ຂ່າວຕ່າງປະເທດລາຍງານ ເມື່ອບໍ່ດົນມານີ້, ລັດຖະບານຍີ່ປຸ່ນໄດ້ເປີດເຜີຍຜົນການສຳຫຼວດພົບວ່າ ປະຊາຊົນທີ່ເຮັດວຽກໃນຍີ່ປຸ່ນທັງໝົດ 45,5% ນອນຫຼັບໂດຍສະເລ່ຍໜ້ອຍກວ່າ 6 ຊົ່ວໂມງຕໍ່ຄືນ. ຜົນການສຳຫຼວດລະບຸວ່າ ຜູ້ຕອບແບບສອບຖາມສຳຫຼວດ 10% ເປີດເຜີຍວ່າ ນອນໜ້ອຍກວ່າ 5 ຊົ່ວໂມງຕໍ່ຄືນ, 35,5% ນອນຫຼັບຄືນລະ 5-6 ຊົ່ວໂມງ ແລະ 35,2% ນອນຫຼັບຄືນລະ 6-7 ຊົ່ວໂມງ.
ຜົນການສຳຫຼວດພະນັກງານ 100.000 ຄົນ ພົບວ່າປະມານ 70% ຂອງຜູ້ນອນຫຼັບຕາມປະລິມານເວລາອັນເໝາະສົມບໍ່ມີຄວາມສ່ຽງເປັນພະຍາດຊຶມເສົ້າ ຂະນະທີ່ອັດຕາສ່ວນດັ່ງກ່າວຫຼຸດລົງຕ່ຳກວ່າ 40% ໃນໝູ່ຜູ້ນອນຫຼັບນ້ອຍກວ່າປະລິມານເວລາອັນເໝາະສົມ 3-5 ຊົ່ວໂມງ. ຜົນການສຳຫຼວດຈາກກະຊວງສາທາລະນະສຸກຂອງຍີ່ປຸ່ນພົບວ່າ 27,4% ຂອງຄົນເຮັດວຽກທີ່ນອນຫຼັບໜ້ອຍກວ່າປະລິມານເວລາອັນເໝາະສົມ 4 ຊົ່ວໂມງ ແລະ 38,5% ຂອງຄົນເຮັດວຽກທີ່ນອນຫຼັບໜ້ອຍກວ່າປະລິມານເວລາອັນເໝາະສົມ 5 ຊົ່ວໂມງມີທ່າອ່ຽງປ່ວຍເປັນພະຍາດຊຶມເສົ້າ ຂັ້ນຮຸນແຮງ.
ກະຊວງສາທາລະນະສຸກຂອງຍີ່ປຸ່ນກ່າວຕື່ມວ່າ ມີຄວາມຈຳເປັນຕ້ອງໄດ້ແກ້ໄຂຊົ່ວໂມງການເຮັດວຽກອັນຍາວນານເພື່ອ ຊ່ວຍໃຫ້ຄົນງານມີເວລານອນຫຼັບພັກຜ່ອນເພີ່ມຂຶ້ນ ເພື່ອໃຫ້ພວກເຂົາສາມາດຮັກສາສະພາບຈິດໃຈໃຫ້ແຂງແຮງໄດ້ດີ.
ຄໍາເຫັນ