໄດ້ຮັບຜົນກະທົບ, ມູນຄ່າເສຍຫາຍເບື້ອງຕົ້ນ 136.99 ຕື້ກີບ. ສ່ວນໄລຍະທີ 2 ວັນທີ 5-31 ສິງຫາ 2026 ສົ່ງຜົນໃຫ້ ເນື້ອທີ່ນາຖືກນໍ້າຖ້ວມ 33,637 ເຮັກຕາ, ສັດລ້ຽງຕາຍ 9,856 ໂຕ ແລະ ສູນຫາຍ 731 ໂຕ. ດ້ານເສັ້ນທາງຫຼວງແຂວງ, ເສັ້ນທາງຫຼວງເມືອງ, ຖະໜົນຊົນນະບົດ ແລະ ຂົວຫຼາຍແຫ່ງ, ລະບົບຊົນລະປະທານ, ໂຮງຮຽນ, ສຸຂະອະນະໄມ ຖືກນໍ້າຖ້ວມ ແລະ ໄດ້ຮັບຄວາມເສຍຫາຍ. ຈາກສະຖານະການດັ່ງກ່າວມີ 17 ບ້ານ, ມີ 1,489 ຄອບຄົວ ແລະ 7,346 ຄົນຕ້ອງຍົກຍ້າຍອອກຈາກພື້ນທີ່ສ່ຽງ, ແຕ່ປັດຈຸບັນປະຊາຊົນທັງໝົດໄດ້ກັບຄືນສູ່ບ້ານເດີມແລ້ວ. ໃນຂະນະທີ່ ການຊ່ວຍເຫຼືອ ແຂວງໄດ້ຈັດສັນເງິນໃຫ້ 10 ເມືອງ ລວມ 1.37 ຕື້ກີບ ແລະ ລະດົມເງິນຊ່ວຍເຫຼືອຈາກ ພາກສ່ວນຕ່າງໆໄດ້ 3.83 ຕື້ກີບ; ພ້ອມອຸປະກອນຕອບໂຕ້ສຸກເສີນ ມູນຄ່າ 4.35 ຕື້ກວ່າກີບ ປະກອບມີເຕັ້ນຫຼົບໄພ 6 ຫຼັງ ແລະ ເຮືອກູ້ຊີບ 10 ກວ່າລໍາ ນໍາໄປໃຊ້ໃນພື້ນທີ່ປະສົບໄພ.
ທ່ານ ເດດສັກດາ ມະນີຄໍາ ເນັ້ນວ່າ: ໄລຍະຕໍ່ໄປຕ້ອງເລັ່ງຟື້ນຟູຫຼັງນໍ້າຫຼຸດ ໂດຍຈັດລຽງວຽກຕາມບູລິມະສິດ ເລັ່ງສ້ອມແປງຖະໜົນ-ຂົວ, ລະບົບຊົນລະປະທານ, ໂຮງຮຽນ ແລະ ລະບົບນໍ້າສະອາດ ໃຫ້ສາມາດ ນໍາໃຊ້ໄດ້ໂດຍໄວ, ພ້ອມນີ້ ໃຫ້ທຸກພາກສ່ວນສືບຕໍ່ເກັບກໍາ ແລະ ກວດສອບຂໍ້ມູນ ຄວາມເສຍຫາຍຢ່າງຮອບຄອບຄົບຖ້ວນ ເອກະພາບ ໂດຍສະເພາະດ້ານກະສິກໍາ, ຄົມມະນາຄົມ ແລະ ໂຮງຮຽນ ເພື່ອສະເໜີຂໍການສະໜັນສະໜູນ ແລະ ກຽມຄວາມພ້ອມຮັບມືໄພພິບັດໃນອະນາຄົດ.
ຂ່າວ : ມະນີວັນ
ຄໍາເຫັນ