ທ່ານ ພົມມີ ອິນທິຈັກ ຮອງຫົວໜ້າກົມແຜນການ ແລະ ການຮ່ວມມື ກະຊວງກະສິກໍາ ແລະ ສິ່ງແວດລ້ອມຂອງ ສປປ ລາວ ໄດ້ໃຫ້ຮູ້ວ່າ: “ເຄືອຂ່າຍທຸລະກິດກະສິກໍາ GMS ຊຶ່ງຈະໄດ້ຮັບການສ້າງຕັ້ງຂຶ້ນໂດຍການປະສານງານກັບສະພາທຸລະກິດ GMS ຈະເປັນເວທີສໍາລັບການສົນທະນາລະຫວ່າງພາກລັດ ແລະ ພາກເອກະຊົນດ້ານທຸລະກິດກະສິກໍາ ແລະ ນະໂຍບາຍທີ່ສອດຄ່ອງກັນ ແລະ ມີຄວາມກົມກຽວກັນຫຼາຍຂຶ້ນໃນທົ່ວອະນຸພາກພື້ນ”.
ເຄືອຂ່າຍທຸລະກິດກະສິກໍາໄດ້ຖືກເປີດຕົວໃນກອງປະຊຸມປຶກສາຫາລືກ່ຽວກັບຂະແໜງທຸລະກິດກະສິກຳໃນອະນຸພາກພື້ນແມ່ນໍ້າຂອງ ຊຶ່ງໄດ້ຈັດຂຶ້ນໃນລະຫວ່າງວັນທີ 25-26 ພຶດສະພາ 2026 ທີ່ນະຄອນຫຼວງວຽງຈັນ. ກອງປະຊຸມໄດ້ຈັດຂຶ້ນໂດຍການສະໜັບສະໜູນຈາກທະນາຄານພັດທະນາອາຊີ ຫຼື(ADB) ພາຍໃຕ້ແຜນງານ ແລະ ໂຄງການຊ່ວຍເຫຼືອທາງດ້ານວິຊາການດ້ານກະສິກໍາທີ່ຍືນຍົງ ແລະ ຄວາມໝັ້ນຄົງດ້ານສະບຽງອາຫານໃນອະນຸພາກພື້ນແມ່ນໍ້າຂອງ.
ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກໍາແຫ່ງຊາດລາວ ໄດ້ໃຫ້ຮູ້ວ່າ: ຂໍ້ລິເລີ່ມດັ່ງກ່າວນັ້ນສະໜັບສະໜູນການຈັດຕັ້ງຂອບຍຸດທະສາດຄຸນໝິງ 2030 ເພື່ອການຫັນປ່ຽນລະບົບອາຫານກະສິກຳໃນອະນູພາກພື້ນແມ່ນໍ້າຂອງ ຊຶ່ງໄດ້ກໍານົດແນວທາງສໍາລັບການຫັນປ່ຽນການຄ້າດ້ານອາຫານກະສິິກຳໃຫ້ເປັນແຮງຂັບເຄື່ອນທາງເສດຖະກິດທີ່ສໍາຄັນ. ພ້ອມກັນນັ້ນ ຂໍ້ລິເລີ່ມນີ້ຍັງສອດ ຄ່ອງກັບຍຸດທະສາດ GMS ວ່າດ້ວຍການມີສ່ວນຮ່ວມຂອງພາກເອກະຊົນທີ່ໄດ້ຮັບການຮັບຮອງຈາກລັດຖະມົນຕີ GMS ໃນປີ 2025 ເພື່ອສົ່ງເສີມການສົນທະນາລະຫວ່າງພາກລັດ ແລະ ພາກເອກະຊົນໃຫ້ມີໂຄງສ້າງ ແລະ ມີປະສິດຕິພາບຫຼາຍຂຶ້ນໃນທົ່ວອະນຸພາກພື້ນ.
