 |
ທ່ານນາງ ອໍາໄພວອນ ລ້ອມບຸນແພງ ກ່າວວ່າ: ກອງປະຊຸມຄົບຄະນະໃນຄັ້ງນີ້ ມີຄວາມໝາຍຄວາມສໍາຄັນເປັນຢ່າງຍິ່ງ ຊຶ່ງເປັນກອງປະຊຸມຄັ້ງທໍາອິດຂອງກໍາມາທິການ ວັດທະນະທຳ-ສັງຄົມ ແລະ ຊົນເຜົ່າ ສະພາແຫ່ງຊາດ ຊຸດທີ X. ວາລະສໍາຄັນຂອງກອງປະຊຸມແມ່ນຈະໄດ້ສຸມໃສ່ ສະຫຼຸບ ແລະ ວາງແຜນງານ, ສະຫຼຸບຕີລາຄາການເຄື່ອນໄຫວວຽກງານ ປະຈໍາປີ 2026 ທີ່ຜ່ານມາ ແລະ ພິຈາລະນາວາງແຜນການເຄື່ອນໄຫວວຽກງານ ປະຈໍາປີ 2027 ໃນຕໍ່ໜ້າ, ການຕິດຕາມກວດກາ: ຮັບຟັງການລາຍງານຜົນການຕິດຕາມກວດກາ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 6 ເດືອນທ້າຍປີ 2026, ການທາບທາມກົດໝາຍ: ທາບທາມຄຳເຫັນໃສ່ ຮ່າງກົດໝາຍວ່າດ້ວຍການຄວບຄຸມເຄື່ອງດື່ມທີ່ມີທາດເຫຼົ້າ (ສະບັບປັບປຸງ), ຊຶ່ງເປັນກົດໝາຍໃນຂົງເຂດວັດທະນະທຳ-ສັງຄົມ ທີ່ຈະນຳເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ X ທີ່ຈະມາເຖິງນີ້.
ນອກຈາກນີ້, ຜູ້ເຂົ້າຮ່ວມຈະໄດ້ແລກປ່ຽນ ແລະ ຖອດຖອນບົດຮຽນ ກ່ຽວກັບການເຄື່ອນໄຫວວຽກງານ ເພື່ອເຮັດໃຫ້ການປະຕິບັດພາລະບົດບາດ, ສິດ ແລະ ໜ້າທີ່ຂອງກໍາມາທິການ ແລະ ພາກສ່ວນກ່ຽວຂ້ອງ ມີຄວາມຄ່ອງຕົວ ແລະ ມີປະສິດທິພາບຫຼາຍຂຶ້ນ.
ໃນວາລະຕອນທ້າຍຂອງກອງປະຊຸມ, ຜູ້ເຂົ້າຮ່ວມຈະໄດ້ຮັບຟັງການໂອ້ລົມ ແລະ ຊີ້ທິດເຍືອງທາງ ຈາກທ່ານຮອງປະທານສະພາແຫ່ງຊາດ ຜູ້ຊີ້ນໍາກໍາມາທິການວັດທະນະທໍາ-ສັງຄົມ ແລະ ຊົນເຜົ່າ ເພື່ອເປັນເຂັມທິດແນະນໍາໃນການຜັນຂະຫຍາຍ ແລະ ຈັດຕັ້ງປະຕິບັດວຽກງານໃຫ້ໄດ້ຮັບຜົນສໍາເລັດສູງສຸດ.(ຂ່າວ: ແສງຈັນ)
ຄໍາເຫັນ