ເຂົ້າຫຼາມ ປີ້ງໄກ່ ອາຫານລາວເອກະລັກໃນງານບຸນອອກພັນສາປະວໍລະນາ

ທ່ານ ນາງ ຄໍາແພງ ທຸມວິໄລ ອາຍຸ 59 ປີ ອາຊີບຄ້າຂາຍຢູ່ບ້ານນາເທບ ເມືອງໂພນໂຮງ ແຂວງວຽງຈັນ ກໍເປັນຜູ້ໜຶ່ງທີ່ໄດ້ປະກອບອາຊີບຂາຍເຂົ້າຫຼາມ, ປີ້ງໄກ່ໃນງານບຸນອອກພັນສາປະວໍລະນາມາໄດ້ຫຼາຍປີ. ທ່ານໄດ້ໃຫ້ສໍາພາດຕໍ່ສື່ມວນຊົນໃນວັນທີ 5 ຕຸລາ ຜ່ານມາວ່າ: ໄດ້ມາຂາຍເຂົ້າຫຼາມ, ປີ້ງໄກ່ນັບແຕ່ວັນທີ 4 ຕຸລາຜ່ານມາ ຊຶ່ງມີເຂົ້າຫຼາມ, ປີ້ງໄກ່, ໄຂ່ປີ້ງ ພິເສດໄມ້ທີ່ໃຊ້ເຮັດບັ້ງເຂົ້າຫຼາມແມ່ນໄດ້ເອົາໄມ້ໄຜ່ບ້ານ ຊຶ່ງເນື້ອໄມ້ຈະອ່ອນ ແລະ ມີກິ່ນຫອມ; ປີ້ງໄກ່ກໍຈະມີໄກ່ພື້ນບ້ານ ແລະ ໄກ່ພັນ ຊຶ່ງມີຫຼາຍລາຄາແຕກຕ່າງກັນ. ສໍາລັບເຂົ້າຫຼາມເລີ່ມຕົ້ນລາຄາ 20 ພັນກີບ ຫາ 50 ພັນກີບຕໍ່ບັ້ງ, ປີ້ງໄກ່ພື້ນບ້ານລາຄາ 50 ພັນກີບ ຫາ 2 ແສນກີບ. ສໍາລັບປີນີ້ເຫັນວ່າໄດ້ຂາຍດີພໍສົມຄວນ ຊຶ່ງຮ້ານຕັ້ງຢູ່ໃກ້ກັບວົງວຽນປາກປ່າສັກ ຂໍເຊີນຊວນບັນດາທ່ານທີ່ມາທ່ຽວງານບຸຸນອອກພັນສາປະວໍລະນາ ແລະ ຊ່ວງເຮືອທີ່ທ່າວັດຈັນມາອຸດໜູນເຂົ້າຫຼາມ, ປີ້ງໄກ່ແຊບໆທີ່ຮ້ານພວກເຮົາໄດ້.

ທ່ານ ນາງ ປາ ອາຍຸ 35 ປີ ປະຊາຊົນບ້ານໂພນສະຫວ່າງ ທາງແບ່ງນາໂພ ເມືອງໂພນໂຮງ ແຂວງວຽງຈັນ ໄດ້ໃຫ້ສໍາພາດຕໍ່ນັກຂ່າວເມື່ອບໍ່ດົນມານີ້ວ່າ: ໃນທຸກເທດສະການງານບຸນໃຫຍ່ຂອງຊາດບໍ່ວ່າຈະເປັນບຸນຊ່ວງເຮືອ, ບຸນທາດຫຼວງ ແລະ ບຸນອື່ນໆ. ເວົ້າສະເພາະໃນງານບຸນອອກພັນສາປີນີ້ຂ້າພະ ເຈົ້າໄດ້ມາຂາຍເຂົ້າຫຼາມຊຶ່ງເປັນອາຊີບທີ່ໄດ້ປະຕິບັດກັນມາແຕ່ດັ້ງເດີມທີ່ປູ່ຍ່າຕາຍາຍຕົນພາເຮັດແຕ່ນ້ອຍ. ຈາກເມື່ອກ່ອນແມ່ນຈະມາຂາຍແຕ່ສະເພາະໃນງານບຸນປະເພນີ ຕົກມາສູ່ຮຸ່ນລູກຫຼານປັດຈຸບັນ ພາຍຫຼັງແລ້ວໄຮ່ແລ້ວນາ ກໍມາເຮັດເຂົ້າຫຼາມຂາຍ ໂດຍການເລາະຂາຍຕາມບ້ານເຮືອນປະຊາຊົນພາຍໃນບ້ານແບບໃສ່ກະຕ່າແລ້ວມັດໃສ່ກົ້ນລົດຖີບຍ່າງເລາະຂາຍເພື່ອເປັນການສ້າງລາຍໃຫ້ຄອບຄົວ ຊຶ່ງເປັນເຂົ້າຫຼາມທີ່ເຮັດຈາກເຂົ້າໃໝ່ ລົດຊາດຫອມຫວານມັນລາຄາບໍ່ແພງເລີ່ມຕົ້ນ 20 ພັນກີບ ຫາ 50 ພັນກີບ.