 |
ໃນກອງປະຊຸມ ສະຫາຍ ອາລຸນໄຊ ສູນນະລາດ ໄດ້ໃຫ້ກຽດກ່າວເປີດກອງປະຊຸມ ຊຶ່ງສະຫາຍໄດ້ກ່າວວ່າວຽກງານກວດກາ ແມ່ນເນື້ອໃນສໍາຄັນຂອງວິທີການນໍາພາຂອງພັກ, ຊຶ່ງແມ່ນເຄື່ອງມືອັນແຫຼມຄົມໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ. ແຂວງຈໍາປາສັກໄດ້ພະຍາຍາມຢ່າງສູງໃນການຈັດຕັ້ງປະຕິບັດວຽກງານຕິດຕາມ, ກວດກາ, ຕ້ານການສໍ້ລາດບັງຫຼວງ ແລະ ການແກ້ໄຂຜົນຂອງການກວດກາຢ່າງແຂງແຮງ, ຊຶ່ງສາມາດສະກັດກັ້ນ ແລະ ເຮັດໃຫ້ປະກົດການຍໍ້ທໍ້ຕ່າງໆຫຼຸດນ້ອຍຖອຍລົງ, ປະກອບ ສ່ວນສໍາຄັນ ເຂົ້າໃນການຮັກສາສະຖຽນລະພາບ ທາງດ້ານການເມືອງ, ຄວາມສະຫງົບ ແລະ ການຂະຫຍາຍຕົວທາງດ້ານເສດຖະກິດ-ສັງຄົມຂອງແຂວງ. ພ້ອມນີ້ ສະຫາຍຍັງໄດ້ເຜີຍແຜ່ເຊື່ອມຊຶມບົດໂອ້ລົມຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກ ຕໍ່ກອງປະຊຸມວຽກງານກວດກາທົ່ວປະເທດຄັ້ງທີ V, ຈາກນັ້ນສະຫາຍ ສີສຸກ ພົງພິຈິດ ຮອງປະທານຄະນະກວດກາພັກແຂວງໄດ້ຜ່ານບົດສະຫຼຸບຕີລາຄາການເຄື່ອນໄຫວວຽກງານກວດກາ 5 ປີ (2021-2025) ແລະ ທິດທາງວຽກງານຈຸດສຸມ (2026-2030) ຊຶ່ງສະຫາຍໄດ້ຍົກໃຫ້ເຫັນໄລຍະ 5 ປີຜ່ານມາ ແຂວງຈຳປາສັກໄດ້ຕິດຕາມ, ກວດກາໂຄງການລົງທຶນຂອງລັດມູນຄ່າ 10 ຕື້ກີບຂຶ້ນໄປ ແລະ 10 ຕື້ລົງມາ ຈໍານວນ 221 ໂຄງການ; ຕິດຕາມໂຄງການເລີ່ມແຕ່ຫົວທີ 2 ໂຄງການ; ຕິດຕາມການຈັດເກັບລາຍຮັບ ແລະ ການປະຕິບັດລາຍຈ່າຍ; ຕິດຕາມ, ກວດກາຕາມຜົນການກວດສອບ ແລະ ຕາມມະຕິຂອງສະພາປະຊາຊົນແຂວງ 18 ເປົ້າໝາຍ; ກວດກາຕາມມະຕິສະພາແຫ່ງຊາດເລກທີ 113/ສພຊ ແລະ 139/ສພຊ; ການຈັດຕັ້ງປະຕິບັດຄຳສັ່ງ 15/ນຍ; ຕິດຕາມ, ກວດກາການປະຕິບັດຜົນການກວດກາ; ໄດ້ດໍາເນີນການສືບສວນ-ສອບສວນຕໍ່ພະນັກງານລັດທີ່ມີພຶດຕິກຳສໍ້ລາດບັງຫຼວງ ແລະ ບຸກຄົນທີ່ມີສ່ວນພົວພັນ ຕາມກົດໝາຍວ່າດ້ວຍການຕ້ານການສໍ້ລາດບັງຫຼວງ ແລະ ກົດໝາຍວ່າດ້ວຍການດໍາເນີນຄະດີອາຍາ ແລະ ນິຕິກຳອື່ນໆຢ່າງເຂັ້ມງວດ ແລະ ເດັດຂາດ. ໄດ້ດໍາເນີນຄະດີທັງໝົດ 37 ຄົນ, ພະນັກງານລັດ 17 ຄົນ, ພະນັກງານບໍລິສັດ 10 ຄົນ, ພະນັກງານລັດວິສາຫະກິດ 07 ຄົນ ແລະ ປະຊາຊົນ 3 ຄົນ.
