ຄໍາມ່ວນ ສະຫຼຸບວຽກງານຈັດຕັ້ງ ແລະ ການປົກຄອງພ້ອມວາງແຜນການ5 ປີຕໍ່ໜ້າ

ກອງປະຊຸມ ໄດ້ຜ່ານບົດສະຫຼຸບການຈັດຕັ້ງປະຕິບັດ ວຽກງານຈັດຕັ້ງ ແລະ ການປົກຄອງ ໄລຍະ 5 ປີຜ່ານມາ ແລະ ທິດທາງ 5 ປີໃນຕໍ່ໜ້າ, ພ້ອມທັງຮັບຟັງບົດປະກອບຄໍາເຫັນ ໃນຫົວຂໍ້ຕ່າງໆ ຈາກຫຼາຍພາກສ່ວນເຊັ່ນ: ບົດປະກອບຄໍາເຫັນ ຫົວຂໍ້: ບົດຮຽນກ່ຽວກັບການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ຈາກຄະນະບໍລິຫານງານຊາວໜຸ່ມແຂວງ;ບົດປະກອບຄໍາເຫັນ ຫົວຂໍ້: ບົດຮຽນກ່ຽວກັບການຈັດຕັ້ງປະຕິບັດ ແຜນກຳນົດສ້າງພະນັກງານ-ລັດຖະກອນ ຈາກຄະນະພັກເມືອງເຊບັ້ງໄຟ;ບົດປະກອບຄໍາເຫັນ ຫົວຂໍ້: ບົດຮຽນກ່ຽວກັບການກະກຽມ ສ້າງຕາແສງ ແລະ ທິດທາງແຜນການເຄື່ອນໄຫວໃນຕໍ່ໜ້າ ຈາກຄະນະພັກເມືອງຫີນບູນ. ພ້ອມນັ້ນ, ຍັງໄດ້ເຊື່ອມຊຶມບັນດາເອກະສານທີ່ສໍາຄັນ ເປັນຕົ້ນ: ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XII, ມະຕິຂອງກົມການເມືອງສູນກາງພັກ ວ່າດ້ວຍການສ້າງແຜນກຳນົດພະນັກງານ ນໍາພາ-ຄຸ້ມຄອງ, ມະຕິຕົກລົງວ່າດ້ວຍການເພີ່ມທະວີ ວຽກງານແຂ່ງຂັນ-ຍ້ອງຍໍ ໃນໄລຍະໃໝ່.

ເພື່ອເຮັດໃຫ້ການດຳເນີນກອງປະຊຸມໃນຄັ້ງນີ້ ໄດ້ຮັບຜົນສໍາເລັດຕາມລະດັບຄາດໝາຍ, ສະຫາຍ ໄຊຊະນະ ໂຄດພູທອນ ໄດ້ຮຽກຮ້ອງໃຫ້ຜູ້ແທນກອງປະຊຸມ ຈົ່ງພ້ອມກັນຍົກສູງຄວາມຮັບຜິດຊອບ ໃນການຄົ້ນຄວ້າ, ປະກອບຄໍາເຫັນ ຢ່າງກົງໄປກົງມາ, ເລິກເຊິ່ງ, ລົງເລິກເຖິງດ້ານອ່ອນ, ຂໍ້ຄົງຄ້າງ ແລະ ທິດທາງແກ້ໄຂໃນຕໍ່ໜ້າ.