ຮອງນາຍົກລັດຖະມົນຕີ ປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ (ຄພສ), ມີ ທ່ານ ນາງ ໃບຄໍາ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ຮອງປະທານ ຄພສ, ມີບັນດາຮອງລັດຖະມົນຕີ, ຮອງເຈົ້າແຂວງ, ປະທານຄະນະກໍາມະການຄຸ້ມຄອງໄພພິບັດຂັ້ນແຂວງ, ນະຄອນຫຼວງວຽງຈັນ, ກອງເລຂາຄະນະກໍາມະການຄຸ້ມຄອງໄພພິບັດ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ພົນເອກ ຈັນສະໝອນ ຈັນຍາລາດ ກ່າວວ່າ: ກອງປະຊຸມຄັ້ງນີ້ເປັນກອງປະຊຸມທີ່ມີຄວາມສໍາຄັນ ໃນ 1 ປີຜ່ານມາ ທາງຄະນະກຳມະການຄຸ້ມຄອງໄພພິບັດທັງຂັ້ນສູນກາງ ແລະ ຂັ້ນແຂວງຈະໄດ້ພ້ອມກັນ ເພື່ອຖອດຖອນບົດຮຽນໃນການຈັດຕັ້ງປະຕິບັດວຽກງານການຄຸ້ມຄອງ ໄພພິບັດ, ການສ້າງຄວາມເປັນເອກະພາບສູງ ແລະ ສ້າງຄວາມກຽມພ້ອມຕອບໂຕ້ສຸກເສີນ ຮັບມືກັບໄພພິບັດທີ່ອາດຈະເກີດຂຶ້ນໃນປີ 2025 ໃນຂອບເຂດທົ່ວປະເທດ. ພ້ອມນີ້ ທ່ານຍັງຮຽກຮ້ອງມາຍັງບັນດາທ່ານຜູ້ແທນກອງປະຊຸມ ຈົ່ງພ້ອມກັນສຸມສະຕິປັນຍາເຂົ້າໃນການປຶກສາຫາລື, ປະກອບຄໍາຄິດເຫັນຢ່າງກົງໄປກົງມາ ເພື່ອເຮັດໃຫ້ກອງປະຊຸມບັນລຸຕາມຈຸດປະສົງ ລະດັບຄາດໝາຍທີ່ວາງໄວ້.
ໃນປີ 2024 ຜ່ານມາ, ໄດ້ມີເຫດການໄພພິບັດທີ່ເກີດຂຶ້ນຢູ່ບັນດາແຂວງໃນຂອບເຂດທົ່ວປະເທດ ຊຶ່ງເຫັນໄດ້ວ່າເປັນເຫດການໜຶ່ງທີ່ມີຄວາມຮຸນແຮງ ໂດຍສະເພາະເຫດການລົມພາຍຸພັດ, ດິນເຈື່ອນ, ນໍ້າຖ້ວມຊຸ ແລະ ນໍ້າຖ້ວມຂັງ. ໃນໄລຍະທ້າຍເດືອນກໍລະກົດ ຫາເດືອນກັນຍາ 2024 ມີເຫດການລົມພາຍຸດີເປເຊີນ, ພາຍຸພາພິລຸນ, ພາຍຸຢາກິ ແລະ ພາຍຸຊູລິກ ທີ່ພັດຜ່ານເຂົ້າມາ ສປປ ລາວ ເຮັດໃຫ້ຫຼາຍແຂວງໄດ້ຮັບຜົນກະທົບທັງໝົດ 16ແຂວງ 1 ນະຄອນຫຼວງ, ມີແຕ່ແຂວງອັດຕະປື ແມ່ນບໍ່ໄດ້ຮັບຜົນກະທົບ, ຕາມການເກັບກຳຂໍ້ມູນຂອງກອງເລຂາ ແລະ ລາຍງານຂອງບັນດາແຂວງ, ເຫັນໄດ້ວ່ານັບມື້ສະພາບໄພພິບັດມີຄວາມຮຸນແຮງ, ແຂວງທາງພາກເໜືອບໍ່ເຄີຍມີນໍ້າຖ້ວມຂັງ ແລະ ຮຸນແຮງກໍມີ ຄື: ໃນປີ 2024 ແຂວງຫົວພັນ, ຫຼວງນໍ້າທາ, ໄຊຍະບູລີ, ຫຼວງພະບາງ ແລະ ແຂວງອື່ນໆ ຊຶ່ງສ້າງຄວາມເສຍຫາຍເປັນຈໍານວນຫຼາຍສົມຄວນ.