 |
ພ້ອມນີ້, ສະຫາຍ ບົວສອນ ວົງຫາຈັກ ຮອງປະທານຄະນະກວດກາພັກແຂວງກໍໄດ້ຜ່ານຮ່າງແຜນພັດທະນາວຽກງານກວດກາທົ່ວແຂວງ ແຕ່ປີ 2026-2030 ແລະ ສະຫາຍ ບຸນຄົງ ພັນວົງສາ ຄະນະປະຈຳພັກແຂວງ, ປະທານຄະນະກວດກາພັກແຂວງ ຜ່ານມະຕິຂອງຄະນະບໍລິຫານງານສູນກາງພັກ ວ່າດ້ວຍການເພີ່ມທະວີສະກັດກັ້ນ, ຕ້ານ ແລະ ແກ້ໄຂພະຍາດອາດຍາສິດ, ການສໍ້ລາດບັງຫຼວງ, ປະກົດການຫຍໍ້ທໍ້, ການຟຸມເຟືອຍ ໃນກົງຈັກພັກ-ລັດ ແລະ ສັງຄົມ. ຫຼັງຈາກນັ້ນ, ສະຫາຍ ວັນໄຊ ພອງສະຫວັນ ກໍໄດ້ມີຄຳເຫັນເຈາະຈີ້ມບາງບັນຫາ ພ້ອມດຽວກັນນັ້ນບັນດາສະຫາຍຜູ້ແທນກອງປະຊຸມກໍໄດ້ຜັດປ່ຽນກັນຂຶ້ນປະກອບຄຳເຫັນ.
ໃນໂອກາດນີ້ ສະຫາຍ ວັນໄຊ ພອງສະຫວັນ ກໍໄດ້ມີຄຳເຫັນໂອ້ລົມຕໍ່ກອງປະຊຸມ, ຊຶ່ງສະຫາຍກໍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກ, ຄະນະນຳ ກໍຄືຄະນະກວດກາແຂວງຈຳປາສັກ ໃນການຈັດ ຕັ້ງປະຕິບັດວຽກງານກວດກາ 5 ປີຂອງແຂວງຈົນໄດ້ຮັບຜົນສຳເລັດໃນຫຼາຍດ້ານ ພ້ອມນີ້ຍັງໄດ້ເນັ້ນຕໍ່ຄະນະພັກ, ຄະນະນຳ ຂອງແຂວງຕ້ອງໄດ້ສ້າງການຫັນປ່ຽນໃໝ່ທາງດ້ານຈິນຕະນາການກ່ຽວກັບວຽກງານກວດກາ, ໃຫ້ຖືເອົາວຽກງານກວດກາເປັນເຄື່ອງມືໃນການນຳພາ, ເປັນເຄື່ອງມືໃນການບໍລິຫານ, ການກວດ ກາແມ່ນກວດໃຫ້ເຫັນດ້ານດີຜົນສຳເລັດເພື່ອຈັດຕັ້ງຜັນຂະຫຍາຍ, ກວດໃຫ້ເຫັນດ້ານອ່ອນເພື່ອປັບປຸງແກ້ໄຂ, ວຽກງານກວດກາເປັນວຽກງານຂອງຄະນະພັກ, ຄະນະປະຈຳພັກໂດຍສະເພາະແມ່ນສະຫາຍເລຂາຄະນະພັກຕ້ອງກຳກັບຮັບຜິດຊອບໂດຍກົງໃນການນໍາພາ-ຊີ້ນຳຊຸກຍູ້ຕິດຕາມວຽກງານກວດກາເພື່ອແກ້