ຄໍາມ່ວນ ປິດຊຸດອົບຮົມ ສ້າງຄວາມເຂັ້ມແຂງໃຫ້ແກ່ພະນັກງານໄອຍະການປະຊາຊົນ

ຊຸດຝຶກອົບຮົມຄັ້ງນີ້, ໄດ້ດໍາເນີນໄປໃນລະຫວ່າງ ວັນທີ 19-20 ມີນາ 2026, ບັນດາຜູ້ເຂົ້າຮ່ວມ ໄດ້ຮຽນຮູ້ກ່ຽວກັບ ຫຼັກສູດໃນການສອນຂັ້ນຕອນ ແລະ ວີທີ ການເກັບກໍາຂໍ້ມູນ, ຫຼັກຖານຕ່າງໆ ໃນການດໍາເນີນຄະດີອາຍາ, ຂັ້ນຕອນການຕິດຕາມ, ກວດກາ ການປະຕິບັດກົດໝາຍ ຂອງອົງການສືບ ສວນ-ສອບສວນ ຂັ້ນຕອນ ແລະ ວິທີການດໍາເນີນຄະດີຕໍ່ ອາຊະຍາກຳທາງໄຊເບີ້, ຂັ້ນຕອນ ແລະ ວິທີການດໍາເນີນຄະດີການຟອກເງິນ ແລະ ການຄ້າມະນຸດ. ຈາກນັ້ນ, ບັນດາຜູ້ເຂົ້າຮ່ວມໄດ້ແລກປ່ຽນຄໍາຄິດເຫັນ ກ່ຽວກັບການດໍາ ເນີນຄະດີອາຍາ, ການດໍາເນີນຄະດີແພ່ງ, ການດໍາເນີນຄະດີປົກຄອງ, ການຕິດຕາມ-ກວດກາການ ປະຕິບັດກົດໝາຍ, ການຕ້ານ ແລະ ສະກັດກັ້ນອາຊະຍາກຳ, ການອອກນິຕິກຳ, ການຕິດຕາມ-ກວດກາການປະຕິບັດຄໍາຕັດສີນຂອງສານ, ການຕິດຕາມ-ກວດກາການປະຕິບັດກົດໝາຍຢູ່ຄ້າຍຄຸມຂັງ-ດັດສ້າງ ແລະ ບັນຫາອື່ນໆ. ຊຶ່ງຈະເປັນການຍົກລະດັບຂີດຄວາມສາມາດໃຫ້ແກ່ເຈົ້າໜ້າທີ່, ພະນັກງານໃນການດໍາເນີນຄະດີ ລວມທັງ ກໍລະນີສຶກສາ ກ່ຽວກັບການດໍາເນີນຄະດີຕ່າງໆ.

ທ່ານ ນາງ ພອນທິບ ສາວະລີ ໄດ້ກ່າວມີຄຳເຫັນໂອ້ລົມ ວ່າ: ເພື່ອໃຫ້ທ່ວງທັນກັບຄວາມຮຽກຮ້ອງຕ້ອງການໜ້າທີ່ວຽກງານໃນໄລຍະໃໝ່ຈິ່ງໄດ້ເໜັ້ນໜັກບາງບັນຫາຄື: ໃຫ້ຖືເອົາວຽກງານການຝຶກອົບຮົມຄັ້ງນີ້ ເປັນບາດກ້າວໜຶ່ງທີ່ເປັນບົດຮຽນ, ເປັນບ່ອນອີງໃຫ້ແກ່ການປະຕິບັດໜ້າທີ່ ແຕ່ລະພາກສ່ວນໃຫ້ເປັນໄປຕາມທີ່ກົດໝາຍໄດ້ກຳນົດໃວ້, ເພີ່ມທະວີໃນການປະຕິບັດພາລະບົດບາດ, ສິດ ແລະ ໜ້າທີ່ ຂອງຕົນທີ່ກຳນົດໄວ້ໃນກົດໝາຍຢ່າງເຂັ້ມງວດ, ນຳເອົາບົດຮຽນທີ່ໄດ້ຝຶກອົບຮົມໄປນຳໃຊ້, ສົມທຽບໃສກັບພຶດຕິກຳຕົວຈິງໃນການເຄື່ອນໄຫວປະຕິບັດ ໜ້າທີ່ວຽກງານຢູ່ກົມກອງທ້ອງຖິ່ນຂອງຕົນ, ການຈັດຕັ້ງປະຕິບັດຕົວຈິງ ຫາກມີຂໍ້ຄົງຄ້າງບັນຫາໃດ ກໍຕ້ອງຊອກໃຫ້ເຫັນສາເຫດໃນຕົວ ແລະ ນອກຕົວ ເພື່ອວາງແຜນການ, ມີມາດຕະການປັບປຸງແກ້ໄຂໃຫ້ມີຄວາມເປັນເອກະພາບ ໃນການປະຕິບັດໜ້າທີ່ວຽກງານ ໃຫ້ຖືກຕ້ອງຕາມກົດໝາຍເຂັ້ມງວດ ເພື່ອປະ ກອບສ່ວນໃນການຄຸ້ມຄອງລັດ, ຄຸ້ມຄອງສັງຄົມດ້ວຍລະບຽບກົດໝາຍ ໃຫ້ມີຜົນສັກສິດ ໄປເທື່ອລະກ້າວ. ຜ່ານຊຸດຝຶກອົບຮົມໃນຄັ້ງນີ້, ຕ້ອງນຳເອົາບົດຮຽນທີ່ຖອດຖອນໄດ້ ໄປນຳເຜີຍແຜ່ສະເໜີຕໍ່ຄະນະພັກ, ຄະນະນຳ, ກົມກອງ ເພື່ອພ້ອມກັນຈັດຕັ້ງປະຕິບັດໃຫ້ມີປະສິດທິພາບ ແລະ ປະສິດທິຜົນສູງຂຶ້ນ ແລະ ນຳເອົາບົດຮຽນອັນໃໝ່ໄປໝູນໃຊ້ ເຂົ້າໃນການປະຕິບັດໜ້າທີ່ວຽກງານ ໃຫ້ເກີດດອກອອກຜົນເປັນຈິງ.

(ແຫຼ່ງຂ່າວ: ແຂວງຄໍາມ່ວນ)