ຄອສພ ຈັດກອງປະຊຸມສະຫຼຸບວຽກງານກວດກາ ປະຈໍາປີ 2023

ຄະນະໂຄສະນາອົບຮົມສູນກາງພັກ (ຄອສພ) ໄດ້ຈັດກອງປະຊຸມສະຫຼຸບວຽກງານກວດກາ ປະຈໍາປີ 2023 ແລະ ທິດທາງວຽກງານ ປະຈໍາປີ 2024 ໃນວັນທີ 23 ພຶດສະພາ ນີ້ ທີ່ຫ້ອງປະຊຸມໃຫຍ່ ຄອສພ ໂດຍການເປັນປະທານຮ່ວມຂອງ ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກເລຂາຄະນະພັກຫົວໜ້າ ຄອສພ ປະທານສະພາທິດສະດີສູນກາງພັກ, ສະຫາຍ ນາງ ວິລະວອນ ພັນທະວົງ ຄະນະປະຈໍາພັກປະທານກວດກາ ຮອງຫົວໜ້າ ຄອສພ ແລະ ສະຫາຍ ສຸກຄຳເພັດ ເຮືອງບຸດສີ ຮອງປະທານຄະນະກວດກາສູນກາງພັກ; ມີບັນດາສະຫາຍຄະນະພັກຂອງບັນດາກົມພາຍໃນ ຄອສພ ພ້ອມດ້ວຍພະນັກງານກ່ຽວຂ້ອງເຂົ້າຮ່ວມ.
    ສະຫາຍ ນາງ ອໍາພອນ ເຮືອງຄໍາ ຮອງຫົວໜ້າກົມກວດກາ ຄອສພ ໄດ້ຕາງໜ້າຂຶ້ນຜ່ານບົດສະຫຼຸບຕີລາຄາການເຄື່ອນໄຫວວຽກງານກວດກາ ປະຈໍາປີ 2023 ແລະ ທິດທາງ ປະຈໍາປີ 2024 ໃຫ້ຮູ້ວ່າ: ໃນໄລຍະປີ 2023, ຄະນະກວດກາ ຄອສພ ໄດ້ຈັດຕັ້ງເຜີຍແຜ່ນິຕິກຳ ແລະ ບົດໂອ້ລົມຕ່າງໆ ທີ່ກ່ຽວຂ້ອງ ຊຶ່ງເປັນການຄົ້ນຄວ້າເຊື່ອມຊຶມກ່ຽວກັບວຽກງານກວດກາ; ໄດ້ຕິດຕາມ, ກວດກາພັກ - ກວດກາລັດຢ່າງໃກ້ຊິດ ໂດຍສະເພາະການຕິດຕາມ, ກວດກາການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ Vຂອງອົງຄະນະພັກ ຄອສພ, ການຈັດຕັ້ງປະຕິບັດກົດລະບຽບຂອງພັກ ສະໄໝທີ XI, ບັນດາມະຕິ, ຄໍາສັ່ງ, ຂໍ້ກຳນົດຂອງຂັ້ນເທິງຢູ່ບັນດາໜ່ວຍພັກ, ສະມາຊິກພັກເປັນປົກກະຕິ. ຄອສພ ມີ 10 ໜ່ວຍພັກ (ໃນນີ້ 1 ໜ່ວຍພັກ ແມ່ນໜ່ວຍພັກທີ່ມີສະມາຊິກພັກ ທີ່ພັກການ-ຮັບອຸດໜູນບໍານານ); ສະມາຊິກພັກທັງໝົດ 233 ສະຫາຍຍິງ 103 ສະຫາຍ, ສຳຮອງ 5 ສະຫາຍຍິງ 2 ສະຫາຍ, ສະມາຊິກພັກບໍານານ 58 ສະຫາຍຍິງ 20 ສະຫາຍ ທຽບໃສ່ປີ 2022  ເພີ່ມຂຶ້ນ 31 ສະຫາຍຍິງ 14 ສະຫາຍ ຊຶ່ງປີຜ່ານມາ ບໍ່ມີຄະນະໜ່ວຍພັກ-ສະມາຊິກພັກໃດ ທີ່ຜິດລະບຽບ ແລະ ຖືກປະຕິບັດລະບຽບວິໄນ. ນອກນີ້, ຄະນະກວດກາ ຄອສພ ຍັງໄດ້ຕິດຕາມ, ກວດກາການບໍລິຫານລັດ. ສຳລັບປີ 2024, ຄະນະກວດກາ ຄອສພ ຈະສືບຕໍ່ຈັດຕັ້ງປະຕິບັດວຽກງານແຕ່ລະດ້ານຂອງວຽກງານກວດກາ ໃຫ້ມີຜົນສຳເລັດເປັນກ້າວໆ.
