ແຂວງສາລະວັນ ເປີດລະດູການຜະລິດລະດູແລ້ງ 

ແຂວງສາລະວັນ ເປີດຂະບວນການຜະລິດລະດູແລ້ງ ປະຈຳສົກປີ 2023-2024, ໂດຍແມ່ນພະແນກກະສິກຳ ແລະ ປ່າໄມ້ແຂວງ, ຫ້ອງການກະສິກໍາ ແລະ ປ່າໄມ້ເມືອງສາລະວັນ ສົມທົບກັບອຳນາດການປົກຄອງບ້ານ, ກຸ່ມຊາວກະສິກອນຈັດພິທີ ຈັດຂຶ້ນໃນວັນທີ 15 ພະຈິກ ນີ້ ທີ່ເຂດຊົນລະປະທານນາຂ້ອຍສາວ, ຈຸດບ້ານພ້າວ, ໂດຍການເຂົ້າຮ່ວມຂອງ ທ່ານ ນາງ ບຸນທະວີ ດວງລາສີ ຮອງເລຂາພັກແຂວງ ຜູ້ຊີ້ນໍາວຽກງານການເມືອງແນວຄິດ, ວຽກພັກ-ພະນັກງານ, ທ່ານ ອະນຸສັກ ຈຳປາຄຳ ຫົວໜ້າພະແນກກະສິກໍາ ແລະ ປ່າໄມ້ແຂວງ, ທ່ານ ຈັນສີລອນ ສີສົມບູນ ເຈົ້າເມືອງໆສາລະວັນ, ມີບັນດາທ່ານການນໍາຂອງແຂວງ, ເມືອງ ແລະ ພະແນກການ, ຂະແໜງການທີ່ກ່ຽວຂ້ອງຂັ້ນແຂວງ, ຂັ້ນເມືອງ ແລະ ອຳນາດການປົກຄອງບ້ານ ທີ່ກ່ຽວຂ້ອງ ແລະ ປະຊາຊົນບ້ານພ້າວ ເຂົ້າຮ່ວມ.
ທ່ານ ກິພະຈັນ ໂພສາລີ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ ໄດ້ຍົກໃຫ້ເຫັນຄວາມໝາຍຄວາມສຳຄັນຂະບວນການຜະລິດລະດູແລ້ງ ເປັນການສົ່ງເສີມການສ້າງຂະບວນການຂໍ່ານັບຮັບຕ້ອນວັນສຳຄັນ ຂອງວຽກງານຂະແໜງກະສິກຳ ແລະ ປ່າໄມ້ ຄືວັນ: ຊົນລະປະທານແຫ່ງຊາດ ວັນທີ 3 ພະຈິກ, ວັນເປີດລະດູການຜະລິດລະດູແລ້ງ, ຂະບວນໄຖປົກຕໍເຟືອງ ແລະ ວັນສັກຢາປ້ອງກັນພະຍາດສັດ ວັນທີ 11 ພະຈິກໃຫ້ເປັນຂະບວນການຟົດຟື້ນເພື່ອປູກຈິດສຳນຶກໃຫ້ປະຊາຊົນ ຫັນມາເອົາໃຈໃສ່ການສັກຢາປ້ອງກັນພະຍາດ ແລະ ຮັກສາສຸຂະພາບສັດ ເພື່ອຫຼຸດຜ່ອນຄວາມສ່ຽງການລະບາດຂອງພະຍາດສັດ, ຊຸກຍູ້ການປູກພຶດລະດູແລ້ງ ທົດແທນການນຳເຂົ້າ, ສະໜອງການບໍລິໂພກພາຍໃນກຸ້ມຕົນເອງເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ ຫັນເອົາການຈັດຕັ້ງປະຕິບັດວາລະແຫ່ງຊາດ ການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ.
ແຂວງສາລະວັນ ເປັນແຂວງໜຶ່ງ ທີ່ນອນໃນຈຸດສຸມການຜະລິດສະບຽງອາຫານຂອງລັດຖະບານ, ມີເນື້ອທີ່ຜະລິດເຂົ້າກວ້າງຂວາງລຽບຕາມສາຍນໍ້າເຊໂດນ ຫຼື ທົ່ງພຽງເຊໂດນ ທີ່ອຸດົມສົມບູນໄປດ້ວຍຊັບພະຍາກອນທຳມະຊາດ, ເປັນການສືບຕໍ່ຄາດໝາຍສູ້ຊົນ ແລະ ຜັນຂະຫຍາຍມະຕິ XI ຂອງພັກ ກໍຄືແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025), ເພື່ອລຶບລ້າງຄວາມທຸກຍາກ ແລະ ເປັນເງື່ອນໄຂອັນດີໃນການພັດທະນາ, ເຊື່ອມໂຍງເສດຖະກິດໃນທົ່ວປະເທດ ແລະ ພາກພື້ນ, ທັງປະຕິບັດຍຸດທະສາດຕົ້ນຕໍໃນການສຸມໃສ່ວຽກງານພັດທະນາພື້ນຖານໂຄງລ່າງດ້ານກະສິກຳ ແລະ ສູ້ຊົນຄາດໝາຍແຜນພັດທະນາຊົນລະປະທານຂອງແຂວງ ໃນໄລຍະ 5 ປີ 2021-2025 ໃຫ້ກວມເອົາ 20% ຂອງເນື້ອທີ່ນາເຟືອງ. ປັດຈຸບັນ ໃນທົ່ວແຂວງ ມີໂຄງການຊົນລະປະທານທັງໝົດ 226 ແຫ່ງ,ປະເພດ ຝາຍນໍ້າລົ້ນ 114 ໂຄງການ, ປະເພດຈັກສູບນໍ້າດ້ວຍໄຟຟ້າ 58 ແຫ່ງ ແລະ ອ່າງເກັບນໍ້າຂະ
ໜາດນ້ອຍ 36 ແຫ່ງ ສາມາດສະໜອງນໍ້າລະດູແລ້ງ 15.200 ເຮັກຕາ ຫຼື ກວມເອົາ 18% ຂອງເນື້ອທີ່ນາເຟືອງທັງໝົດ, ໃນນີ້ເຂົ້າ 14.000 ເຮັກຕາ, ພືດ 1.200 ເຮັກຕາ.
ໂອກາດນີ້, ທ່ານ ນາງ ບຸນທະວີ ດວງສາລີ ກໍໄດ້ໃຫ້ກຽດເປີດຂະບວນການຜະລິດລະດູແລ້ງ ຢ່າງເປັນທາງການ ຈາກນັ້ນ, ບັນດາທ່ານທີ່ເຂົ້າຮ່ວມກໍໄດ້ຮ່ວມສັກຢາປ້ອງກັນພະຍາດໃຫ້ແກ່ສັດລ້ຽງພ້ອມທັງ ໄຂປະຕູນ້ຳ, ຫວ່ານກ້າ ແລະ ດຳນາແລະຮ່ວມຂະບວນການອື່ນໆຕື່ມອີກ. ໃນພິທີຄັ້ງນີ້ ຍັງໄດ້ມີການມອບແນວພັນເຂົ້າ, ແນວພັນພືດຜັກ ໃຫ້ແກ່ຊາວກະສິກອນຕື່ມອີກ.
ຂ່າວ-ພາບ: ວິໄລວອນ ສິດທິໄຊ