 |
ປັດຈຸບັນ, ເມືອງປາກຊ່ອງ ມີຍອດສິນເຊື່ອເຂົ້າເຖີງຈໍານວນ 112 ກຸ່ມ, 626 ຄອບຄົວ ວົງເງິນທັງໝົດ 17,035,118,000 ກີບ, ດອກເບ້ຍຄ້າງ 3,115,447,000 ກີບ; ສະເພາະແຕ່ບ້ານກອງຕູ່ນ ມີສິນເຊື່ອເຂົ້າເຖີງມີ 2 ເປົ້າໝາຍ: ປູກຜັກ, ປຸກກາເຟ, ຈໍານວນ 6 ກຸ່ມ, 50 ຄອບຄົວ. ວົງເງິນອະນຸມັດທັງໝົດ 3,220,000,000, ກີບ, ຍອດເຫຼືອຕົ້ນທຶນ 3,220,000,000 ກີບ, ດອກເບ້ຍຄ້າງ (ບໍ່ມີ) ເພາະວ່າບ້ານດັ່ງກ່າວ ເປັນບ້ານ ອກສກ, (ມີລາຍບຸກຄົນ 4 ລາຍ, ວົງເງິນ 1,100,000,000 ກີບ).
ກ່ຽວກັບການສະໜອງສິນເຊື່ອໃນຜ່ານມາ; ຄະນະກຳມະການຄຸ້ມຄອງສິນເຊື່ອຂັ້ນບ້ານ ໄດ້ເອົາໃຈໃສ່ໃນການຈັດຕັ້ງປະຕິບັດວຽກງານ ແລະ ໃຫ້ການຮ່ວມມືເປັນຢ່າງດີ, ອຳນວຍຄວາມສະດວກໃຫ້ ທະນາຄານນະໂຍບາຍໃນການລົງເຄື່ອນໄຫວວຽກງານໃນແຕ່ລະຄັ້ງ; ຄະນະກໍາມະການຄຸ້ມຄອງສິນເຊື່ອຂັ້ນບ້ານ ຍັງໄດ້ສຶກສາອົບຮົມດ້ານການເມືອງ-ແນວຄິດ, ປຸກລະດົມຊຸກຍູ້ ໃຫ້ພໍ່ແມ່ປະຊາຊົນພາຍໃນບ້ານໃຫ້ມີຄວາມເອົາໃຈໃສ່ຮັບຜິດຊອບຕໍ່ກັບບັນຫາໜີ້ສິນຂອງຕົນເອງ ທີ່ໄດ້ກູ້ຢືມຈາກ ທະນາຄານນະໂຍບາຍ ຕ້ອງປະຕິບັດໃຫ້ໄດ້ຕາມງວດຊໍາລະ ທັງຕົ້ນທຶນ ແລະ ດອກເບ້ຍໃນແຕ່ລະປີ.
ຂະນະດຽວກັນ. ການຂະຫຍາຍສິນເຊື່ອ ຍັງບໍ່ສາມາດສະໜອງໃຫ້ຕາມການສະເໜີຂອງປະຊາຊົນໄດ້ເທົ່າທີ່ຄວນ ແລະ ປະຊາຊົນບ້ານດັ່ງກ່າວ ຍັງສະເໜີມາຍັງຄະນະນຳທະນາຄານ ແລະ ການນຳຂອງເມືຶອງຊ່ວຍເປີດກ້ວາງຕະຫຼາດ ຫຼື ຮັບປະກັນລາຄາໃຫ້ສະຖຽນ ແລະ ເພີ່ມວົງເງິນສິນເຊື່ອ, ຢືດເວລາການຊຳລະ ແລະ ສະເໜີຂໍປັບຫຼຸດດອກເບ້ຍລົງຕື່ມ ເພື່ອເຮັດໃຫ້ການຜະລິດມີຜົນກໍາໄລສູງຂຶ້ນກ່ວາເກົ່າ ແລະ ໃນເວລາຕໍ່ມາຄະນະຂອງອໍານວຍການໃຫຍ່ ທະນາຄານນະໂຍບາຍ ກໍໄດ້ລົງພື້ນທີ່ການຜະລິດຕົວຈິງ ຂອງຊາວບ້ານ ທີ່ປູກຜັກກະລໍ່າປີ ແລະ ສວນໝາກກາເຟ ຂອງລູກຄ້າ.
ໃນໂອກາດດັ່ງກ່າວ. ທ່ານ ຮອງຜູ້ອໍານວຍການໃຫຍ່ ທະນາຄານນະໂຍບາຍ ແລະ ທ່ານ ຮອງຫົວໜ້າສາຂາທະນາຄານແຫ່ງ ສປປ ລາວ ພາກໃຕ້ ແຂວງຈຳປາສັກ ແລະ ທ່ານຫົວໜ້າທະນາຄານນະໂຍບາຍ ສາຂາຈໍາປາສັກ ແລະ ທ່ານຮອງເຈົ້າເມືອງປາກຊ່ອງ ໄດ້ພັດປ່ຽນກັນມີຄຳເຫັນ ແລະ ເນັ້ນໜັກໃຫ້ຊາວກະສິກອນບ້ານກອງຕູ່ນ ສືບຕໍ່ຮັກສາມູນເຊື້ອທີ່ດີງາມ ໃນການຜະລິດ ແລະ ການກູ້ຢືມແຫຼ່ງທຶນນະໂຍບາຍເຂົ້າຖືກເປົ້າໝາຍ ແລະ ຮັບຜົນປະໂຫຍດສູງສຸດ. ຊຳລະເງິນຕົ້ນ ແລະ ດອກເບ້ຍ ໃຫ້ທັນເວລາ.
(ຂ່າວ: ຣັດສະໝີ ດວງສັດຈະ)
ຄໍາເຫັນ