    ກອງປະຊຸມຄັ້ງນີ້, ຍັງໄດ້ຈັດໃຫ້ມີການເຜີຍແຜ່ຄໍາແນະນໍາ ສະບັບເລກທີ 331/ອກຫລ, ລົງວັນທີ 30 ຕຸລາ 2023 ການຈັດຕັ້ງປະຕິບັດກົດໝາຍ ວ່າດ້ວຍການກວດກາລັດ (ສະບັບປັບປຸງ); ຄໍາສັ່ງແນະນໍາ ສະບັບເລກທີ 379/ຄກສພ, ລົງວັນທີ 7 ພະຈິກ 2023 ກ່ຽວກັບການປັບປຸງການຈັດຕັ້ງຄະນະກວດກາພັກ ແລະ ອົງການກວດກາລັດແຕ່ລະຂັ້ນ; ບົດລາຍງານຫຍໍ້ ການເຄື່ອນໄຫວຈັດຕັ້ງປະຕິບັດວຽກງານກວດກາ ໃນໄລຍະຜ່ານມາ ແລະ ທິດທາງວຽກງານຈຸດສຸມ ປີ 2024 ຂອງຄະນະກວດກາສູນກາງພັກ; ບົດໂອ້ລົມຂອງສະຫາຍ ຄໍາພັນ ພົມມະທັດ ກຳມະການກົມການເມືອງສູນກາງພັກຄະນະເລຂາທິການສູນກາງພັກປະທານຄະນະກວດກາສູນກາງພັກ ອົງການກວດກາແຫ່ງລັດ ແລະ ຕ້ານການສໍ້ລາດບັງຫຼວງ ຕໍ່ກອງປະຊຸມວຽກງານກວດກາທົ່ວປະເທດ ປະຈໍາປີ 2023. ພ້ອມນີ້, ກໍໄດ້ຈັດໃຫ້ມີການແນະນໍາ ວິທີການປ້ອນຂໍ້ມູນເຂົ້າກ່ອງຄໍາຄິດ-ຄໍາເຫັນ ແລະ ຜ່ານລະບົບອອນລາຍ.
    ໂອກາດເຂົ້າຮ່ວມກອງປະຊຸມ, ສະຫາຍ ສຸກຄຳເພັດ ເຮືອງບຸດສີ ກໍໄດ້ມີຄໍາເຫັນແລກປ່ຽນຕໍ່ກັບການເຄື່ອນໄຫວວຽກງານກວດກາ ພ້ອມທັງສະເໜີໃຫ້ຄະນະກວດກາພາຍໃນໜ່ວຍພັກ ຂອງແຕ່ລະກົມ ກຳແໜ້ນວຽກງານກວດກາຢ່າງໜັກແໜ້ນ ເພື່ອສາມາດເຄື່ອນໄຫວວຽກງານກວດກາໄດ້ຢ່າງດີ; ຕິດຕາມ, ກວດກາ ການຈັດຕັ້ງຜັນຂະຫາຍມະຕິXIຂອງພັກ ແລະ ມະຕິກອງປະຊຸມໃຫຍ່ ຄັ້ງທີ Vຂອງອົງຄະນະພັກ ຄອສພ, ການຈັດຕັ້ງປະຕິບັດກົດລະບຽບຂອງພັກ ສະໄໝທີ XIຂອງຄະນະພັກ, ສະມາຊິກພັກ ແລະ ບັນດານິຕິກຳຕ່າງໆ ກໍຄືກວດກາພັກ, ກວດກາລັດ, ສະກັດກັ້ນ ແລະ ຕ້ານການສໍ້ລາດບັງຫຼວງ, ວຽກງານແກ້ໄຂຄໍາຮ້ອງ-ຄໍາສະເໜີ.
(ຂ່າວ-ພາບ: ສຸກສະຫວັນ)