ສະຫາຍ ພັນໂທ ສົມບູນ ສີທະນົງ ຫົວໜ້າພະແນກຈັດຕັ້ງ-ປະກອບ ກົມ ລົດຕັງ-ຍານເກາະ ໄດ້ສະຫຼຸບຕີລາຄາການຈັດຕັ້ງປະຕິບັດວຽກງານຮອບດ້ານ ໃນໄລຍະ 6 ເດືອນຜ່ານມາ, ຍົກໃຫ້ເຫັນຜົນງານພົ້ນເດັ່ນຫຼາຍດ້ານ ປິ່ນອ້ອມ 4 ໜ້າທີ່ໃຫຍ່ 26 ແຜນງານ ທີ່ກະຊວງປ້ອງກັນປະເທດວາງອອກ, ເປັນຕົ້ນ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານ-ນັກຮົບ ໄດ້ຮັບຮູ້ເຊື່ອມຊຶມ ແລະ ເຂົ້າໃຈແຈ້ງຢ່າງເລິກເຊິ່ງກ່ຽວກັບບັນດາມະຕິຕ່າງໆ ຂອງພັກ, ຂອງຊາດ, ຂອງກອງທັບ, ຂໍ້ກຳນົດ ແລະ ກົດໝາຍຂອງລັດຢ່າງເປັນປົກກະຕິ, ມີຄວາມອຸ່ນອ່ຽນທຸ່ນທ່ຽງ, ເຊື່ອໝັ້ນຕໍ່ການນຳພາຂອງພັກ-ລັດຢ່າງໜັກແໜ້ນ, ຊີ້ນຳທຸກພາກສ່ວນທີ່ກ່ຽວຂ້ອງ ເຮັດໜ້າທີ່ວຽກງານວິຊາສະເພາະຂອງຕົນດ້ວຍຄວາມຮັບຜິດຊອບສູງ, ຖືສຳຄັນວຽກງານການກຽມພ້ອມສູ້ຮົບ ແລະ ຕ້ານໄພພິບັດ, ຈັດຕັ້ງລະບົບປະຈຳການແຕ່ລະຂັ້ນຕະຫຼອດ 24 ຊົ່ວໂມງ ເພື່ອຕິດຕາມກວດກາສະພາບການຕ່າງໆ ໃນຂອບເຂດຮັບຜິດຊອບ ໃຫ້ມີຄວາມສະຫງົບປອດໄພ ແລະ ຈັດຕັ້ງປະຕິບັດຕາມແຜນການກຽມພ້ອມສູ້ຮົບໃຫ້ທັນເວລາ, ຕິດຕາມກວດກາສະພາບ ແລະ ສ້ອມແປງ, ຄຸ້ມຄອງປົກປັກຮັກສາພາຫະນະ, ອາວຸດ-ຍຸດໂທປະກອນ, ພ້ອມທັງບົວລະບັດຜັດເຊັດພາຫະນະສຳຮອງຢ່າງເປັນປົກກະຕິ ເພື່ອຮັບປະກັນໃຫ້ນໍາໃຊ້ໄດ້ຍາວນານ, ເອົາໃຈໃສ່ຕິດຕາມການຜັນແປຂອງດິນຟ້າອາກາດຢ່າງເປັນເປັນຈໍາ ເພື່ອແຈ້ງເຕືອນໃຫ້ພະນັກງານ-ນັກຮົບຍົກສູງສະຕິລະວັງຕົວ, ກຽມພ້ອມແກ້ໄຂເຫດສຸກເສີນໄພພິບັດ ທີ່ອາດຈະເກີດຂຶ້ນໃນທຸກສະພາບການ.
ກອງປະຊຸມຍັງໄດ້ວາງທິດທາງແຜນການ 6 ເດືອນທ້າຍປີ 2026 ແລະ ໄດ້ຮັບຮອງເອົາການປະກອບ ຄໍາຄິດຄໍາເຫັນຂອງບັນດາສະຫາຍທີ່ເຂົ້າຮ່ວມກອງປະຊຸມຢ່າງກົງໄປກົງມາ ເພື່ອເຮັດໃຫ້ເນື້ອໃນບົດສະຫຼຸບມີຄວາມອຸດົມສົມບູນຂຶ້ນຕື່ມ ແລະ ໄດ້ຮັບຟັງການໂອ້ລົມໃຫ້ທິດຊີ້ນຳບັນດາວຽກງານຕ່າງໆ ໂດຍປິ່ນອ້ອມການຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານ ຂອງຄະນະພັກກະຊວງປ້ອງກັນປະເທດວາງອອກຈາກປະທານກອງປະຊຸມຕື່ມອີກ.
ຂ່າວ: ສຸກສົງກາ ຫຼ້າບຸນມີ
ຄໍາເຫັນ