ຕໍ່ກັບສະພາບໄພພິບັດທີ່ເກີດຂຶ້ນ ຄະນະກຳມະການຄຸ້ມຄອງໄພພິບັດຂັ້ນສູນກາງ ແລະ ທ້ອງຖິ່ນ ໄດ້ເອົາໃຈໃສ່ນໍາພາ-ຊີ້ນໍາ, ຕິດຕາມ, ຊຸກຍູ້ການຄວບຄຸມ, ແກ້ໄຂສຸກເສີນ, ຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພພິບັດຢູ່ບັນດາແຂວງໃຫ້ສາມາດກັບສູ່ສະພາບປົກກະຕິໄດ້ຢ່າງວ່ອງໄວ, ໄດ້ຮີບຮ້ອນຟື້ນຟູສຸກເສີນ, ຮີບດ່ວນດ້ານພື້ນຖານໂຄງລ່າງ, ດ້ານການຜະລິດກະສິກຳ ແລະ ໄດ້ສະເໜີລັດຖະບານອະນຸມັດແກ້ໄຂໂຄງການຟື້ນຟູສຸກເສີນ ແລະ ຟື້ນຟູໄລຍະຍາວເຂົ້າໃນແຜນຟື້ນຟູປົກກະຕິ ແຜນລົງທຶນຂອງລັດ ປີ 2025 ນີ້. ພ້ອມນີ້, ເພື່ອເປັນການປັບປຸງກົນໄກການປະສານງານ ຂອງຄະນະກຳມະການຄຸ້ມຄອງໄພພິບັດ ຢູ່ແຕ່ລະຂັ້ນໃຫ້ມີຄວາມເຂັ້ມແຂງ ແນໃສ່ເຮັດໃຫ້ການຈັດຕັ້ງປະຕິບັດວຽກງານປ້ອງກັນ, ຄວບຄຸມ ແລະ ຟື້ນຟູຫຼັງໄພພິບັດ ໃຫ້ໄດ້ຮັບຜົນດີ ໂດຍໄດ້ຊຸກຍູ້ການສ້າງຄວາມເຂັ້ມແຂງໃຫ້ແກ່ກອງທຶນຄຸ້ມຄອງໄພພິບັດຂັ້ນສູນກາງທາງລັດຖະບານກໍອະນຸມັດງົບປະ
ມານຈໍານວນໜຶ່ງເຂົ້າກອງທຶນ, ຂັ້ນສູນກາງ ແລະ ທ້ອງຖິ່ນ ກໍໄດ້ມີການສ້າງຕັ້ງກອງທຶນໃນຂັ້ນຂອງຕົນ ໃຫ້ສາມາດສະໜອງຕໍ່ວຽກງານການ ຕອບໂຕ້ສຸກເສີນ, ຊຸກຍູ້ການສ້າງແຜນຍຸດທະສາດຫຼຸດຜ່ອນຄວາມສ່ຽງໄພພິບັດຂັ້ນແຂວງ ແລະ ແຜນປະຕິບັດງານຫຼຸດຜ່ອນຄວາມສ່ຽງໄພພິບັດຂັ້ນເມືອງ ແລະ ສ້າງແຜນກຽມພ້ອມຕອບໂຕ້ໄພພິບັດປະຈໍາປີ ແຕ່ສູນກາງຮອດທ້ອງຖິ່ນ, ສ້າງຄວາມເຂັ້ມແຂງໃຫ້ພາກສ່ວນທີ່ກ່ຽວຂ້ອງໃນວຽກງານຄຸ້ມຄອງ ໄພພິບັດໃນຂອບເຂດທົ່ວປະເທດ, ສ້າງທີມງານປະເມີນຜົນສຸກເສີນຂັ້ນສູນກາງ ແລະ ຂັ້ນທ້ອງຖິ່ນ, ຍົກລະດັບວຽກງານເຕືອນໄພ ໃຫ້ສັງຄົມສາມາດຮັບຮູ້ຂໍ້ມູນຂ່າວສານຢ່າງວ່ອງໄວ, ຊັດເຈນ ແລະ ສ້າງສູນປະຕິບັດງານສຸກເສີນໃຫ້ບາງແຂວງ.
