 |
ກອງປະຊຸມ ເພື່ອສະຫຼຸບການຈັດຕັ້ງປະຕິບັດວຽກງານ ປະຈຳປີ 2026 ແລະ ວາງທິດທາງແຜນການໄລຍະ 6 ເດືອນທ້າຍປີ 2026-2027. ໃນໂອກາດກ່າວເປີດ ທ່ານ ເຫຼັກໄຫຼ ສີວິໄລ ໄດ້ເນັ້ນໃຫ້ເຫັນເຖິງຄວາມສໍາຄັນຂອງວຽກງານຄວາມປອດໄພທາງຫຼວງ ຊຶ່ງເປັນວຽກງານທີ່ຕິດພັນກັບຊີວິດ ແລະ ຊັບສິນຂອງປະຊາຊົນ. ໃນຕະຫຼອດໄລຍະ 5 ປີຜ່ານມາ ຮອດປັດຈຸບັນ, ຈຳນວນຜູ້ເສຍຊີວິດ ຈາກອຸບັດເຫດທາງຫຼວງຢູ່ ໃນ ສປປ ລາວ ຍັງສູງ ປະມານ 900-1,000 ຄົນຕໍ່ປີ, ໃນນັ້ນ 80% ແມ່ນຊາວໜຸ່ມ, ເຍົາວະຊົນ ແລະ ກຳລັງແຮງງານຫຼັກ ແລະ ສ້າງຄວາມເສຍຫາຍທາງດ້ານເສດຖະກິດ-ສັງຄົມ ສູງເຖິງ 175 ລ້ານໂດລາ ຕໍ່ປີ, ຊຶ່ງອົງການສາກົນໄດ້ປະເມີນວ່າ ການເສຍຊີວິດຂອງ ປະຊາກອນ 1 ຄົນ ມີມູນຄ່າເທົ່າກັບ 70 ເທົ່າຂອງ GDP. ສາເຫດຕົ້ນຕົ້ນແມ່ນເກີດຈາກການຂັບຂີ່ລົດໄວ, ການດື່ມສິ່ງມືນເມົາແລ້ວຂັບ, ເຕັກນິກພາຫະນະບໍ່ໄດ້ມາດຕະຖານ, ແລະ ການບໍ່ປະຕິບັດ ກົດຈະລາຈອນ, ໂດຍສະເພາະ ໃນຊ່ວງເວລາ 17:00 ຫາ 01:00 ໂມງ. ຄຽງຄູ່ກັບການຂະຫຍາຍຕົວຂອງພື້ນຖານໂຄງລ່າງ ແລະ ຈຳນວນພາຫະນະທີ່ເພີ່ມຂຶ້ນ, ລັດຖະບານໄດ້ໃຫ້ຄວາມສຳຄັນຢ່າງຍິ່ງ ໃນການຕິດຕາມ, ກວດກາ ການຈັດຕັ້ງປະຕິບັດ ຍຸດທະສາດແຫ່ງຊາດ ດ້ານຄວາມປອດໄພທາງຫຼວງ ໄລຍະປີ 2021-2030. ກອງປະຊຸມ ຜູ້ເຂົ້າຮ່ວມຍັງໄດ້ຮັບຟັງ ແລະ ປຶກສາຫາລື ໃນຫຼາຍເນື້ອໃນສຳຄັນ, ບົດສະຫຼຸບວຽກງານ ປະຈຳປີ 2026 ແລະ ແຜນການປີ 2027, ແຜນສະໜັບສະໜູນ ຈາກທະນາຄານໂລກ, ການນຳໃຊ້ເຕັກໂນໂລຊີທັນສະໄໝ ເຂົ້າໃນການບັງຄັບໃຊ້ກົດໝາຍຈະລາຈອນ ເຊັ່ນ: ການກວດກາການດື່ມແລ້ວຂັບ, ການຮັດສາຍນິລະໄພ, ການໃສ່ໝວກກັນກະທົບ, ການບັນຈຸຄວາມຮູ້ ຄວາມປອດໄພທາງຫຼວງ ເຂົ້າໃນຫຼັກສູດ ການຮຽນ-ການສອນ, ທັງຮວມເຖິງການປັບປຸງລະບົບການປິ່ນປົວ ແລະ ການຂົນສົ່ງຜູ້ບາດເຈັບສຸກເສີນ ຈາກຈຸດເກີດເຫດໄປໂຮງໝໍ.
ພ້ອມດຽວກັນນີ້ ປະທານກອງປະຊຸມ ໄດ້ຮຽກຮ້ອງໃຫ້ບັນດາຜູ້ເຂົ້າຮ່ວມ ຈົ່ງເຊີດຊູຄວາມຮັບຜິດຊອບ, ສຸມສະຕິປັນຍາ ເຂົ້າໃນການຄົ້ນຄວ້າ ແລະ ປະກອບຄຳເຫັນຢ່າງກົງໄປກົງມາ ເພື່ອຊອກຫາວິທີການແກ້ໄຂບັນຫາໃຫ້ແທດເໝາະກັບສະພາບຄວາມເປັນຈິງ. ເພື່ອຮັບປະກັນໃຫ້ການຈັດຕັ້ງປະຕິບັດວຽກງານຄວາມປອດໄພທາງຫຼວງ ມີປະສິດທິຜົນສູງສຸດ, ຊ່ວຍປົກປ້ອງຊີວິດ ແລະ ຊັບສິນ ຂອງ ປະຊາຊົນ, ພ້ອມທັງຫຼຸດຜ່ອນອຸບັດເຫດ ໃຫ້ຫຼຸດລົງຢ່າງເປັນຮູບປະທຳ.ພາບ-ຂ່າວ:ແສງອາທິດ
ຄໍາເຫັນ