 |
ສະຫາຍ ພູທະນູເພັດ ໄຊສົມບັດ ໄດ້ຍົກໃຫ້ເຫັນຄວາມສໍາຄັນຂອງວຽກງານຈັດຕັ້ງ ແລະ ການປົກຄອງ ໃນການສ້າງພັກ, ການພັດທະນາລະບົບການເມືອງ, ຍົກສູງຄຸນນະພາບພະນັກງານ ແລະ ເສີມສ້າງປະສິດທິຜົນການນຳພາ-ຊີ້ນຳຂອງຄະນະພັກແຕ່ລະຂັ້ນ.
ຈາກນັ້ນ ສະຫາຍ ຄຳເພັດ ຈັນສົມພູ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ ໄດ້ຜ່ານຮ່າງບົດສະຫຼຸບວຽກງານຈັດຕັ້ງ ແລະ ການປົກຄອງ ໄລຍະ 5 ປີ (2021-2025) ແລະ ທິດທາງ 5 ປີ (2026-2030) ໃຫ້ຮູ້ວ່າ: ໃນໄລຍະ 5 ປີຜ່ານມາ ຄະນະພັກ, ຄະນະນຳຂັ້ນຕ່າງໆ ຂອງແຂວງວຽງຈັນ ໄດ້ເອົາໃຈໃສ່ນຳພາ-ຊີ້ນຳ ແລະ ຈັດຕັ້ງປະຕິບັດວຽກງານຈັດຕັ້ງ ແລະ ການປົກຄອງ ຕາມແນວທາງ, ມະຕິ, ຄຳສັ່ງ ແລະ ນະໂຍບາຍຂອງພັກ ສາມາດບັນລຸຜົນສຳເລັດຫຼາຍດ້ານເປັນຕົ້ນແມ່ນ ໄດ້ເອົາໃຈໃສ່ກໍ່ສ້າງພັກທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນວິທີນຳພາ, ສົ່ງເສີມການສຶກສາອົບຮົມ, ເຜີຍແຜ່ແນວທາງ ແລະ ມະຕິຂອງພັກ, ສ້າງຄວາມເຂົ້າໃຈເອກະພາບໃນບັນດາສະມາຊິກພັກ ແລະ ພະນັກງານ.
ການປັບປຸງກົງຈັກພັກ ແລະ ລັດ ໄດ້ດຳເນີນການຍຸບ-ໂຮມ ບາງກົງຈັກ ເພື່ອຫຼຸດຜ່ອນຄວາມຊ້ຳຊ້ອນ, ຮັບປະກັນການນຳພາລວມສູນ ແລະ ເຮັດໃຫ້ກົງຈັກການຈັດຕັ້ງມີຄວາມເຂັ້ມແຂງ. ປັດຈຸບັນ ທົ່ວແຂວງມີ 11 ອົງຄະນະພັກເມືອງ ແລະ 2 ຄະນະພັກກອງບັນຊາການ ປກຊ-ປກສ, ມີ 1,394 ຮາກຖານພັກ ແລະ 1,291 ໜ່ວຍພັກ, ເພີ່ມຂຶ້ນ 27 ໜ່ວຍພັກ ທຽບໃສ່ປີ 2021.
ສຳລັບວຽກງານພະນັກງານ-ລັດຖະກອນ ໄດ້ເອົາໃຈໃສ່ສ້າງ ແລະ ປະຕິບັດແຜນກຳນົດພະນັກງານນຳພາ-ຄຸ້ມຄອງ, ປັບປຸງການຈັດວາງພະນັກງານໃຫ້ເໝາະສົມກັບຕຳແໜ່ງງານ, ດຳເນີນການປະເມີນຜົນການປະຕິບັດງານປະຈຳປີ ແລະ ຍົກສູງຄຸນນະພາບພະນັກງານ.
