 |
ສະຫາຍ ພົນຈັດຕະວາ ຄໍາແພນ ວິລື້ທໍາ ໄດ້ກ່າວເປີດກອງປະຊຸມ ແລະ ເຜີຍແຜ່ມະຕິກອງປະຊຸມຄົບຄະນະບໍລິຫານງານພັກແຂວງບໍລິຄໍາໄຊ ຄັ້ງທີ 5 ສະໄໝທີ VIII. ສະຫາຍ ພັນເອກ ບຸນຍັງ ລໍສິມມາ ກໍາມະການຄະນະພັກ ຄະນະພັກກອງບັນຊາການ, ຫົວໜ້າຫ້ອງການບໍລິຫານ ໄດ້ຜ່ານບົດສະຫຼຸບການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກ ກອງບັນຊາການທະຫານແຂວງ ຄັ້ງທີ 4 ສະໄໝ VI. ຈາກນັ້ນ, ສະຫາຍ ພັນໂທ ສົມລິດ ບານທະວົງ ກໍາມະການຄະນະພັກກອງບັນຊາການ, ຮອງຫົວໜ້າຫ້ອງ ການບໍລິຫານ ໄດ້ຜ່ານບົດສະຫຼຸບຫຍໍ້ການນໍາພາວຽກງານຮອບດ້ານ 9 ເດືອນຕົ້ນປີ ແລະ ທິດທາງ 3 ເດືອນ ທ້າຍປີ 2026. ຊຶ່ງຜ່ານມາ, ຄະນະພັກ-ຄະນະບັນຊາກອງບັນຊາການ ໄດ້ນຳພາ-ຊີ້ນຳຄະນະພັກ-ຄະນະບັນຊາແຕ່ລະຂັ້ນທົ່ວກອງບັນຊາການທະຫານແຂວງ ເອົາໃຈໃສ່ປະຕິບັດວຽກງານຂອງຕົນຢ່າງຮອບດ້ານ ໂດຍປະຕິບັດຕາມ 4 ໜ້າທີ່ໃຫຍ່ 26 ແຜນງານ ທີ່ຄະນະພັກກະຊວງປ້ອງກັນປະເທດວາງອອກໄດ້ເປັນຢ່າງດີ ສາມາດເຮັດໃຫ້ສະພາບໃນທົ່ວແຂວງມີຄວາມສະຫງົບ, ສັງຄົມມີຄວາມເປັນລະບຽບຮຽບຮ້ອຍ, ເສດຖະກິດໄດ້ຮັບການພັດທະນາດີຂຶ້ນ. ໃນນັ້ນ, ຄະນະພັກ-ຄະນະບັນຊາແຕ່ລະຂັ້ນ ໄດ້ຖືສຳຄັນໃນການສຶກສາອົບຮົບການເມືອງ-ນຳພາແນວຄິດໃຫ້ພະນັກງານ-ນັກຮົບໃນກົມກອງ ເຊື່ອມຊຶມກໍາແໜ້ນຕໍ່ແນວທາງນະໂຍບາຍຂອງພັກ, ກົດໝາຍຂອງລັດ ແລະ ຂໍ້ກຳນົດ, ກົດລະບຽບຂອງກອງທັບໄດ້ເປັນຢ່າງດີ, ເອົາໃຈໃສ່ຕິດຕາມກໍາແໜ້ນສະພາບການເຄື່ອນໄຫວບັນດາເປົ້າໝາຍຈຸດຫຼໍ່ແຫຼມຕ່າງໆ ເປັນປະຈຳ, ຫັນເອົາພະນັກງານລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານຕາມມູນເຊື້ອຂອງກອງທັບ, ຈັດຕັ້ງກຳລັງເຄື່ອນໄຫວໃນຂອບເຂດຮັບຜິດຊອບເປັນປົກກະຕິ, ຕໍ່ເນື່ອງ. ນອກນັ້ນ, ຍັງໄດ້ເອົາໃຈໃສ່ນໍາພາ-ຊີ້ນໍາແຕ່ລະກົມກອງ ຍົກສູງສະຕິລະວັງຕົວກຽມພ້ອມສູ້ຮົບໃຫ້ເຂັ້ມງວດ, ພ້ອມທັງຖືສຳຄັນໃນການປັບປຸງກໍ່ສ້າງກົມກອງ ແລະ ກຳລັງໃຫ້ມີຄວາມໜັກແໜ້ນທາງດ້ານການເມືອງ ແລະ ເຂັ້ມແຂງທາງດ້ານການຈັດຕັ້ງ. ຄຽງຄູ່ກັນນັ້ນ, ຍັງໄດ້ຊີ້ນຳດ້ານວຽກງານຮັບປະກັນພະລາທິການ-ເຕັກນິກ ໄດ້ສຸມໃສ່ເຮັດວຽກງານການຜະລິດ-ການບໍລິການຕ່າງໆ ເພື່ອສ້າງແຫຼ່ງລາຍຮັບເຂົ້າກົມກອງ ສາມາດສ້າງລາຍຮັບໄດ້ທັງໝົດ 3,18 ຕື້ກວ່າກີບ.
 |
ໃນກອງປະຊຸມ ບັນດາຜູ້ແທນໄດ້ຜັດປ່ຽນກັນປະກອບຄຳຄິດຄຳເຫັນ ໃສ່ເນື້ອໃນບົດສະຫຼຸບ ແລະ ທິດທາງແຜນການຢ່າງກົງໄປກົງມາ ແນໃສ່ພ້ອມກັນຊອກຫາວິທີປັບປຸງແກ້ໄຂຈຸດອ່ອນຂໍ້ຄົງຄ້າງ ແລະ ເສີມຂະ ຫຍາຍດ້ານດີ ທີ່ມີຜົນສຳເລັດ ພ້ອມທັງ, ຕອບຄຳຖາມເຈາະຈີ້ມ ຂອງຄະນະກອງບັນຊາການທະຫານແຂວງ ເຮັດໃຫ້ກອງປະຊຸມເຕັມໄປດ້ວຍຄວາມໝາຍ, ຄວາມສຳຄັນ ແລະ ມີເນື້ອໃນຄົບຖ້ວນສົມບູນ ເພື່ອພ້ອມກັນຈັດຕັ້ງປະຕິບັດເນື້ອໃນຂອງກອງປະຊຸມຄັ້ງນີ້ ໃຫ້ໄດ້ຮັບຜົນສຳເລັດຢ່າງຈົບງາມ. ພ້ອມນັ້ນ, ຍັງໄດ້ປະກາດການແຕ່ງຕັ້ງຂັ້ນຫົວໜ້າ-ຮອງຫົວໜ້າພະແນກຕື່ມອີກ. ຂ່າວ: ສີທອງ ຈັນທະວົງ; ພາບ: ວັນ ນ້ອຍວິໄລ
ຄໍາເຫັນ