ສພອ ແລະ ສູນຝຶກວິຊາຊີບຄົນຫູໜວກມືແຫ່ງຄວາມຫວັງ ເຊັນ​ສັນ​ຍາ​ການ​ຮ່ວມ​ມື

ຈຸດປະສົງຂອງການຮ່ວມມື ຂອງສອງຝ່າຍ ດັ່ງນີ້: ໂດຍມີຈຸດປະສົງອຳນວຍຄວາມສະດວກໃນການພົວພັນຮວມມືຂອງສອງສະຖາບັນໂດຍສະເພາະແມ່ນການປະສານງານທາງດ້ານຫຼັກການວິຊາການ;ເປັນບ່ອນອີງໃນການຈັດຕັ້ງປະຕິບັດ ໃນການສ້າງຄວາມເຂັ້ມແຂງໃຫ້ແກ່ການຝຶກອົບຮົມ, ການຮຽນ-ການສອນ ທີ່ເປັນມິດຕໍ່ນັກຮຽນຫູໜວກໃຫ້ມີປະສິດຕິພາບ ປະສິດຕິຜົນ; ຂະຫຍາຍໂອກາດໃຫ້ກຸ່ມເປົ້າໝາຍໂດຍສະເພາະຄົນຫູໜວກເຂົ້າເຖິງການຝຶກທັກສະວິຊາຊີບ ໃຫ້ເພີ່ມຂຶ້ນ ຢ່າງເທົ່າ ທຽມ ແລະ ທົ່ວເຖິງ; ສົ່ງເສີມການຮັບຮູ້ ແລະ ການມີສ່ວນຮ່ວມຂອງສັງຄົມ ຜ່ານການຈັດກິດຈະກຳ ປະຊາສໍາພັນ ແລະ ການມີສ່ວນຮ່ວມຂອງຊຸມຊົນ.

ສຳລັບຂອບເຂດການຮ່ວມມື ເພື່ອໃຫ້ບັນລຸຈຸດປະສົງ ທັງສອງຝ່າຍໄດ້ຮ່ວມມືກັນໃນການກຳນົດຂອບເຂດການຈັດຕັ້ງປະຕິບັດ ກິດຈະກໍາດັ່ງນີ້: ພັດທະນາຫຼັກສຸດ ແລະ ສືການຮຽນ-ການ ສອນ ສອດຄ່ອງ ກັບ ມາດຕະຖານອາຊີບ ເພື່ອສະໜອງໃຫ້ແກ່ການຈັດຕັ້ງປະຕິບັດຫຼັກສູດວິຊາຊີບຄົນຫູໜວກ; ກໍສ້າງ ແລະ ຝຶກອົບຮົມຄູ ເພື່ອສະໜອງໃຫ້ແກ່ການຈັດການຮຽນ-ການສອນ ສໍາລັບຄົນຫູໝວກ; ຈັດຝຶກອົບຮົມວິຊາຊີບໃນຂະແໜງຕ່າງໆ ທີ່ເໝາະສົມ ແລະ ຕາມຄວາມຮຽກຮ້ອງຕ້ອງການ; ແລກປ່ຽນບົດຮຽນທາງດ້ານວິຊາການລະຫວ່າງຄູ-ອາຈານ, ນັກສຶກສາກ່ຽວກັບການຮຽນ-ການສອນ ແລະ ນັກວິຊາການ ເພື່ອຝຶກອົບຮົມບຸກຄະລາກອນ ທາງວິຊາສະເພາະ ແລະ ດ້ານວິຊາຄູ ກ່ຽວກັບວຽກງານອາຊີວະສຶກສາ,ສ້າງນະວັດຕະກຳ ແລະ ການບໍລິການທາງດ້ານວິຊາການໃຫ້ແກ່ສັງຄົມ.

