ກົມໃຫຍ່ຕໍາຫຼວດ ສຸມໃສ່ປ້ອງກັນກອງປະຊຸມ3RC-CCM

ທ່ານ ພັນໂທ ພັນສະໄໝ ອຸປະດີ ຮອງຫົວໝ້າຫ້ອງການ ກົມໃຫຍ່ຕໍາຫຼວດ ຄະນະຮັບຜິດຊອບຈຸປ້ອງກັນຈຸດຫໍປະຊຸມແຫ່ງຊາດ ໄດ້ໃຫ້ສໍາພາດຕໍ່ສື່ມວນຊົນໃນວັນທີ 15 ກັນຍາຜ່ານມາວ່າ: ພາຍຫຼັງໄດ້ຮັບຂໍ້ຕົກລົງຂອງກະຊວງ, ກົມໃຫຍ່ຕໍາຫຼວດ ໂດຍສະເພາະ ແມ່ນຄະນະຮັບຜິດຊອບຈຸດປ້ອງກັນຢູ່ຫໍປະຊຸມແຫ່ງຊາດ ໄດ້ນໍາກໍາລັງຂອງກົມໃຫຍ່ຕໍາຫຼວດເຂົ້າມາປ້ອງກັນ ນັບແຕ່ວັນທີ 13 ກັນຍາເປັນຕົ້ນມາ ຊຶ່ງປະກອບມີ 3 ພາກສ່ວນຄື: ກົມຕໍາຫຼວດຈະລາຈອນ ຮັບຜິດຊອບຈັດສັນຄວາມເປັນລະບຽບຮຽບຮ້ອຍໃນການເຂົ້າ-ອອກຂອງລົດ, ກົມຕໍາຫຼວດສະກັດກັ້ນ ແລະ ຕ້ານອັກຄີໄພ ຮັບຜິດຊອບກວດກາລະບົບຄວາມປອດໄພຂອງຕຶກ ແລະ ຮັບຜິດຊອບກ່ຽວກັບລະບົບຮັກສາຄວາມປອດໄພຕ່າງໆ ທາງດ້ານອັກຄີໄພ, ສ່ວນກົມຕໍາຫຼວດຝຶກແອບ ແລະ ນໍາໃຊ້ໝາວິຊາສະເພາະຮັບຜິດຊອບ ໃນການກວດກາທາດລະເບີດ, ທາດແຕກ, ສິ່ງເສບຕິດຕ່າງໆ, ຄົນທີ່ບໍ່ຫວັງດີທີ່ຈະເຂົ້າມາໃນຫໍປະຊຸມແຫ່ງຊາດ. ຜ່ານການຈັດຕັ້ງປະຕິບັດວຽກງານໃນໄລຍະຜ່ານມາ ຈົນເຖິງປັດຈຸບັນ ຖືວ່າມີຄວາມສະຫງົບປອດໄພ, ມີຄວາມເປັນລະບຽບຮຽບຮ້ອຍດີ ແລະ ກໍາລັງກົມໃຫຍ່ຕໍາຫຼວດຈະສືບຕໍ່ປ້ອງກັນຕະຫຼອດ 24 ຊົ່ວໂມງຈົນກວ່າຈະສໍາເລັດກອງປະຊຸມ.

ໂອກາດນີ້,ທ່ານ ພັນໂທ ພັນສະໄໝ ອຸປະດີ ຍັງໄດ້ຮຽກຮ້ອງໄປຍັງພະນັກງານ, ທະຫານ, ຕໍາຫຼວດ, ພໍ່ແມ່ປະຊາຊົນລາວ ຈົ່ງຮ່ວມແຮງຮ່ວມໃຈກັນໃນການເຮັດວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອເຮັດໃຫ້ກອງປະຊຸມຄັ້ງນີ້ ມີຄວາມສະຫງົບປອດໄພ ແລະ ມີຜົນສໍາເລັດຕາມລະດັບຄາດໝາຍທີ່ວາງໄວ້.