ຄໍາມ່ວນ ແຕ່ງຕັ້ງຄະນະຊີ້ນໍາ ແລະ ກອງເລຂາວຽກງານກໍ່ສ້າງຮາກຖານການເມືອງ

ກອງປະຊຸມ, ໄດ້ຜ່ານມະຕິຕົກລົງ ວ່າດ້ວຍການແຕ່ງຕັ້ງຄະນະຊີ້ນໍາ ແລະ ມະຕິຕົກລົງວ່າດ້ວຍການແຕ່ງຕັ້ງພະນັກງານນໍາພາ-ຄຸ້ມຄອງ ຂອງແຂວງ ລົງກໍ່ສ້າງຮາກຖານການເມືອງ, ວຽກງານພັດທະນາຊົນນະບົດຮອບດ້ານ-ແກ້ໄຂຄວາມທຸກຍາກ ແລະ ວຽກງານ 3 ສ້າງ ໄລຍະ 2026-2030 ພ້ອມທັງຜ່ານແຜນດຳເນີນງານ ເພື່ອແນໃສ່ເຮັດໃຫ້ການຈັດຕັ້ງລະບົບການເມືອງ ຢູ່ບັນດາຮາກຖານ ໃນສໍານັກງານ, ອົງການ, ກຳລັງປະກອບອາວຸດ ແລະ ຫົວໜ່ວຍວິສາຫະກິດຕ່າງໆ ນັບມື້ໄດ້ຮັບການປັບປຸງ ໃຫ້ມີຄວາມເຂັ້ມແຂງ, ໜັກແໜ້ນ ແລະ ມີການພັດທະນາຢູ່ຮາກຖານຊົນນະບົດເປັນກ້າວໆ ທັງເປັນການແກ້ໄຂຄວາມທຸກຍາກ ໃຫ້ເປັນລະບົບຕໍ່ເນື່ອງ, ສ້າງໄດ້ຄອບຄົວ ແລະ ບ້ານທຸກຍາກຫຼຸດລົງ, ບ້ານພັດທະນາເພີ່ມຂຶ້ນ, ຊົນນະບົດໃໝ່ໄດ້ຮັບການຂະຫຍາຍຕົວ, ເຮັດໃຫ້ຊີວິດການເປັນຢູ່ດ້ານວັດຖຸ ແລະ ຈິດໃຈ ຂອງປະຊາຊົນບັນດາເຜົ່າ ໄດ້ຮັບການແກ້ໄຂປົວແປງດີຂຶ້ນເທື່ອລະກ້າວ.

ທ່ານ ໄຊຊະນະ ໂຄດພູທອນ ໄດ້ມີຄໍາເຫັນໃນໂອກາດກ່າວເປີດກອງປະຊຸມຄັ້ງນີ້ວ່າ: ການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ ແມ່ນໄດ້ປະຕິບັດມາເປັນແຕ່ລະໄລຍະ ທີ່ມີຮູບແບບ ແລະ ວິທີການແຕກຕ່າງກັນ, ມີຄວາມສອດຄ່ອງກັບແຕ່ລະສະໄໝ ແລະ ສະພາບແວດລ້ອມຕົວຈິງ. ຊຶ່ງໃນຄັ້ງນີ້ ກໍເປັນການຈັດຕັ້ງ ປະຕິບັດຕາມມະຕິ, ຄຳສັ່ງ ຂອງສູນກາງພັກ ທີ່ມອບໝາຍໃຫ້ບັນດາແຂວງ ໃນຂອບເຂດທົ່ວປະເທດ ໄດ້ນຳໄປຈັດຕັ້ງປະຕິບັດ. ສຳລັບແຂວງຄຳມ່ວນ ໃນຄາດໝາຍສູ້ຊົນ 2026-2030 ກໍສຸມໃສ່ຫັນການພັດທະນາຫຼັກແຫຼ່ງ ລົງສູ່ຮາກຖານ ແກ້ໄຂບັນຫາຄວາມທຸກຍາກຂອງປະຊາຊົນ, ແກ້ໄຂບັນຫາປະກົດການຫຍໍ້ທໍ້, ຊ່ວຍສ້າງສາພັດທະນາ ຢູ່ຂັ້ນທ້ອງຖິ່ນຮາກຖານ, ໂອກາດນີ້, ທ່ານຍັງຮຽກຮ້ອງໃຫ້ຜູ້ເຂົ້າຮ່ວມ ຈົ່ງໄດ້ປະກອບຄຳຄິດຄຳເຫັນຢ່າງກົງໄປກົງມາ ຊີ້ໃຫ້ເຫັນເຖິງດ້ານດີ-ດ້ານອ່ອນ ແລະ ບົດຮຽນທີ່ຖອດຖອນໄດ້ ພ້ອມທັງຊີ້ໃຫ້ເຫັນບາດກ້າວບຸກທະລຸ ທີ່ຈະສຸມໃສ່ໃນການແກ້ໄຂໃນຕໍ່ໜ້າ ໃຫ້ເປັນຮູບປະທໍາຫຼາຍຂຶ້ນ, ຮຽກຮ້ອງໃຫ້ບັນດາທ່ານໃນຄະນະຊີ້ນໍາ, ກອງເລຂາ ແລະ ພະນັກງານ ທີ່ລົງກໍ່ສ້າງຮາກຖານການເມືອງ ຈົ່ງໄດ້ສຸມທຸກສະຕິປັນຍາ, ເຫື່ອແຮງ ແລະ ຄວາມຮູ້ຄວາມສາມາດຂອງຕົນເພື່ອເຮັດໃຫ້ວຽກງານດັ່ງກ່າວ ສາມາດຈັດຕັ້ງປະຕິບັດສຳເລັດ ຕາມລະດັບຄາດໝາຍ. (ຂ່າວ: ກອງຄໍາ)