ແຂວງຫຼວງພະບາງປະກາດບົ່ງຕົວແຕ່ງຕັ້ງໜ້າທີ່ພະນັກງານນໍາພາ-ຄຸ້ມຄອງ

ໂດຍເປັນປະທານຂອງ ທ່ານ ບຸນເລື່ອມ ມະນີວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງຫຼວງພະບາງ; ມີກຳມະການປະຈຳພັກແຂວງ, ກຳມະການພັກແຂວງ, ຄະນະປະຈໍາສະພາປະຊາຊົນແຂວງ, ເລຂາພັກເມືອງ, ຫົວໜ້າພະແນກການ, ພາກສ່ວນກ່ຽວຂ້ອງ ແລະ ແຂກຮັບເຊີນ ເຂົ້າຮ່ວມ.

ທ່ານ ຄໍາເກັ່ງ ຈັນທະວີສຸກ ກໍາມະການປະຈໍາພັກແຂວງ, ຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານຂໍ້ຕົກລົງ ວ່າດ້ວຍການອະນຸມັດໃຫ້ພະນັກງານນໍາພາຄຸ້ມຄອງ ຈໍານວນ 5 ທ່ານ, ປະກອບມີ ທ່ານ ວົງສະຫວັນ ເທບພະຈັນ, ທ່ານ ສິງຕັນ ໄຊລືຊົ່ງ, ທ່ານ ສີວອນ ວົງຄໍາຈັນ, ທ່ານ ພອນເລີດ ໄຊຍະນາ ແລະ ທ່ານ ໄຊ ເຢຍເຊັງທ່າວ ພັກຜ່ອນຮັບເບ້ຍບໍານານ, ພ້ອມນີ້, ໄດ້ຂຶ້ນຜ່ານມະຕິຕົກລົງ ຂອງຄະນະເລຂາທິການສູນກາງພັກ ວ່າດ້ວຍການບົ່ງຕົວແຕ່ງຕັ້ງ ທ່ານ ນາງ ສຸດາພອນ ຄົມທະວົງ ກໍາມະການພັກແຂວງ, ຫົວໜ້າພະແນກວັດທະນະທໍາ ແລະ ການທ່ອງທ່ຽວແຂວງ, ເປັນກໍາມະການປະຈໍາພັກແຂວງ, ທ່ານ ພອນໄຊ ກຸນລະວົງ, ຫົວໜ້າພະແນກການຕ່າງປະເທດ ເປັນກໍາມະການຄະນະບໍລິຫານງານ ພັກແຂວງ.

ຕອນທ້າຍ ທ່ານ ບຸນເລື່ອມ ມະນີວົງ ໄດ້ໃຫ້ກຽດມອບຂໍ້ຕົກລົງ ແລະ ມີຄໍາເຫັນສະແດງຄວາມຊົມເຊີຍ ຕໍ່ຜົນງານ ແລະ ຄຸນງາມຄວາມດີຂອງພະນັກງານ ທີ່ໄດ້ພັກຜ່ອນຮັບເບ້ຍບໍານານ, ພ້ອມທັງສະແດງຄວາມຊົມເຊີຍຕໍ່ພະນັກງານຫຼັກແຫຼ່ງ ທີ່ໄດ້ຮັບການບົ່ງຕົວແຕ່ງຕັ້ງໜ້າທີ່ປະກອບເຂົ້າໃນຄະນະບໍລິຫານງານພັກແຂວງເພີ່ມເຕີມ, ທ່ານກ່າວຕື່ມວ່າ: ການພັກຜ່ອນຮັບເບ້ຍບໍານານ ແລະ ການສັບຊ້ອນໜ້າທີ່ວຽກງານ ແມ່ນເລື່ອງປົກກະຕິຂອງການບໍລິຫານງານບຸກຄະລາກອນ, ເພື່ອໃຫ້ສາມາດຕອບສະໜອງ ຕໍ່ຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ ໃຫ້ຖືກຕ້ອງ ແລະ ສອດຄ່ອງຍິ່ງຂຶ້ນ, ຈຶ່ງໄດ້ຮຽກຮ້ອງໃຫ້ພະນັກງານທີ່ໄດ່ຮັບການບົ່ງຕົວແຕ່ງຕັ້ງໃໝ່ ຈົ່ງສຸມສະຕິປັນຍາ, ຍົກສູງຈິດໃຈຮັບຜິດຊອບ, ສາມັກຄີປະສານສົມທົບ ແລະ ປະກອບສ່ວນ ເຂົ້າໃນການເຄື່ອນໄຫວຈັດຕັ້ງປະຕິບັດວຽກງານຕາມຄວາມຮັບຜິດຊອບຂອງຕົນ ໃຫ້ມີຜົນສໍາເລັດເປັນກ້າວໆ.

(ພາບ-ຂ່າວ: ທະນູສິນ ອິດທິພົນ)