 |
ທ່ານ ນາງ ມຸກດາວັນ ສີສຸລິດ ຫົວໜ້າກົມອົງການຈັດຕັ້ງສາກົນກະຊວງການຕ່າງປະເທດ ຕາງໜ້າໃຫ້ຄະນະຜູ້ແທນ ສປປ ລາວ ປະກອບຄໍາເຫັນໃນຫົວຂໍ້: Universalization ໂດຍໄດ້ເນັ້ນເຖິງ 3 ທິດທາງຫຼັກ ເພື່ອຊຸກຍູ້ການເຂົ້າຮ່ວມເປັນພາຄີສົນທິສັນຍາໃນຂອບເຂດທີ່ກວ້າງຂວາງຂຶ້ນ ໂດຍຜ່ານການຍົກລະດັບການເຄື່ອນໄຫວທາງການທູດ ແລະ ຊຸກຍູ້ການມີສ່ວນຮ່ວມຂອງບັນດາປະເທດທີ່ຍັງບໍ່ທັນເປັນພາຄີຂອງສົນທິສັນຍາ ໂດຍສະເພາະບັນດາປະເທດໃນພາກພື້ນອາຊີ-ປາຊີຟິກ; ສືບຕໍ່ຍຶດໝັ້ນຫຼັກການສາກົນ ບໍ່ໃຫ້ນໍາໃຊ້ລະເບີດລູກຫວ່ານ ແລະ ຫຼັກການດ້ານມະນຸດສະທຳ; ຍົກລະດັບການຮ່ວມມືກັບບັນດາປະເທດພາຄີ, ໜ່ວຍງານສະໜັບສະໜູນການຈັດຕັ້ງປະຕິບັດ (Implementation Support Unit/ISU), ການມີສ່ວນຮ່ວມຂອງອົງການຈັດຕັ້ງສາກົນອື່ນໆ ແລະ ຊາວໜຸ່ມ ເພື່ອຂະຫຍາຍຂອບເຂດການດໍາເນີນງານ.
ທ່ານ ບຸນເພັງ ສີສະຫວັດ ຫົວໜ້າຫ້ອງການຄະນະກຳມະການແຫ່ງຊາດ ເພື່ອການແກ້ໄຂບັນຫາລະເບີດບໍ່ທັນແຕກທີ່ຍັງຕົກຄ້າງຢູ່ ສປປ ລາວ ໄດ້ລາຍງານຄວາມຄືບໜ້າອັນພົ້ນເດັ່ນໃນໄລຍະໜຶ່ງປີທີ່ຜ່ານມາ, ສະເພາະປີ 2025, ສປປ ລາວ ສາມາດກວດກູ້ພື້ນທີ່ດິນຫຼາຍກວ່າ 6,879 ເຮັກຕາ ໃນ 15 ແຂວງ ຊຶ່ງລວມທັງພື້ນທີ່ກະສິກຳ ແລະ ພື້ນທີ່ການພັດທະນາ ແລະ ທໍາລາຍລະເບີດບໍ່ທັນແຕກຈໍານວນຫຼາຍກວ່າ 73,000 ໜ່ວຍ. ໃນນັ້ນ, ມີລະເບີດບົມບີເກືອບ 69,000 ໜ່ວຍ. ໃນໄລຍະ 8 ເດືອນຜ່ານມາສາມາດກຳນົດພື້ນທີ່ທີ່ມີຄວາມສ່ຽງຈາກລະເບີດບໍ່ທັນແຕກ (ພື້ນທີ່ອັນຕະລາຍທີ່ໄດ້ຮັບການຢືນຢັນ) ເພີ່ມຂຶ້ນຫຼາຍກວ່າ 6,738 ເຮັກຕາ, ມີການກວດກູ້ພື້ນທີ່ດິນຫຼາຍກວ່າ 4,285 ເຮັກຕາ ແລະ ທໍາລາຍລະເບີດບໍ່ທັນແຕກໄດ້ຫຼາຍກວ່າ 49,000 ໜ່ວຍ. ໃນນັ້ນ, ມີລະເບີດບົມບີປະມານ 31,000 ໜ່ວຍ.
ໃນວັນດຽວກັນ, ໄດ້ມີພິທີລົງນາມໃນຖະແຫຼງການ ສະແດງເຈດຕະນາລົມການເຂົ້າຮ່ວມເປັນພາຄີສົນທິສັນຍາຂອງຕີມໍ-ແລັສເຕ. ໃນວັນທີ 16 ກັນຍານີ້, ຄະນະຜູ້ແທນຍັງໄດ້ສືບຕໍ່ປະກອບຄໍາເຫັນຫຼາຍຫົວຂໍ້ສໍາຄັນຕື່ມອີກ.
(ຂ່າວ: ວັນເພັງ, ພາບ:ສໍານານ)
ຄໍາເຫັນ