ຄວາມຮັບຜິດຊອບຂອງ ສູນຝຶກວິຊາຊີບຄົນຫູໜວກ ມືແຫ່ງ ຄວາມຫວັງ (HOH) ແມ່ນວາງແຜນຈັດຕັ້ງ ແລະ ດໍາເນີນການສອນ, ການຝຶກອາຊີບສໍາລັບຄົນຫູໜວກ ດ້ວຍການໃຊ້ພາສາມື ແລະ ວິທີການຮຽນຮູ້ຜ່ານຮູບພາບ; ຮັບນັກຮຽນຫູໜວກເຂົ້າຮຽນ ແລະ ສະໜອງການຊ່ວຍເຫຼືອທີ່ຈຳເປັນ ເຊັ່ນ ການໃຫ້ຄໍາປຶກສາ, ການແນະນໍາ ແລະ ສະໜັບສະໜູນການຮຽນຈົນຈົບຫຼັກສູດ;ຈັດການຮຽນ-ການສອນ ເພື່ອພັດທະນາທັກສະອາຊີບ ແລະ ການກະກຽມຄວາມພ້ອມໃນການຝຶກງານ ແລະ ການມີວຽກເຮັດ; ຕິດຕາມຄວາມຄືບໜ້າຂອງນັກຮຽນ, ບັນທຶກ ແລະ ລາຍງານກິດຈະກຳ ໃຫ້ສະຖາບັນພັດທະນາອາຊີວະສຶກສາ ແລະ ພາກສ່ວນທີ່ກ່ຽວຂ້ອງ; ມີສ່ວນຮ່ວມໃນການພັດທະນາຫຼັກສູດ ໂດຍໃຫ້ຂໍ້ມູນປະສົບການຈາກການປະຕິບັດຈິງ;ຈັດກິດຈະກຳປູກຈິດສໍານຶກເຊັ່ນ:ຈັດເທດສະການ,ການສະແດງທັກສະ ແລະ ເວີກຊັອບເປີດ ເພື່ອສະແດງຄວາມຮູ້, ຄວາມສາມາດຂອງນັກຮຽນຄົນຫູ ໜວກ; ຂົນຂວາຍງົບປະມານ ເພື່ອຈັດຕັ້ງປະຕິບັດກິດຈະກຳຕ່າງໆ ໃຫ້ບັນລຸຈຸດປະສົງທີ່ວາງໄວ້.

ຄວາມຮັບຜິດຊອບຂອງສະຖາບັນພັດທະນາອາຊີວະສຶກສາ (VEDI) ແມ່ນພັດທະນາຫຼັກສູດ ແລະ ສື່ການຮຽນ-ການສອນ ສໍາລັບການສຶກສາອາຊີວະສຶກສາທີ່ເປັນມິດສໍາລັບຄົນຫູໜວກ; ໃຫ້ຄໍາແນະນໍາທາງວິຊາການເພື່ອໃຫ້ການຈັດຕັ້ງປະຕິບັດຫຼັກສູດຂອງສູນຝຶກວິຊາຊີບຄົນຫູໜວກມືແຫ່ງຄວາມຫວັງສອດຄ່ອງກັບນິຕິກຳຂອງກະຊວງສຶກສາທິການ ແລະ ກິລາວາງອອກ; ກໍ່ສ້າງ ແລະ ຝຶກອົບຮົມຄູ ເພື່ອພັດທະນາຄວາມຮູ້, ທັກສະ ແລະ ຄຸນສົມບັດ ໃຫ້ກັບຄູຝຶກ ແລະ ພະນັກງານ ສູນຝຶກວິຊາຊີບຄົນຫູໜວກ ມືແຫ່ງຄວາມຫວັງ; ຊ່ວຍໃນການປະເມີນຜົນ ແລະ ການປະກັນຄຸນນະພາບ ໂດຍການກວດກາຜົນການດໍາກິດຈະກຳ ແລະ ໃຫ້ຄໍາແນະນໍາເພື່ອປັບປຸງ; ສະໜັບສະໜູນໃນການໂຄສະນາ ແລະ ສົ່ງເສີມການຮັບຮູ້ຂອງກິດຈະກຳໃນລະດັບຊາດ ພ້ອມກັບຜັກດັນນະໂຍບາຍການສຶກສາອາຊີວະສຶກສາສໍາລັບຄົນຫູໜວກທີ່ເປັນມິດ; ຊ່ວຍສູນຝຶກວິຊາຊີບຄົນຫູໜວກ ມືແຫ່ງຄວາມຫວັງ ໃນການລະດົມຊັບພະຍາກອນ ແລະ ການສ້າງຄວາມຮ່ວມມື ເພື່ອເສີມສ້າງຄວາມຍືນຍົງໃນລະຍະຍາວ.

ຂ່າວ-ພາບ:ບຸນຕອມ.