 |
ກອງປະຊຸມຄັ້ງນີ້, ເພື່ອຕີລາຄາຄືນຜົນການຈັດຕັ້ງປະຕິບັດວຽກອຳນວຍຄວາມສະດວກທາງດ້ານການຄ້າ ປະຈຳປີ 2025 ແລະ 6 ເດືອນຕົ້ນປີ 2026 ພ້ອມທັງກຳນົດທິດທາງແຜນການໃນ 6 ເດືອນທ້າຍປີ 2026 ແລະ ໄດ້ຮັບຟັງການຜ່ານຂໍ້ຕົກລົງກ່ຽວກັບການຈັດຕັ້ງ ເຄື່ອນໄຫວຂອງຄະນະກຳມະການອຳນວຍຄວາມສະດວກດ້ານການຄ້າ ແລະ ຂົນສົ່ງ ຂັ້ນແຂວງ.
ປີ 2025 ຜ່ານມາ ການຈັດຕັ້ງປະຕິບັດຄຳສັ່ງເລກທີ 12/ນຍ ກ່ຽວກັບການກວດກາຕາມເສັ້ນທາງ ພົບວ່າທົ່ວແຂວງມີຈຸດກວດກາທັງໝົດ 17 ຈຸດ ແລະ ໃນປີ 2026 ໄດ້ເພີ່ມອີກ 1 ຈຸດ ເປັນ 18 ຈຸດ. ສ່ວນວຽກງານດ້ານການຂົນສົ່ງ ໄດ້ອອກໃບອະນຸຍາດແລ່ນລົດ 936 ຄັນ, ອອກໃບດຳເນີນທຸລະກິດຂົນສົ່ງ 58 ບໍລິສັດ, ອອກໃບອະນຸຍາດຜ່ານແດນ 2,759 ຫົວ ແລະ ອອກປື້ມຕິດຕາມການແລ່ນລົດ 723 ຫົວ.
ສຳລັບ 6 ເດືອນຕົ້ນປີ 2026 ຄະນະກຳມະການໄດ້ຈັດຫຼາຍກິດຈະກຳສຳຄັນ ລວມທັງກອງປະຊຸມປຶກສາຫາລືກ່ຽວກັບການຕັ້ງຈຸດກວດກາຕາມເສັ້ນທາງ, ການຜັນຂະຫຍາຍແຜນດຳເນີນງານອຳນວຍຄວາມສະດວກທາງການຄ້າ ແລະ ຂົນສົ່ງ 2025-2030, ການແກ້ໄຂບັນຫາອຸປະສັກໃນຂັ້ນຕອນການສົ່ງອອກ ແລະ ການປັບປຸງກົນໄກການປະສານງານກັບພາກສ່ວນຕ່າງໆ.
ດ້ານວຽກງານຂົນສົ່ງ ໄດ້ປະສານການອະນຸຍາດນຳໃຊ້ລົດຂົນສົ່ງເປົ່າຈາກຕ່າງປະເທດມາຮັບສິນຄ້າ ຈຳນວນ 9 ບໍລິສັດ, ອອກໜັງສືຕິດຕາມລົດຂົນສົ່ງເປົ່າຈາກປະເທດໄທເຂົ້າມາຮັບມັນຕົ້ນພາຍໃນແຂວງຄຳມ່ວນ ຈຳນວນ 509 ຄັນ ຜ່ານດ່ານສາກົນຂົວມິດຕະພາບ 3 ແລະ ອຳນວຍຄວາມສະດວກໃຫ້ 4 ບໍລິສັດຈາກ ສສ ຫວຽດນາມ ເຂົ້າມາຮັບສິນຄ້າຜ່ານດ່ານສາກົນນາເພົ້າ.
 |
ກອງປະຊຸມຍັງໄດ້ຕີລາຄາດ້ານດີ ໂດຍເຫັນວ່າ ການມີນິຕິກຳ ແລະ ກົດໝາຍທີ່ຊັດເຈນ ເປັນພື້ນຖານສຳຄັນໃນການອຳນວຍຄວາມສະດວກດ້ານການຄ້າ ແລະ ຂົນສົ່ງ ພ້ອມທັງໄດ້ຮັບການຊີ້ນຳຈາກຄະນະກອງເລຂາຂັ້ນແຂວງຢ່າງໃກ້ຊິດ. ແນວໃດກໍຕາມ ຍັງພົບຂໍ້ຄົງຄ້າງບາງດ້ານ ເຊັ່ນ: ການປະຕິບັດຄຳສັ່ງເລກທີ 12/ນຍ ຍັງບໍ່ທັນເຂັ້ມງວດ, ຍັງມີຈຸດກວດກາບາງແຫ່ງທີ່ບໍ່ສອດຄ່ອງກັບລະບຽບການ ແລະ ການເຜີຍແຜ່ນິຕິກຳຕ່າງໆ ຍັງບໍ່ທົ່ວເຖິງ.
ສຳລັບແຜນວຽກໃນ 6 ເດືອນທ້າຍປີ 2026 ຈະສຸມໃສ່ການສັງລວມ ແລະ ແກ້ໄຂບັນຫາທີ່ເກີດຂຶ້ນຕົວຈິງ, ປັບປຸງນະໂຍບາຍ ແລະ ນິຕິກຳໃຫ້ທັນສະໄໝ, ສືບຕໍ່ເຜີຍແຜ່ກົດໝາຍ ແລະ ຂໍ້ກຳນົດຕ່າງໆ ໃຫ້ແກ່ຜູ້ປະກອບການ ພ້ອມທັງປັບປຸງໂຄງລ່າງພື້ນຖານ ເຊັ່ນ: ການສ້ອມແປງປ້າຍ ແລະ ເຄື່ອງໝາຍຈາລະຈອນ ລວມທັງການສ້າງຈຸດພັກລົດຂົນສົ່ງຢ່າງໜ້ອຍ 1 ຈຸດ ຕາມເສັ້ນທາງຫຼວງເລກທີ 12 ເພື່ອຮອງຮັບການຂົນສົ່ງ ແລະ ຍົກສູງປະສິດທິຜົນການອຳນວຍຄວາມສະດວກດ້ານການຄ້າ ແລະ ຂົນສົ່ງ ໃນແຂວງຄຳມ່ວນໃຫ້ດີຂຶ້ນ.
ຂ່າວ : ມະນີວັນ
ຄໍາເຫັນ