ກອງປະຊຸມປຶກສາຫາລືດັ່ງກ່າວ ຊຶ່ງມີຜູ້ເຂົ້າຮ່ວມຕາງໜ້າຈາກບັນດາປະເທດອະນຸພາກພື້ນແມ່ນ້ຳຂອງຈາກ ສປປ ລາວ, ກຳປູເຈຍ, ມຽນມາ, ໄທ, ຫວຽດນາມ, ແລະ ແຂວງຢຸນນານ ແລະ ເຂດປົກຄອງຕົນເອງກວາງຊີ ຂອງ ສປ ຈີນ ໄດ້ສົນທະນາປຶກສາຫາລືກັນກ່ຽວກັບແນວທາງແກ້ໄຂສິ່ງທ້າທາຍທີ່ມີມາດົນນານໃນພາກພື້ນ ນັ້ນກໍຄືຄວາມບໍ່ສອດຄ່ອງລະຫວ່າງນະໂຍບາຍພາກລັດ ແລະ ສະພາບຄວາມ ເປັນຈິງຂອງພາກເອກະຊົນໃນຂະແໜງທຸລະກິດກະສິກໍາ. ການສົນທະນາໄດ້ສຸມໃສ່ບັນຫາຄວາມບໍ່ສອດ ຄ່ອງຂອງນະໂຍບາຍທີ່ຍັງຄົງມີຢູ່, ລະບົບການຄ້າຂ້າມຊາຍແດນທີ່ກະແຈກກະຈາຍ ແລະ ພ້ອມທັງຕົວແທນຈາກພາກເອກະຊົນທີ່ຈໍາກັດໃນຂະບວນການສ້າງນະໂຍບາຍ ຊຶ່ງບັນຫາເຫຼົ່ານີ້ຍັງຄົງສືບຕໍ່ສ້າງຄວາມບໍ່ມີປະສິດທິຜົນໃນທົ່ວຂະແໜງອາຫານກະສິກຳຊຶ່ງສົ່ງຜົນກະທົບຕໍ່ການຄ້າ, ໂລຈິສຕິກ ແລະ ການຕັດສິນໃຈໃນການລົງທຶນ.
ຜູ້ເຂົ້າຮ່ວມກອງປະຊຸມໄດ້ຍົກປະເດັນສິ່ງທ້າທາຍທີ່ພາກພື້ນພວມປະເຊີນ ລວມເຖິງການປະຕິບັດຕາມມາດຕະຖານສາກົນທີ່ມີການພັດທະນາຢ່າງຕໍ່ເນື່ອງ, ການເຂົ້າຮ່ວມໃນຕະຫຼາດກາກບອນ, ແລະ ຄວາມຈໍາເປັນໃນກາຮັັດແຄບຊ່ອງວ່າງທາງດ້ານການເງິນທີ່ສຳຄັນ ສຳລັບວິສາຫະກິດຂະໜາດນ້ອຍ ແລະ ກາງໃນຂະແໜງກະສິກຳ. ການສົນທະນາໄດ້ເນັ້ນຢ້ຳເຖິງຄວາມສໍາຄັນຂອງການດໍາເນີນງານຮ່ວມກັນໃນລະດັບພາກພື້ນ ແລະ ການແລກປ່ຽນຄວາມຮູ້ ເພື່ອຮັບມືກັບສິ່ງທ້າທາຍໃໝ່ໆເຫຼົ່ານີ້ໄດ້ຢ່າງມີປະສິດທິຜົນ.
ທ່ານ ນາງ ແຊນນີ ແຄັມເບວ ຫົວໜ້າຫ້ອງການ ADB ປະຈຳ ສປປ ລາວ ໄດ້ໃຫ້ຮູ້ວ່າ: “ດ້ວຍການຮັບຮູ້ເຖິງຊ່ອງວ່າງທາງດ້ານການເງິນທີ່ສຳຄັນໃນຂະແໜງອາຫານກະສິກຳຂອງພາກພື້ນ, ADB ຈຶ່ງຊ່ວຍແກ້ໄຂບັນຫາຊ່ອງວ່າງທາງການເງິນດັ່ງກ່າວ ດ້ວຍເຄື່ອງມືທາງການເງິນທີ່ມີຢູ່ສໍາລັບພາກເອກະຊົນໃນນັ້ນລວມມີ ກອງທຶນ ADB Ventures, ໂຄງການສະໜອງທຶນເພື່ອການຄ້າ ແລະ ຕ່ອງໂສ້ການສະໜອງຂອງ ADB (ADB Trade and Supply Chain Finance Program), ແລະ ກອງທຶນ ADB Frontier”.
