ຂ່າວຕ່າງປະເທດລາຍງານ ໃນວັນທີ 23 ພະຈິກ ຜ່ານມາ, ອີງຕາມຜົນການສຳຫຼວດສະແດງໃຫ້ເຫັນວ່າ: ຄວາມເຊື່ອໝັ້ນການເຮັດທຸລະກິດຢູ່ມາເລເຊຍໄດ້ເພີ່ມຂຶ້ນ 3,2% ໃນໄຕມາດ 4 ນີ້. ສົ່ງຜົນໃຫ້ການເຮັດທຸລະກິດສືບຕໍ່ຂະຫຍາຍຕົວ.
ກົມສະຖິຕິມາເລເຊຍໄດ້ລະບຸໃນແຈ້ງການວ່າ: ຄວາມຫວັງການເຮັດທຸລະກິດຢູ່ມາເລເຊຍໃນໄຕມາດ 4 ແມ່ນມີສະພາບການດີທີ່ສຸດ. ໂຕຊີ້ບອກຄວາມໝັ້ນໃຈໄດ້ເພີ່ມຂຶ້ນ ຈາກ 0,7% ໃນໄຕມາດທີ 3. ອີງຕາມຂ້ໍມູນຈາກກົມສະຖິຕິໃຫ້ຮູ້ວ່າ: ການບໍລິການ, ອຸດສາຫະກຳ ແລະ ການກໍ່ສ້າງແມ່ນສາມຂະແໜງການແຫ່ງຄວາມຫວັງຂອງສະພາບການເຮັດທຸລະກິດດີທີ່ສຸດໃນໄຕມາດ 4.
ຄວາມເຊື່ອໝັ້ນການເຮັດທຸລະກິດຢູ່ໃນຂະແໜງການບໍລິການຍັງຢູ່ໃນທິດທາງບວກດ້ວຍໂຕຊີ້ບອກຄວາມໝັ້ນໃຈໄດ້ເພີ່ມຂຶ້ນເປັນ 6,3% ເມື່ອທຽບກັບໄຕມາດ 3 ທີ່ເພີ່ມຂຶ້ນ 6,1%. ສ່ວນຂະແໜງການອຸດສາຫະກຳຍັງສືບຕໍ່ໃນທິດທາງທີ່ດີສຳລັບການເຮັດທຸລະກິດ. ດ້ວຍໂຕຊີ້ບອກຄວາມໝັ້ນໃຈແມ່ນ 4% ສຳລັບໄຕມາດ 4 ເມື່ອສົມທຽບກັບໄຕມາດ 3 ແມ່ນ 1,3%. ຄວາມເຊື່ອໝັ້ນໃນຂະແໜງການກໍ່ສ້າງໄດ້ພິກຟື້ນໄປໃນທິດທາງທີ່ດີເປັນຄັ້ງທຳອິດນັບແຕ່ໄຕມາດໜຶ່ງຂອງປີ 2018 ເປັນຕົ້ນມາໄດ້ເພີ່ມຂຶ້ນ 1,7% ເມື່ອທຽບກັບໄຕມາດ 3 ແມ່ນ -26,9%.
ເຖິງຢ່າງໃດກໍຕາມ, ການເຮັດທຸລະກິດໃນຂະແໜງການຄ້າຂາຍຍ່ອຍ ແລະ ຂາຍຍົກນັ້ນຄາດຄະເນວ່າການເຮັດທຸລະກິດຍັງເປັນໄປໃນທິດທາງທີ່ບໍ່ຄ່ອຍດີ, ດ້ວຍໂຕຊີ້ບອກຄວາມໝັ້ນໃຈໃນໄຕມາດ 4 ແມ່ນ -3,6% ເມື່ອທຽບກັບ -1,5% ຂອງໄຕມາດ 3.
ຄໍາເຫັນ