ທ່ານ ວົງຄໍາ ພັນທະນຸວົງ ຫົວໜ້າກົມສັງຄົມສົງເຄາະ ກະຊວງ ຮສສ ຫົວໜ້າກອງເລຂາ ຄພສ ໄດ້ຂຶ້ນລາຍງານການຈັດຕັ້ງປະຕິບັດວຽກງານຄຸ້ມຄອງໄພພິບັດ ປະຈໍາປີ 2024 ແລະ ທິດທາງແຜນການ ປີ 2025 ແລະ ແຜນກຽມພ້ອມຕອບໂຕ້ໄພພິບັດ ປີ 2025 ວ່າ: ໃນໄລຍະ 1 ປີຜ່ານມາ, ໄດ້ມີເຫດການໄພພິບັດເກີດຂຶ້ນໃນຂອບເຂດທົ່ວປະເທດທັງໝົດ 69 ຄັ້ງ, ສົ່ງຜົນກະທົບຢູ່ 16 ແຂວງ, 147 ເມືອງ, 1,730 ບ້ານ, 58,753 ຄອບຄົວ, 271,168 ຄົນ ຍິງ 124,213 ຄົນ, ເສຍຊີວິດ 17 ຄົນ, ບາດເຈັບ 58 ຄົນ, ເຮືອນເປ່ເພ 6,432 ຫຼັງ, ເຮືອນຖືກເສຍຫາຍ 100% 110 ຫຼັງ, ໂຮງຮຽນ 126 ແຫ່ງ, ສະໜາມບິນ 1 ແຫ່ງ, ສັດລ້ຽງ 4,349 ໂຕ, ເນື້ອທີ່ 41,027 ເຮັກຕາ ແລະ ຊົນລະປະທານ 118 ແຫ່ງ ລວມມູນຄ່າເສຍຫາຍທັງໝົດ 6,747,509,456,029 ກີບ. ຈາກນັ້ນ, ຜູ້ເຂົ້າຮ່ວມໃນກອງປະຊຸມ, ກໍໄດ້ຮ່ວມກັນປຶກສາຫາລືແລກປ່ຽນຄວາມຄິດເຫັນ ເພື່ອຊອກຫາວິທີທາງໃນການແກ້ໄຂບາງບັນຫາທີ່ຍັງຄົງຄ້າງ ແລະ ຍັງເປັນສິ່ງທ້າທາຍ ເພື່ອເອກະພາບກັນສືບຕໍ່ຈັດຕັ້ງປະຕິບັດວຽກງານຄຸ້ມຄອງໄພພິບັດໃນປີ 2025 ໃຫ້ໄດ້ຮັບໝາກຜົນດີຂຶ້ນກວ່າເກົ່າ.
ຕອນທ້າຍກອງປະຊຸມຄັ້ງນີ້ໄດ້ມີພິທີມອບໂຕເລກໂຄງການຟື້ນຟູແກ້ໄຂໃຫ້ບັນດາແຂວງທີ່ໄດ້ຮັບຜົນກະທົບຈາກໄພພິບັດ ປີ 2024 ທີ່ຜ່ານມາ. ໃນນັ້ນມີ 7 ແຂວງຄື: ແຂວງຫຼວງນໍ້າທາ50 ໂຄງການລວມມູນຄ່າ 144,205,402,160 ກີບ ໃນນີ້: ດ້ານການຊ່ວຍເຫຼືອສັງຄົມສົງເຄາະ, ດ້ານກະສິກໍາ ແລະ ປ່າໄມ້, ດ້ານໂຍທາທິການ ແລະ ຂົນສົ່ງແລະ ດ້ານສຶກສາທິການ ແລະ ກິລາ; ແຂວງຫົວພັນ 42ໂຄງການ ລວມມູນຄ່າ 33,915,462,021 ກີບ; ແຂວງໄຊຍະບູລີ28 ໂຄງການລວມມູນຄ່າ 17,415,869,520 ກີບ; ແຂວງຊຽງຂວາງ 27 ໂຄງການ ລວມມູນຄ່າ 5,333,909,301 ກີບ; ແຂວງຫຼວງພະບາງ 11 ໂຄງການ ລວມມູນຄ່າ 27,978,860,000 ກີບ; ແຂວງບໍລິຄໍາໄຊ(ກັນຕາຝັ່ງເຈື່ອນ) 1 ໂຄງການລວມມູນຄ່າ 14,674,531,438 ກີບ; ແຂວງບໍ່ແກ້ວ ( ກະສິກໍາ) 1 ໂຄງການລວມມູນຄ່າ 424,157,200 ກີບ; ກະຊວງປ້ອງກັນປະເທດ (ເຂດພັດນາຊົນນະບົດ) 4 ໂຄງການລວມມູນຄ່າ18,624,400,000 ກີບ.
(ຂ່າວ-ພາບ:ຂ່າວສານຮສສ)
ຄໍາເຫັນ