 |
ໃນພິທີ, ທ່ານ ພັທ ຄຳພຸດ ພາມຸງຄຸນ ຫົວໜ້າຫ້ອງການກົມສື່ສານ ໄດ້ຜ່ານບົດສະຫຼຸບວຽກງານປະຈຳປີ 2025 ໃຫ້ຮູ້ວ່າ: ໃນໄລຍະ 1 ປີຜ່ານມາ, ຄະນະພັກ-ຄະນະບັນຊາທຸກຂັ້ນ ໄດ້ເອົາໃຈໃສ່ສຶກສາອົບຮົມການ ເມືອງ-ແນວຄິດໃຫ້ນາຍ ແລະ ພົນຕຳຫຼວດ ພາຍໃນກົມກອງຢ່າງເປັນປົກກະຕິ ເຮັດໃຫ້ມີແນວຄິດອຸ່ນອ່ຽນທຸ່ນທ່ຽງ ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີແບບແຜນວິທີເຮັດວຽກ ແລະ ພ້ອມກັນເຮັດສໍາເລັດໜ້າທີ່ການເມືອງ ສະແດງອອກວຽກງານຫ້ອງການ ແລະ ວຽກງານວິຊາສະເພາະ ໄດ້ຍົກສູງຄຸນນະ ພາບ, ວຽກງານເປັນເສນາທິການຮັບໃຊ້ຄະນະພັກ-ຄະນະບັນຊາ ໃນການຄົ້ນຄວ້າ, ກວດກາ, ຄຸມຄອງຂໍ້ມູນຂ່າວສານ ແລະ ສ້າງແຜນການ, ຕີລາຄາ, ຄາດຄະເນສະພາບການ, ສະຫຼຼຸບສັງລວມ ພ້ອມທັງສໍານວນ-ສໍາເນົາບັນດາເອກະສານຕ່າງໆ ຕາມພາລະບົດບາດ, ສິດ ແລະ ໜ້າທີ່; ໄດ້ເຂົ້າຮ່ວມບັນດາກອງປະຊຸມຕ່າງໆ ຮ່ວມກັບກະຊວງເຕັກໂນໂລຊີ ແລະ ການສື່ສານ ກ່ຽວກັບວຽກງານການຫັນເປັນດີຈີຕອນຂອງກະຊວງ ປກສ ຈໍານວນ 8 ຄັ້ງ, ໄດ້ຈັດກອງປະຊຸມເຜີຍແຜ່ນິຕິກໍາ ຮ່ວມກັບກະຊວງເຕັກໂນໂລຊີ ແລະ ການສື່ສານ 1 ຄັ້ງ ມີຜູ້ເຂົ້າຮ່ວມ 96 ສະຫາຍ ຍິງ 16 ສະຫາຍ, ເປັນເຈົ້າການຕິດຕາມ ກວດກາເຄື່ອງອຸປະກອນສື່ສານໃຫ້ມີຄວາມຮັບປະກັນໃນການນໍາໃຊ້ ເຂົ້າໃນວຽກງານຕິດຕໍ່ສື່ສານຂອງກໍາລັງ ປກສ, ຄົ້ນຄວ້າບັນດາຄູ່ມືການນໍາໃຊ້, ການບໍາລຸງຮັກສາ, ການຕິດຕາມບັນດາເຄື່ອງຈັກອຸປະກອນເຕັກນິກ ເພື່ອອໍານວຍຄວາມສະດວກໃຫ້ການຮັບໃຊ້ຕົວຈິງ ແລະ ການນໍາໃຊ້ລະບົບເຄື່ອງຈັກ, ອຸປະກອນເຕັກນິກສື່ສານ ຂອງບັນດາກົມກອງທ້ອງຖິ່ນໃຫ້ມີຄວາມເປັນເອກະພາບ ຖືກຕ້ອງຕາມມາດຕະຖານ ມີປະສິດທິພາບສູງ, ຮັບປະກັນລະບົບການຕິດຕໍ່ສື່ສານໃຫ້ກໍາລັງ ປກສ ປະກອບມີລະບົບສູນວິທະຍຸໃນທົ່ວປະເທດ 149 ສູນ ແລະ ສາມາດຮັບປະກັນວຽກງານວິຊາສະເພາະໃນສະເພາະໜ້າ ແລະ ຍາວນານ, ໄດ້ຕິດຕັ້ງ ແລະ ສ້ອມແປງໂທລະສັບໃຫ້ກົມກອງອ້ອມຂ້າງກະຊວງຈໍານວນ 100 ເລກໝາຍ. ໃນນີ້, ຕິດຕັ້ງຈໍານວນ 12 ເລກໝາຍ, ຍົກຍ້າຍ 19 ເລກໝາຍ, ປ່ຽນໜ່ວຍໂທລະສັບຈໍານວນ 9 ໜ່ວຍ, ສັບປ່ຽນເບີຈໍານວນ 60 ຄັ້ງ, ສ້ອມແປງເຄື່ອງ FAX ຈໍານວນ 4 ເຄື່ອງ, ສັບປ່ຽນຄູ່ສາຍຈໍານວນ 43 ເລກໝາຍ ແລະ ແກ້ໄຂເບີໂທອອກນອກເຄືອຂ່າຍຈໍານວນ 8 ເລກໝາຍ; ໄດ້ຕິດຕາມ, ຄຸ້ມຄອງ, ກວດກາ Website ຂອງກະຊວງ ປກສ ເປັນປົກກະຕິ, ໃນໄລຍະ 1 ປີຜ່ານມາ, ມີຈໍານວນຜູ້ເຂົ້າຊົມທັງໝົດ 343,428 ເທື່ອຄົນ, ກົມສື່ມວນຊົນໄດ້ລົງຂ່າວທັງໝົດ 474 ເລື່ອງ; ໄດ້ຕິດຕາມກວດກາສະພາບການຕິດຕໍ່ຂອງບັນດາຫ້ອງສາຍ ປກສ ແຂວງທົ່ວປະເທດຈໍານວນ 244 ຫ້ອງສາຍ, ໂດຍລວມແມ່ນຕິດຕໍ່ເປັນປົກກະຕິ ແລະ ໄດ້ປະຈໍາການວິຊາສະເພາະຕະຫຼອດ 24 ຊົ່ວໂມງ, ຮັບປະກັນວຽກງານຮັບ-ສົ່ງຂໍ້ມູນຂ່າວສານແຕ່ສູນກາງ ຫາ ປກສ ແຂວງທົ່ວປະເທດ, ຮັບປະກັນ,ວ່ອງໄວ, ທັນເວລາ ແລະ ຫັນເປັນທັນສະໄໝເທື່ອລະກ້າວ.
ສຳລັບທິດທາງປີ 2026 ເພີ່ມທະວີປັບປຸງກໍ່ສ້າງວຽກງານພັກ ແລະ ກໍ່ສ້າງກໍາລັງ ປກສ ໃຫ້ປອດໃສ ເຂັ້ມແຂງ ໜັກແໜ້ນ, ປັບປຸງແບບແຜນການບັນຊາທີ່ເດັດດ່ຽວ ເດັດຂາດ, ເພີ່ມຂີດຄວາມສາມາດ, ມີຈັນຍາບັນ ຈັນຍາທໍາ, ມີຄວາມທັນທັນສະໄໝ, ເຊີດຊູບົດບາດ ການນໍາພາເດັດຂາດ ໂດຍກົງ ແລະ ຮອບດ້ານຂອງພັກ ຕໍ່ວຽກງານ ປກສ, ຕັ້ງໜ້າຜັນຂະຫຍາຍແນວທາງ ປກຊ-ປກສ ທົ່ວປວງຊົນຮອບດ້ານຂອງພັກຢ່າງແຂງແຮງ ຕິດພັນກັບການຈັດຕັ້ງປະຕິບັດ 3 ທິດນໍາຂອງພັກ ໃນຂົງເຂດວຽກງານ ປກສ ໃຫ້ເປັນຮູບປະທໍາ ມີປະສິດທິພາບ ປະສິດທິຜົນສູງຢ່າງແທ້ຈິງ; ລົງກວດກາ, ຕິດຕາມ ແລະ ຊຸກຍູ້ວຽກງານສື່ສານຢູ່ບັນດາກົມກອງ, ທ້ອງຖິ່ນໃຫ້ເປັນປົກກະຕິ, ເປັນເຈົ້າການສະກັດກັ້ນ ແລະ ແກ້ໄຂບັນຫາໜໍ່ແໜງ ປະກົດການຫຍໍ້ທໍ້ຢູ່ໃນກໍາລັງສື່ສານ ປກສ ໃຫ້ໄດ້ໂດຍພື້ນຖານ.
ຂ່າວ: ສິດທິພັນ
ຄໍາເຫັນ