ດ້ານການປົກຄອງ ໄດ້ເອົາໃຈໃສ່ປັບປຸງກົງຈັກການບໍລິຫານ, ສ້າງຄວາມສາມັກຄີພາຍໃນຄະນະພັກ ແລະ ອົງການປົກຄອງ, ພ້ອມທັງສົ່ງເສີມການນຳພາ-ຊີ້ນຳໃຫ້ສອດຄ່ອງກັບພາລະບົດບາດ ແລະ ໜ້າທີ່ຂອງແຕ່ລະຂັ້ນ.
 |
ກອງປະຊຸມໄດ້ກຳນົດທິດທາງສືບຕໍ່ວຽກງານຈັດຕັ້ງ ແລະ ການປົກຄອງ ໃນໄລຍະ 5 ປີຕໍ່ໜ້າ ໂດຍສຸມໃສ່, ສືບຕໍ່ກໍ່ສ້າງພັກໃຫ້ເຂັ້ມແຂງ ທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນວິທີນຳພາ; ຍົກສູງຄວາມສາມັກຄີ, ຄວາມຮັບຜິດຊອບ ແລະ ວິໄນຂອງສະມາຊິກພັກ,ປັບປຸງກົງຈັກການຈັດຕັ້ງພັກ ແລະ ລັດ ໃຫ້ກະທັດຮັດ, ສົມເຫດສົມຜົນ, ຫຼຸດຜ່ອນຄວາມຊ້ຳຊ້ອນ ແລະ ຍົກສູງປະສິດທິຜົນການນຳພາ-ບໍລິຫານ,ເອົາໃຈໃສ່ວຽກງານພະນັກງານ-ລັດຖະກອນ, ສ້າງແຜນກຳນົດພະນັກງານນຳພາ-ຄຸ້ມຄອງ ໄລຍະ 2026-2030, ສ້າງແຜນຄາດຄະເນບຳລຸງ-ກໍ່ສ້າງພະນັກງານ, ຈັດວາງພະນັກງານໃຫ້ຖືກຕ້ອງ ເໝາະສົມກັບຕຳແໜ່ງງານ ແລະ ຕິດຕາມປະເມີນຜົນຢ່າງເປັນປົກກະຕິ,ສືບຕໍ່ປັບປຸງວຽກງານການປົກຄອງ, ເສີມສ້າງລະບອບປະຊາທິປະໄຕ, ຍົກສູງຄວາມຮັບຜິດຊອບ, ຄວາມໂປ່ງໃສ ແລະ ວິໄນໃນການບໍລິຫານງານ,ສົ່ງເສີມການສ້າງແຂວງໃຫ້ເປັນຫົວໜ່ວຍຍຸດທະສາດ, ສືບຕໍ່ຕິດຕາມບັນດາຕົວຊີ້ບອກທີ່ຍັງບໍ່ບັນລຸ ແລະ ຜັນຂະຫຍາຍໃຫ້ບັນລຸຕາມແຜນການ,ປັບປຸງການປະສານງານລະຫວ່າງຄະນະພັກ, ອົງການປົກຄອງ ແລະ ຂະແໜງການຕ່າງໆ ໃຫ້ກົມກຽວ, ສາມັກຄີ ແລະ ມີປະສິດທິຜົນ.
ກອງປະຊຸມຍັງໄດ້ປຶກສາຫາລື, ປະກອບຄຳຄິດເຫັນຕໍ່ຮ່າງບົດສະຫຼຸບ ແລະ ທິດທາງແຜນການ, ເພື່ອປັບປຸງເນື້ອໃນໃຫ້ຄົບຖ້ວນ ແລະ ແທດເໝາະກັບສະພາບຕົວຈິງ,ພ້ອມກັນນັ້ນ ໄດ້ເນັ້ນໃຫ້ບັນດາຂະແໜງການ, ອົງການ ແລະ ທ້ອງຖິ່ນ ເອົາໃຈໃສ່ຜັນຂະຫຍາຍມະຕິກອງປະຊຸມໃຫ້ເປັນແຜນງານ ແລະ ໂຄງການລະອຽດ, ຈັດຕັ້ງປະຕິບັດດ້ວຍຄວາມຮັບຜິດຊອບສູງ.
ຂ່າວ: ແຂວງວຽງຈັນ
ຄໍາເຫັນ