 |
ໂຄງການ HI ໄດ້ເລີ່ມປະຕິບັດງານໃນການຊ່ວຍເຫຼືອຜູ້ປະສົບເຄາະຮ້າຍ, ຜູ້ພິການ ແລະ ການກວດກູ້ລະເບີດບໍ່ທັນແຕກ (UXO) ຢູ່ ສປປ ລາວ ມາຕັ້ງແຕ່ປີ 1996 ມາຮອດປີ 2026 ຄົບຮອບ 30 ປີ ແລ້ວ.ໃນໄລຍະທໍາອິດ (1996-2017) ໄດ້ສຸມໃສ່ການຈັດຕັ້ງປະຕິບັດກິດຈະກໍາຢູ່ແຂວງສະຫວັນນະເຂດ. ປີ 2018 ຈົນເຖິງປັດຈຸບັນໄດ້ຂະຫຍາຍກິດຈະກໍາປະຕິບັດວຽກງານໄປສູ່ແຂວງຫົວພັນ ໂດຍສະເພາະຢູ່ເມືອງຫົວເມືອງ ແລະ ເມືອງຮ້ຽມ. ໂຄງການ HI ໄດ້ເຄື່ອນໄຫວຈັດຕັ້ງປະຕິບັດ 5 ກິດຈະກໍາຫຼັກ ຊຶ່ງໄດ້ສ້າງຜົນງານອັນໂດດເດັ່ນໃນຫຼາຍດ້ານເປັນຕົ້ນແມ່ນວຽກງານໂຄສະນາສຶກສາຄວາມສ່ຽງໄພລະເບີດບໍ່ທັນແຕກ, ໄດ້ລົງໂຄສະນາໃຫ້ຄວາມຮູ້ຕໍ່ຊຸມຊົນ ແລະ ສະຖາບັນການສຶກສາໃນບ້ານເປົ້າໝາຍຫຼາຍກວ່າ 80 ບ້ານຢູ່ແຂວງຫົວພັນ ຊຶ່ງມີຜູ້ໄດ້ຮັບຜົນປະໂຫຍດ ແລະ ຮູ້ທັນຄວາມສ່ຽງຈາກລະເບີດຫຼາຍກວ່າ 50,000 ຄົນ; ວຽກງານກວດກູ້ພື້ນທີ່ ແລະ ທໍາລາຍລະເບີດ: ໄດ້ປົດປ່ອຍເນື້ອທີ່ກະສິກໍາ ແລະ ເນື້ອທີ່ພັດທະນາໃຫ້ຊຸມຊົນໄດ້ຫຼາຍກວ່າ 4 ລ້ານຕາແມັດ, ສາມາດທໍາລາຍລະເບີດບໍ່ທັນແຕກໄດ້ຫຼາຍກວ່າ 14,700 ໜ່ວຍ ແລະ ຊ່ວຍໃຫ້ປະຊາຊົນຫຼາຍກວ່າ 18,000 ຄົນ ສາມາດນໍາໃຊ້ເນື້ອທີ່ດິນຢ່າງປອດໄພ; ວຽກງານຊ່ວຍເຫຼືອຜູ້ປະສົບເຄາະຮ້າຍ ແລະ ຜູ້ພິການທົ່ວໄປ: ໄດ້ສົ່ງເສີມການເຂົ້າເຖິງການຟື້ນຟູໜ້າທີ່ການ, ສະໜອງອຸປະກອນຄໍ້າຊູ ແລະ ທຶນປະກອບອາຊີບ ເພື່ອໃຫ້ເຂົາເຈົ້າສາມາດສ້າງລາຍໄດ້ລ້ຽງກຸ້ມຕົນເອງ,ຊຶ່ງຢູ່ແຂວງຫົວພັນມີຜູ້ໄດ້ຮັບການຊ່ວຍເຫຼືອແລ້ວປະມານ 190 ຄົນ; ວຽກງານການສຶກສາຮຽນຮ່ວມ ແລະ ສ້າງຄວາມເຂັ້ມແຂງ: ໄດ້ສຸມໃສ່ການສົ່ງເສີມການສຶກສາຮຽນຮ່ວມໃນຊຸມຊົນ ແລະ ເພີ່ມຂີດຄວາມສາມາດໃຫ້ອໍານາດການປົກຄອງທ້ອງຖິ່ນ.ທັງນີ້, ທຶນຮູບແບບການດໍາເນີນງານທັງໝົດແມ່ນໄດ້ຮັບການສະໜັບສະໜູນຈາກຫຼາຍພາກສ່ວນອົງການຈັດຕັ້ງສາກົນ ແລະ ບັນດາປະເທດຜູ້ໃຫ້ທຶນ ເປັນຕົ້ນແມ່ນສະຫະພາບເອີຣົບ (EU), ເນເທີແລນ, ເຢຍລະມັນ, ນັອກແວ (NORAD).
ທ່ານ ວິໄລສັກ ໄຊຊະນະ ໃຫ້ຮູ້ຕື່ມວ່າ: ສໍາລັບແຜນການໃນອະນາຄົດ, ຈະເພີ່ມເຕີມຈາກ 5 ກິດຈະກໍາຫຼັກທີ່ຍັງຈະສືບຕໍ່ດໍາເນີນຢ່າງແຂງແຮງແລ້ວ, ໂຄງການ HI ຍັງມີແຜນລິເລີ່ມໂຄງການໃໝ່ຄື: "ການເກັບກູ້ລະເບີດໃຕ້ນໍ້າ" ຊຶ່ງປັດຈຸບັນກໍາລັງຢູ່ໃນຂັ້ນຕອນການສຶກສາ ແລະ ລົງສໍາຫຼວດຄວາມເປັນໄປໄດ້ ເພື່ອວາງແຜນຈັດຕັ້ງປະຕິບັດຕົວຈິງ ແລະ ທ່ານຍັງໄດ້ເນັ້ນຢໍ້າຕື່ມວ່າ: ການເຂົ້າຮ່ວມກອງປະຊຸມໃນຄັ້ງນີ້ ຖືເປັນໂອກາດອັນດີທີ່ຈະຊ່ວຍສ້າງຄວາມເຂັ້ມແຂງໃຫ້ສືບຕໍ່ວຽກງານກວດກູ້ລະເບີດຢູ່ລາວດີຂຶ້ນ, ເພື່ອຮ່ວມກັນແກ້ໄຂບັນຫາລະເບີດຕົກຄ້າງໃຫ້ໝົດໄປຢ່າງສິ້ນເຊີງເຮັດໃຫ້ຊຸມຊົນມີຄວາມປອດໄພ ແລະ ມີຄຸນນະພາບຊີວິດທີ່ດີຂຶ້ນຢ່າງຍືນຍົງ.
ຄໍາເຫັນ