ກິດຈະກໍາວັນແຫ່ງການສົນທະນາ ລະຫວ່າງອາລິຍະທຳສາກົນ

ກິດຈະກຳໃນຄັ້ງນີ້, ໄດ້ຮັບຟັງການປາຖະກະຖາຈາກຊ່ຽວຊານດ້ານວັດທະນະທຳ ລາວ-ຈີນ ໃນຫຼາຍຫົວຂໍ້ສຳຄັນ ເປັນຕົ້ນປະຫວັດວັດທະນະທຳລາວ, ປະຫວັດການສະແດງສິລະປະດົນຕີລາວ (ບົດຟ້ອນ), ເລື່ອງລາວປະເທດຈີນ “ການສືບທອດຜ່ານບົດຟ້ອນ ແລະ ການພັດທະນາບົດຟ້ອນເຈີ້ຈຽງປະເທດຈີນ”, ພ້ອມທັງໄດ້ຮັບຊົມລາຍການສະແດງສິລະປະຂອງນັກຮຽນ ຈາກວິທະຍາໄລສິລະປະແຫ່ງຊາດລາວ ແລະ ນັກສຶກສາຈາກວິທະຍາໄລວິຊາຊີບດ້ານສິລະປະແຂວງເຈີ້ຈຽງ ສປ ຈີນ ພາຍໃຕ້ຫົວຂໍ້ “ມົນສະເໜ່ການຟ້ອນພາກຕາເວັນອອກ”.

ທ່ານ ນາງ ຈຳພອນ ວົງສາ ກ່າວວ່າ: ການຈັດຕັ້ງກິດຈະກໍາໃນຄັ້ງນີ້, ເພື່ອປະກອບສ່ວນເສີມສ້າງສາຍພົວພັນມິດຕະພາບອັນເປັນມູນເຊື້ອ ກໍຄື ເປັນຂີດໝາຍອັນສໍາຄັນແຫ່ງການສ້າງຕັ້ງສາຍພົວພັນການທູດ ຄົບຮອບ 65 ປີ ແລະ ປີ 2026 ເປັນປີມິດຕະພາບລາວ-ຈີນ ໂດຍຢຶດຖືຫຼັກການສ້າງຄູ່ຮ່ວມຊາຕາກໍາລາວ-ຈີນ, ຈີນ-ລາວ, ບົນພື້ນຖານຈິດໃຈ “4 ດີ” ຄື: ເພື່ອນບ້ານທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມທີ່ດີ ຜ່ານການເຊື່ອມໂຍງທາງລົດໄຟ ລາວ-ຈີນ, ເສັ້ນທາງຄົມມະນາຄົມທາງບົກ, ທາງອາກາດ ແລະ ການແລກປ່ຽນສິລະປະ-ວັດ ທະນະທໍາຊຶ່ງກັນ ແລະ ກັນໃຫ້ເປັນຮູບປະທຳ ແລະ ມີຄວາມຫຼາກຫຼາຍຂຶ້ນເລື້ອຍໆ. ວັດທະນະທຳມີບົດບາດສຳຄັນ ແລະ ເປັນກຳລັງແຮງພື້ນຖານປະກອບສ່ວນຍູ້ດັນເຂົ້າໃນການເຕີບໂຕ ແລະ ສ້າງສາພັດທະນາເສດຖະ ກິດ-ສັງຄົມຂອງຊາດໃຫ້ມີຄວາມຍືນຍົງ. ການພັດທະນາຊຸມຊົນ ບໍ່ສາມາດປະສົບຜົນສຳເລັດໄດ້ ຖ້າຫາກພວກເຮົາລະເລີຍວັດທະນະທຳອັນລ້ຳຄ່າຂອງຕົນເອງ. ວັດທະນະທຳແມ່ນພື້ນຖານອັນສຳຄັນ ໃນການສ້າງຕັ້ງ ແລະ ຮັກສາສາຍພົວພັນມິດຕະພາບທີ່ຍືນຍົງ. ຄຽງຄູ່ກັນນັ້ນ, ກໍຕິດພັນກັບການດຳລົງຊີວິດປະຈຳວັນ ແລະ ບໍ່ສາມາດແຍກອອກຈາກວັດທະຈັກຂອງມວນມະນຸດໄດ້. ວັດທະນະທຳຍັງເປັນເຄື່ອງມືອັນສຳຄັນໃນການສົ່ງເສີມການເຊື່ອມໂຍງລະຫວ່າງປະຊາຊົນ ກັບປະຊາຊົນໃນບັນດາປະເທດໃກ້ຄຽງ ຊຶ່ງໄດ້ປະກອບສ່ວນຢ່າງແຂງແຮງເຂົ້າໃນການສ້າງຄວາມເຂົ້າໃຈ ແລະ ເສີມຂະຫຍາຍສາຍພົວພັນອັນໃກ້ຊິດ ລະຫວ່າງປະຊາຊົນໃນທົ່ວໂລກ, ການເຊື່ອມໂຍງເຊື່ອມຈອດທາງດ້ານວັດທະນະທຳ ເປັນປັດໄຈສໍາຄັນໜຶ່ງແຫ່ງການດຳລົງຄົງຕົວ ແລະ ຂະຫຍາຍຕົວຂອງອະລິ ຍະທຳຂອງປະຊາຊາດໃນໂລກ ຊຶ່ງຮຽກຮ້ອງໃຫ້ບັນດາປະເທດຕ້ອງໄດ້ເຊື່ອມໂຍງເຊື່ອມຈອດເຂົ້າກັນ, ເພີ່ມທະວີຄວາມເຂົ້າອົກເຂົ້າໃຈກັນ, ເຄົາລົບເຊິ່ງກັນ ແລະ ກັນ ແລະ ຮ່ວມມືກັນ ໃນການສ້າງໂລກແຫ່ງສັນຕິພາບ ແລະ ມີສະຖຽນລະພາບ.