ໄຂບັນຫາຕ່າງໆ, ແຜນການເຄື່ອນໄຫວຂອງຄະນະກວດກາຂັ້ນແຂວງ,ຂັ້ນເມືອງຕ້ອງໄດ້ຫັນມາເປັນແຜນຂອງຄະນະພັກ, ຄະນະກວດກາແມ່ນເປັນຜູ້ປະຕິບັດຕາມແຜນການຂອງຄະນະປະຈຳ, ຄະນະກວດກາແມ່ນເປັນເສນາທິການໃຫ້ຄະນະພັກ; ສະນັ້ນຕ້ອງເອົາໃຈໃສ່ເພີ່ມທະວີວຽກງານກວດກາພັກ, ຜັນຂະຫຍາຍແນວທາງນະໂຍບາຍຂອງພັກ, ກວດກາໝາກຜົນການຈັດຕັ້ງປະຕິບັດວຽກງານຕ່າງໆ; ວຽກງານກວດກາລັດຕ້ອງເພີ່ມທະວີໃນການກວດກາອົງການອຳນາດລັດ, ກວດກາຜູ້ບໍລິຫານລັດ ເພື່ອເປັນການສະກັດກັ້ນແຕ່ຫົວທີເພື່ອບໍ່ໃຫ້ມີການລະເມີດ, ກວດກາບັນດາໂຄງການລົງທຶນຂອງລັດ, ການຈັດຊື້-ຈັດຈ້າງ, ການຄຸ້ມຄອງນຳໃຊ້ງົບປະມານ, ກວດກາການນຳໃຊ້ແຮ່ທາດຕ່າງໆ, ກວດກາການລົງທຶນຂອງເອກະຊົນ; ເອົາໃຈ ໃສ່ແກ້ໄຂຜົນການກວດກາໃຫ້ເປັນໄປຕາມຂັ້ນຕອນທີ່ກຳນົດໄວ້ໃນກົດໝາຍກວດກາລັດ, ບັນຫາໃດທີ່ບໍ່ສາ ມາດແກ້ໄດ້ກໍໃຫ້ສະເໜີຕໍ່ຂັ້ນເທິງເພື່ອຄົ້ນຄວ້າແກ້ໄຂ; ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງຊຶ່ງເປັນໜ້າທີ່ຍຸດທະສາດຂອງພັກເຮົາທີ່ຕ້ອງໄດ້ເອົາໃຈໃສ່, ສະນັ້ນຕ້ອງໄດ້ເພີ່ມທະວີໃນການໂຄສະນາສຶກສາອົບຮົມເຮັດໃຫ້ພະນັກງານ, ທະຫານ-ຕຳຫຼວດ ແລະ ປະຊາຊົນໄດ້ເຫັນຜົນຮ້າຍຂອງການສໍ້ລາດບັງຫຼວງ.
ພ້ອມນີ້ ຍັງໄດ້ມອບເງິນຈຳນວນ 100,000,000 ກີບ ໃຫ້ຄະນະກວດກາພັກແຂວງເພື່ອນຳໃຊ້ເຂົ້າໃນການເຄື່ອນໄຫວວຽກງານກວດກາຂອງແຂວງ ແລະ ມອບເງິນຈຳນວນ 100,000,000 ກີບ ໃຫ້ແຂວງເພື່ອຊ່ວຍເຫຼືອວຽກງານສະກັດກັ້ນ ແລະ ແກ້ໄຂໄພພິບັດອີກດ້ວຍ. (ຂ່າວ: ຕູ່ນ່າ)
ຄໍາເຫັນ