ໄດ້ມາຕັ້ງຖິ່ນຖານຢູ່ບ້ານຊົນລະວຽງ ເມືອງໂຂງ, ມີສະມາຊິກຄອບຄົວທັງໝົດ 4 ຄົນຍິງ 2 ຄົນ.
ຍ້ອນຄວາມເຂົ້າໃຈຕໍ່ແນວທາງນະໂຍບາຍຂອງພັກໃນການເພີ່ມພູນຜະລິດຜົນໃຫ້ກາຍເປັນສິນຄ້າ, ຍ້ອນໄດ້ຮັບການຊີ້ນໍາ ແລະ ກະຕຸກຊຸກຍູ້ຂອງອົງຄະນະພັກເມືອງໂຂງ; ທ່ານ ຄໍາຈັນ ໄຊສົມບັດຈຶ່ງເກີດມີແນວຄວາມຄິດສ້າງຖານຂະຫຍາຍພັນປານໍ້າຂອງ, ສົ່ງເສີມການຜະລິດເພື່ອຮັບປະກັນທາງດ້ານສະບຽງອາຫານ ຕອບສະໜອງພາຍໃນເມືອງ-ແຂວງ ແລະ ຕ່າງແຂວງທັງເປັນການທົດແທນການນໍາເຂົ້າ ແລະ ສົ່ງອອກເປັນສິນຄ້າ;ອີງໃສ່ສະພາບທີ່ຕັ້ງ ຈຸດພິເສດຂອງທ້ອງຖິ່ນທີ່ເອື້ອອໍານວຍ ແລະ ເໝາະສົມ ໃຫ້ແກ່ການປູກ,ການລ້ຽງ ຕິດພັນກັບຕະຫຼາດ.ທ່ານ ຄໍາຈັນ ໄຊສົມບັດ ໄດ້ເລີ່ມສໍາຫຼວດດິນຂອງລາວໃນປີ 2017 ແລະ ບຸກເບີກ ໃນປີ 2018 ມີເນື້ອທີ່ 30 ເຮັກຕາ ຊຶ່ງເນື້ອທີ່ເດີມແມ່ນເປັນເຂດພື້ນທີ່ຕໍ່າ,ນໍ້າຖ້ວມຂັງ ແລະ ບໍ່ສາມາດທໍາການຜະລິດໄດ້ໃນລະດູຝົນ.ດັ່ງນັ້ນ,ຈຶ່ງໄດ້ມີແນວຄິດສ້າງໜອງປາຂຶ້ນ ໂດຍການປັບປຸງພື້ນທີ່ດັ່ງກ່າວໃຫ້ເປັນໜອງ ເພື່ອລ້ຽງປາ ແລະ ປູກພືດໄປພ້ອມໆກັນ ໂດຍໄດ້ລົງທຶນປະມານ 5 ຕື້ກີບ, ມີກໍາມະກອນທັງມົດ 13 ຄົນ.
ຜ່ານການລ້ຽງປາມາຫຼາຍປີເຫັນໄດ້ວ່າ ໄດ້ເຮັດໃຫ້ມີລາຍຮັບເພີ່ມຂຶ້ນທຸກໆປີ, ມີຕະຫຼາດຮອງຮັບທີ່ແນ່ນອນ, ແຕ່ລະມື້ມີພໍ່ຄ້າ-ແມ່ຄ້າສັ່ງຈອງ.ຍາມບຸນສິນກິນທານບໍ່ພຽງພໍກັບຄວາມຕ້ອງການຂອງລູກຄ້າ.ຈາກນັ້ນ,ຈຶ່ງນໍາໃຊ້ທຶນຮ່ອນທີ່ສະສົມມາ ຂະຫຍາຍໜອງລ້ຽງປາ ເພີ່ມຂຶ້ນເລື້ອຍໆ ຊຶ່ງມາຮອດປັດຈຸບັນລາວມີໜອງລ້ຽງປາ ທັງໝົດ 50 ໜອງ,ປ່ອຍປາໄດ້ແລ້ວ 25 ໜອງ ແລະ ໜອງອະນຸບານລູກປາ 25 ໜອງ, ຕາມຄັນຄູໜອງລາວ ໄດ້ປູກຕົ້ນພ້າວ ຈໍານວນ 1,000 ຕົ້ນ.ນອກຈາກນັ້ນ, ມີອ່າງເພາະພັນປາ ຈໍານວນ 40 ອ່າງ, ມີຫ້ອງການ 1 ຫຼັງ, ເຮືອນພັກ 1 ຫຼັງ ເປັນບ່ອນພັກຂອງຄົນງານ ຈໍານວນ 10 ຄົນ (ຊຶ່ງເປັນປະຊາຊົນພາຍໃນບ້ານຊົນລະວຽງ).