ທ່ານ ໂຫຼ ເວີ້ຍ ຈ້ຽນ ໄດ້ຕາງໜ້າໃຫ້ສູນວັດທະນະທໍາຈີນ ປະຈໍາລາວ ສະແດງຄວາມນັບຖື ແລະ ຂອບໃຈມາຍັງກະຊວງ ວທ, ສູນແລກປ່ຽນວັດທະນະທໍາ ແລະ ການທ່ອງທ່ຽວຈີນ-ຕ່າງປະເທດ, ວິທະຍາໄລສິລະປະອາຊີບແຂວງເຈີ້ຈຽງ ແລະ ສະຖາບັນສິລະປະແຫ່ງຊາດລາວ ທີ່ໃຫ້ການຮ່ວມມື ແລະ ສະໜັບສະໜູນກິດຈະກໍາໃນຄັ້ງນີ້. ພ້ອມທັງຢຶນຢັນວ່າ: ໃນອະນາຄົດ ສູນວັດທະນະທຳຈີນປະຈຳ ລາວ ຈະສືບຕໍ່ຮ່ວມມືກັບກະຊວງ ວທ ແຫ່ງ ສປປ ລາວ, ສູນແລກປ່ຽນວັດທະນະທໍາຈີນ-ຕ່າງປະເທດ, ພ້ອມທັງສະຖາບັນການສຶກສາຂອງສອງປະເທດ ລາວ-ຈີນ ເພື່ອຊຸກຍູ້ໃຫ້ມີການແລກປ່ຽນການຢ້ຽມຢາມຂອງສິລະປິນ, ການສຶກສາຮຽນຮູ້ຂອງເຍົາວະຊົນ ແລະ ການຮ່ວມສ້າງສັນຜົນງານສິລະປະໃຫ້ຫຼາຍຂຶ້ນ ເຮັດໃຫ້ການຮ່ວມມືທາງວັດທະນະທໍາ ລາວ-ຈີນ ພັດທະນາຈາກການ “ໄປມາຫາສູ່ດັ່ງຍາດພີ່ນ້ອງ” ສູ່ການ“ ເປັນຄອບຄົວດຽວກັນ” ແລະ ຈາກ “ການສະແດງໄລຍະສັ້ນ” ສູ່“ການຮ່ວມເຕີບໂຕຢ່າງຍືນຍົງ”.

ຂ່າວ-ພາບ: ບຸນຕອມ+ບຸນອູ້ມ