ຄົ້ນຄວ້າຮ່າງຄໍາສັ່ງ ວ່າດ້ວຍການເພີ່ມທະວີວຽກງານສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ

ໃນພິທີ, ສະຫາຍ ພັອ ວິໄລຄໍາ ສີຊານົນ ຫົວໜ້າກົມນິຕິກຳ ແລະ ກົດໝາຍ ໄດ້ຜ່ານບົດລາຍງານຮ່າງຄໍາສັ່ງ ວ່າດ້ວຍການເພີ່ມທະວີວຽກງານສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ ເພື່ອຮັບປະ ກັນໃຫ້ວຽກງານສະກັດກັ້ນ ແລະ ແກ້ໄຂປະກົດການຫຍໍ້ທໍ້ ທີ່ມີລັກສະນະພົ້ນເດັ່ນ, ເປັນອັນຕະລາຍ ແລະ ມີທ່າອ່ຽງຈະເພີ່ມຂຶ້ນໃນສັງຄົມ ໃຫ້ເປັນຄວາມຮັບຜິດຊອບຂອງທົ່ວອົງການຈັດຕັ້ງພັກ-ລັດ ແລະ ສັງຄົມ ໃນການຈັດຕັ້ງປະຕິບັດຢ່າງເລັ່ງດ່ວນ, ທັນກັບສະພາບການ, ມີປະສິດທິພາບ ແລະ ປະສິດທິຜົນ ແນໃສ່ຮັບ ປະກັນສະຖຽນລະພາບທາງດ້ານການເມືອງ, ຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ ປະ ກອບສ່ວນເຂົ້າໃນການສ້າງສາພັດທະນາເສດຖະກິດ-ສັງຄົມຂອງຊາດໃນແຕ່ລະໄລຍະ ໃຫ້ມີຄວາມເຕີບໃຫຍ່ເຂັ້ມແຂງ.

ໂອກາດນີ້, ສະຫາຍ ພົຕ ກອງສະຫວັດ ບຸນລ້ຽງ ກ່າວວ່າ: ກອງປະຊຸມຄັ້ງນີ້, ຈັດຂຶ້ນເພື່ອຄົ້ນຄວ້າປະກອບຄໍາເຫັນໃສ່ຮ່າງຄໍາສັ່ງ ວ່າດ້ວຍການເພີ່ມທະວີວຽກງານສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ ເພື່ອເຮັດໃຫ້ມີຄວາມຖືກຕ້ອງ, ສອດຄ່ອງ, ຄົບຖ້ວນ, ຮັດກຸມ ພາຍຫຼັງຖືກຮັບຮອງຈະເປັນບ່ອນອີງໃຫ້ເຈົ້າໜ້າທີ່ ໃນການຈັດຕັ້ງປະຕິບັດການສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ ໄດ້ຢ່າງມີປະສິດ ທິພາບ ແລະ ປະສິດທິຜົນ. ຮຽກຮ້ອງມາຍັງຜູ້ເຂົ້າຮ່ວມກອງປະຊຸມ ຈົ່ງພ້ອມກັນຍົກສູງຄວາມຮັບຜິດຊອບ ໃນການຄົ້ນຄວ້າປະກອບຄໍາຄິດ-ຄໍາເຫັນຢ່າງຫຼາກຫຼາຍ ແລະ ກົງໄປກົງມາ ທີ່ຕິດພັນກັບສະພາບປະກົດການຫຍໍ້ທໍ້ທີ່ພົ້ນເດັ່ນເກີດຂຶ້ນໃນສັງຄົມປັດຈຸບັນ ທີ່ນອນຢູ່ໃນຄວາມຮັບຜິດຊອບຂອງກົມກອງວິຊາສະເພາະຂອງຕົນ ໃນການຊອກໃຫ້ເຫັນຊ່ອງຫວ່າງ ແລະ ວິທີການແກ້ໄຂຕ່າງໆ ເພື່ອຈະເປັນຂໍ້ມູນທີ່ສໍາຄັນໃຫ້ການປັບປຸງຮ່າງຄໍາສັ່ງສະບັບນີ້ ມີເນື້ອໃນທີ່ອຸດົມສົມບູນຂຶ້ນກວ່າເກົ່າ ແລະ ສາມາດຈັດຕັ້ງປະຕິບັດໄດ້ຢ່າງມີປະສິດທິຜົນ.

ຂ່າວ: ປກສ