ທ່ານ ຄໍາຈັນ ໄຊສົມບັດໄດ້ປ່ອຍປາ ທັງໝົດ 17 ຊະນິດ, ມີຈໍານວນ 1,307,000 ໂຕ ຄື: ປາເຄິງ 50 ພັນໂຕ, ປາເພຍ 150,000 ໂຕ, ປາພອນ 70,000 ໂຕ, ປາປື່ງ 50,000 ໂຕ, ປາຕອງ 10,000 ໂຕ, ປາຫວ່າ 5,000 ໂຕ, ປາໂຈກ 2,000 ໂຕ, ປາກົດ 50,000 ໂຕ, ປາຍອນ 50,000 ໂຕ, ປາສ້ອຍ 100,000 ໂຕ,ປາປາກ 100,000 ໂຕ, ປາຄໍ່ 50,000 ໂຕ, ປາເຂັງ 100,000 ໂຕ, ປາດຸກ 200,000 ໂຕ, ປານິນ 100,000 ໂຕ, ປາເຈລະມິດ 20,000 ໂຕ, ປາສະຫວາຍ 200,000 ໂຕ. ພ້ອມນັ້ນຍັງສາມາດປະສົມພັນປາໄດ້ 8 ຊະນິດຄື: ປາເຄິງ, ປາຊວາຍ, ປາເອີນ, ປາພອນ, ປາປາກ, ປາກົດ, ປາຍອນ, ປາດຸກ ຈໍານວນທັງໝົດ 400,000 ກວ່າໂຕ.
ໃນຊຸມປີຜ່ານມາ, ທ່ານ ຄໍາຈັນ ໄຊສົມບັດສາມາດຈໍາໜ່າຍປາອອກສູ່ຕະຫຼາດ ສ້າງລາຍຮັບໄດ້ທັງໝົດ 750 ລ້ານກີບ, (ໃນນັ້ນຂາຍປານິນ ຈໍານວນ 12 ໂຕນ ມູນຄ່າ 600 ລ້ານກີບ, ຂາຍລູກປານ້ອຍ 300,000ໂຕ ມູນຄ່າ 150 ລ້ານກີບ) ແລະ ໄດ້ເກັບໄວ້ເປັນພໍ່ພັນ-ແມ່ພັນ ເພື່ອຜະລິດລູກປາລ້ຽງຕໍ່ໄປອີກຈໍານວນໜຶ່ງ; ໃນການຈໍາໜ່າຍແມ່ນມີແມ່ຄ້າມາຮັບຊື້ກັບທີ່ ແລະ ສົ່ງຕາມການສັ່ງຈອງ ຕາມທ້ອງຕະຫຼາດພາຍໃນເມືອງ - ແຂວງ ແລະ ຕ່າງແຂວງ.
ໃນຊຸມປີຕໍ່ໜ້ານີ້,ຈະຂະຫຍາຍການເພາະພັນລູກປາໜ່າຍ ແລະ ເອົາໄວ້ລ້ຽງເອງ,ສ້າງອ່າງບໍາບັດນໍ້າ, ສ້າງໜອງປາຕື່ມອີກຈໍານວນ 30 ໜອງ, ຊອກຫາແຫຼ່ງວັດຖຸດິບ ແລະ ເຄື່ອງຈັກທີ່ຈະນໍາມາຜະລິດຫົວອາຫານລ້ຽງປາ ເພື່ອເປັນການຫຼຸດຜ່ອນຕົ້ນທຶນໃນການຜະລິດ ຊຶ່ງຈະນໍາໃຊ້ທຶນປະມານ 15.8 ຕື້ກີບ. ທັງນີ້,ກໍເພື່ອໃຫ້ສາມາດສະໜອງລູກປາ,ສົ່ງປາໃຫ້ພຽງພໍກັບຄວາມຕ້ອງການຂອງຕະຫຼາດ,ສ້າງວຽກເຮັດງານທໍາໃຫ້ກັບປະຊາຊົນພາຍໃນບ້ານ ຊຶ່ງເປັນການປະກອບສ່ວນພັດທະນາເສດຖະກິດຂອງເມືອງໂຂງໃຫ້ມີບາດກ້າວຂະຫຍາຍຕົວດີຂຶ້ນ.
ຄໍາເຫັນ