ຜູ້ເຂົ້າຮ່ວມກອງປະຊຸມຍັງໄດ້ປຶກສາຫາລື ກ່ຽວກັບກົນໄກໃນການຫຼຸດຜ່ອນການຄ້າ ທີ່ກະແຈກກະຈາຍ, ປັບປຸງການໄຫຼວຽນຂອງຂໍ້ມູນຂ່າວສານ, ແລະ ສ້າງຄວາມໄວ້ວາງໃຈ ແລະ ຄວາມຮ່ວມມືໃຫ້ເຂັ້ມແຂງຍິ່ງຂຶ້ນໃນລະຫວ່າງທຸລະກິດກະສິກໍາທົ່ວທຸກປະເທດອະນຸພາກພື້ນແມ່ນໍ້າຂອງ ໂດຍສຸມໃສ່ການສ້າງກົນໄກການປຶກສາຫາລືຢ່າງເປັນທາງການ ລະຫວ່າງ ກຸ່ມເຮັດວຽກດ້ານກະສິກໍາໃນອະນຸພາກພື້ນແມ່ນໍ້າຂອງ (GMS Working Group on Agriculture) ແລະ ເຄືອຂ່າຍທຸລະກິດກະສິກໍາອະນຸພາກພື້ນແມ່ນໍ້າຂອງ(GMS Agribusiness Network) ເພື່ອນໍາເອົາຄວາມເຫັນ ແລະ ຂໍ້ສະເໜີຈາກພາກເອກະຊົນເຂົ້າໄປໃນຂະບວນການສ້າງນະໂຍບາຍຄວບຄູ່ໄປກັບເວທີສໍາລັບການຕິດຕໍ່ລະຫວ່າງທຸລະກິດຫາທຸລະກິດທີ່ມີໂຄງສ້າງຊັດເຈນ ເພື່ອສ້າງຄວາມເຂັ້ມແຂງແກ່ການເຊື່ອມໂຍງຕ່ອງໂສ້ການສະໜອງຂ້າມຊາຍແດນ, ອໍານວຍຄວາມສະດວກແກ່ຄວາມຮ່ວມມື ແລະ ແກ້ໄຂອຸປະສັກອຸດຕັນທາງການຄ້າ.
ກອງປະຊຸມໄດ້ອັດລົງດ້ວຍການບັນລຸຂໍ້ຕົກລົງກ່ຽວກັບແຜນປະຕິບັດງານເບື້ອງຕົ້ນ ແລະ ທິດທາງແຜນການໃນຕໍ່ໜ້າ ເພື່ອປະຕິບັດງານ ເຄືອຂ່າຍທຸລະກິດກະສິກຳ GMS, ລວມທັງການກຳນົດໂຄງສ້າງການປົກຄອງບໍລິຫານເຄືອຂ່າຍ, ບຸລິມະສິດດ້ານການດໍາເນີນງານ, ແລະ ຂໍ້ລິເລີ່ມໃນໄລຍະເລີ່ມຕົ້ນ. ຜົນສໍາເລັດດັ່ງກ່າວນັບເປັນຂີດໝາຍສໍາຄັນໃນການຂັບເຄື່ອນວິໄສທັດ GMS 2030 ສໍາລັບລະບົບອາຫານກະສິກຳທີ່ຍືນຍົງ, ທົນທານ ແລະ ທົ່ວເຖິງ ໂດຍມີພື້ນຖານການເຊື່ອມໂຍງພາກພື້ນທີ່ເຂັ້ມແຂງຂຶ້ນ, ການມີສ່ວນຮ່ວມຂອງພາກເອກະຊົນທີ່ຫຼາຍຂຶ້ນ, ແລະ ການເຂົ້າເຖິງແຫຼ່ງທຶນທີ່ໄດ້ຮັບການປັບປຸງດີຂຶ້ນ.
ອະນຸພາກພື້ນແມ່ນ້ຳຂອງປະກອບດ້ວຍ ກຳປູເຈຍ, ສປ ຈີນ (ແຂວງຢຸນນານ ແລະ ເຂດປົກຄອງຕົນເອງກວາງຊີ), ສປປ ລາວ, ມຽນມາ, ໄທ ແລະ ຫວຽດນາມ. ໃນປີ 1992, ໂດຍໄດ້ຮັບການສະໜັບສະໜູນຈາກ ADB ແລະ ບົນພື້ນຖານປະຫວັດສາດ ແລະ ວັດທະນະທໍາທີ່ມີຮ່ວມກັນ, ທັງຫົກປະເທດໃນ GMS ໄດ້ເປີດຕົວແຜນງານການຮ່ວມມືທາງເສດຖະກິດໃນອະນຸພາກພື້ນ ຫຼື ແຜນງານ GMS ເພື່ອເພີ່ມທະວີການພົວພັນທາງດ້ານເສດຖະກິດລະຫວ່າງກັນ. ແຜນງານ GMS ກວມເອົາຂະແໜງບຸລິມະສິດສໍາຄັນປະກອບດ້ວຍ ກະສິກໍາ, ພະລັງງານ, ສິ່ງແວດລ້ອມ, ການຮ່ວມມືດ້ານສາທາລະນະສຸກ, ການທ່ອງ ທ່ຽວ, ການຂົນສົ່ງ, ການອຳນວຍຄວາມສະດວກທາງດ້ານການຄ້າ ແລະ ການລົງທຶນ, ພ້ອມທັງການພັດທະນາເມືອງ.
(ຂ່າວ: ເອດີບີ)
ຄໍາເຫັນ