 |
ທ່ານ ທອງສະລິດ ມັງໜໍ່ເມກ ໄດ້ກ່າວວ່າ: ກອງປະຊຸມໃຫຍ່ ຄະນະບໍລິຫານງານ ຄະນະກໍາມະການໂອແລັມປິກແຫ່ງຊາດລາວ ຊຸດທີ VIII ແມ່ນໄດ້ດໍາເນີນມາຮອດໄລຍະທ້າຍ ຊຶ່ງໄດ້ບັນລຸຕາມຈຸດປະສົງ ແລະ ຄາດໝາຍ ທີ່ວາງໄວ້ ແລະ ພາຍໃນກອງປະຊຸມຜູ້ເຂົ້າຮ່ວມໄດ້ເຊີດຊູຄວາມເປັນເຈົ້າການ ໃນການປະກອບຄໍາຄິດ, ຄໍາເຫັນ ທີ່ເຕັມໄປດ້ວຍຄວາມເປັນຫ່ວງເປັນໄຍ, ຄວາມເອົາໃຈໃສ່ ຕໍ່ຂົງເຂດກິລາ ຊຶ່ງແຕ່ລະທ່ານໄດ້ປະກອບຄໍາເຫັນໃສ່ແຕ່ລະຫົວຂໍ້, ໃສ່ແຕ່ລະວຽກງານຂອງບັນດາສະຫະພັນກິລາປະເພດຕ່າງໆ ດ້ວຍຄວາມຮັບຜິດຊອບສູງ, ບົນຈິດໃຈຢາກຍົກລະດັບ ຢາກພັດທະນາວົງການກິລາລາວ ໃຫ້ມີການພັດທະນາ, ມີການຍົກລະດັບ ໃຫ້ທ່ຽມທັນກັບພາກພື້ນ ແລະ ສາກົນ, ປັດຈຸບັນ ສັງຄົມ ພວມຕິດຕາມ ຢ່າງໃກ້ຊິດວ່າ ວົງການກິລາລາວ ຈະມີການປັບປຸງພັດທະນາ ແລະ ບົດບາດໃນເວທີພາກພື້ນຂອງກິລາລາວ.
 |
ໃນໂອກາດນີ້, ທ່ານ ທອງສະລິດ ມັງໜໍ່ເມກ ໄດ້ມີຄຳເຫັນວ່າ: “ກິລາ” ແມ່ນຕິດພັນ ແລະເປັນຂົວຕໍ່ ກັບຫຼາຍຂົງເຂດທັງເສດຖະກິດ-ສັງຄົມ ແລະຕ່າງປະເທດ ຕົວຢ່າງ, ກິລາ ກັບ ເສດຖະກິດ ກິລາ ແມ່ນສາມາດປະກອບສ່ວນໃຫ້ກັບການພັດທະນາເສດຖະກິດຂອງປະເທດ, ໃນຫຼາຍປະເທດໃນໂລກ ແມ່ນນໍາໃຊ້ການຈັດການແຂ່ງຂັນກິລາ ຕິດພັນກັບການທ່ອງທ່ຽວ ເພື່ອເປັນແຫຼ່ງລາຍຮັບ ແລະ ດຶງດູດການລົງທຶນ ທັງພາຍໃນ ແລະ ຕ່າງປະເທດ, ກິລາ ກັບ ສັງຄົມ ກິລາ ແມ່ນຂະແໜງໜຶ່ງໃນສັງຄົມ ທີ່ປະກອບສ່ວນເຮັດໃຫ້ປະຊາຊົນ ມີສຸຂະພາບທີ່ແຂງແຮງ, ມີພະລານາໄມທີ່ສົມບູນ, ຖ້າກິລາໄດ້ຮັບການພັດທະນາເປັນຂະບວນການໃນທົ່ວປະເທດ ກໍຈະເຮັດໃຫ້ມີບັນຍາກາດເບີກບານມ່ວນຊື່ນ, ໄວໜຸ່ມ ກໍຫ່າງຈາກຢາເສບຕິດຄືໃນຄໍາຂວັນທີ່ວ່າ “ກິລາຄືຢາວິເສດ”. ກິລາ ຍັງເປັນຕົວຂັບເຂື່ອນຂະບວນສັງຄົມ, ປູກຈິດສໍານຶກຂອງຄວາມຮັກຊາດແພງເຊື້ອໄດ້ດີ, ສ້າງຄວາມສາມັກຄີເປັນຈິດໜຶ່ງໃຈດຽວຂອງຊາດ, ກິລາ ກັບ ການຕ່າງປະເທດ ແມ່ນການສົ່ງເສີມໃຫ້ມີການແລກປ່ຽນບົດຮຽນ, ປະສົບການ ພ້ອມທັງເປັນໜຶ່ງໃນວິທີການສ້າງສາຍສໍາພັນ, ສາຍພົວພັນ ທາງການທູດ ທັງເປັນການສ້າງບົດບາດ, ພາບພົດຂອງປະເທດ ໄປພ້ອມໆກັນ. ສະນັ້ນ, ຄະນະກໍາມະການໂອແລັມປິກແຫ່ງຊາດລາວແຕ່ລະຊຸດ, ໂດຍສະເພາະແມ່ນຊຸດທີ 8 ຜ່ານມາ ໄດ້ມີຜົນສໍາເລັດຫຼາຍດ້ານ, ເຮັດໃຫ້ກິລາລາວ ເຊື່ອມກັບພາຍໃນ ແລະ ສາກົນ ດີຂຶ້ນສົມຄວນ ແລະ ອົງການຈັດຕັ້ງໂອແລັມປິກ ແມ່ນການຈັດຕັ້ງສັງຄົມໜຶ່ງ, ອົງການຈັດຕັ້ງນີ້ ເຮັດໜ້າທີ່ສົມທົບ, ຮ່ວມມືທັງພາຍໃນ ແລະ ຕ່າງປະເທດ ໃນວຽກວິຊາສະເພາະກິລາ. ການປະຕິບັດໜ້າທີ່ຂອງຄະນະກໍາມະການໂອແລັມປິກແຫ່ງຊາດລາວ ຊຶ່ງເປັນອົງການຈັດຕັ້ງສັງຄົມ ທີ່ມີການພົວພັນຢ່າງ ສະໜິດແໜ້ນລະຫວ່າງກະຊວງສຶກສາທິການ ແລະ ກິລາ. ສະນັ້ນ, ຖ້າຢາກໃຫ້ຄະນະກໍາມະການໂອແລັມປິກແຫ່ງຊາດລາວສາມາດເຄື່ອນໄຫວ ໄດ້ຢ່າງມີປະສິດທິພາບນັ້ນ ແມ່ນອົງການທີ່ເປັນເສທິການ, ຕ້ອງປະຕິບັດໜ້າທີ່ດ້ວຍຄວາມຮັບຜິດຊອບສູງ, ຮູ້ຈັກການພົວພັນປະສານງານກັບພາຍໃນ ແລະຕ່າງປະເທດ, ຕ້ອງຫັນເປັນມືອາຊີບ, ເຄົາລົບລະບຽບຫຼັກການທີ່ວາງອອກ, ມີກົນໄກສ່ອງແສງລາຍງານຂໍຄວາມເຫັນຢ່າງເປັນປົກກະຕິ. ເປົ້າໝາຍເຄື່ອນໄຫວສຸດທ້າຍຂອງຄະນະກໍາມະການໂອແລັມປິກແຫ່ງຊາດລາວ, ກົມກິລາ ຂອງກະຊວງສຶກສາ ສະຫະພັນກິລາຕ່າງໆ ແມ່ນປະກອບສ່ວນນໍາເອົາຊື່ສຽງມາສູ່ປະເທດລາວ ໃຫ້ນັບມື້ສູງເດັ່ນຂຶ້ນ; ຕໍ່ກັບຄະນະບໍລິຫານງານ ຄະນະກໍາມະການໂອແລັມປິກແຫ່ງຊາດລາວຊຸດໃໝ່ (ຊຸດທີ IX) ໃຫ້ຍົກສູງຄວາມຮັບຜິດຊອບຂອງຕົນ ໃນການເປັນການນໍາຫຼັກແຫຼ່ງ, ເປັນຜູ້ຕິດຕາມ, ຊຸກຍູ້ ບັນດາສະຫະພັັນກິລາຕ່າງໆ ໃຫ້ມີການພັດທະນາຢ່າງບໍ່ຢຸດຢັ້ງ ສ້າງໃຫ້ມີການຫັນປ່ຽນໃໝ່, ນໍາເອົາຜົນງານມາສູ່ປະເທດຊາດໃຫ້ຫຼາຍຂຶ້ນ; ໃນຄະນະບໍລິຫານງານຊຸດໃໝ່ນີ້ປະກອບມີທັງຮຸ່ນອາວຸໂສ, ຮຸ່ນກາງ, ຮຸ່ນໜຸ່ມ, ມີທັງຜູ້ເກົ່າ ແລະ ຜູ້ໃໝ່ ຊຶ່ງສອດຄ່ອງກັບແນວທາງນະໂຍບາຍຂອງພັກ ແລະ ລັດ ເພື່ອເປັນການສ້າງພະນັກງານສືບທອດ ໃນແຕ່ລະໄລຍະ ແລະ ບັນດາສະຫະພັນກິລາປະເພດຕ່າງໆ ແມ່ນຜູ້ນໍາເອົາຜົນງານ, ນໍາເອົາຫຼຽນ, ນໍາເອົາຄວາມພາກພູມໃຈ ໃຫ້ທົ່ວສັງຄົມ ແລະ ປະເທດຊາດ, ສະນັ້ນຕ້ອງເປັນເຈົ້າການພັດທະນາປະເພດກິລາຂອງຕົນຢ່າງເປັນລະບົບຄົບຊຸດ, ນັບຕັ້ງແຕ່ການສ້າງຂັ້ນເຍົາວະຊົນ, ຊາວໜຸ່ມ ແລະ ນັກກິລາອາຊີບ.
 |
ພ້ອມກັນນັ້ນ, ກໍຕ້ອງສົ່ງເສີມໃຫ້ມີການຈັດການແຂ່ງຂັນ ໃນລະດັບຕ່າງໆ ຢ່າງເປັນປົກກະຕິ ເພື່ອເປັນການຝຶກຊ້ອມ ແລະ ຄັດເລືອກເອົານັກກິລາທີ່ໂດດເດັ່ນ ເປັນຕົວແທນຂອງປະເທດລາວ ເຂົ້າແຂ່ງຂັນໃນລະດັບພາກພື້ນ ແລະ ສາກົນ, ຮີບຮ້ອນຖອດຖອນບົດຮຽນ ແລະປັບປຸງສະຫະພັນກິລາປະເພດຕ່າງໆ ໃຫ້ເຄື່ອນໄຫວມີປະສິດທິພາບ, ມີວິໄນ, ມີຜົນງານ, ສ້າງບົດບາດຊື່ສຽງໃຫ້ເດັ່ນຂຶ້ນ, ສ້າງຄວາມເປັນມືອາຊີບ ສາມາດແຂ່ງຂັນກັບພາກພື້ນ ແລະ ສາກົນ ໃຫ້ດີຂຶ້ນ, ຈັດອັນດັບດີຂຶ້ນ; ຄະນະກໍາມະການໂອແລັມປິກຊຸດໃໝ່ຕ້ອງປະສານສົມທົບແໜ້ນກັບກະຊວງສຶກສາທິການ ແລະກິລາ ເພື່ອພ້ອມກັນສ້າງແຜນຍຸດທະສາດກິລາແຫ່ງຊາດລາວ, ຕ້ອງກໍານົດແຈ້ງທິດທາງໃນການພັດທະນາກິລາລາວ; ຄະນະກໍາມະການໂອແລັມປິກແຫ່ງຊາດລາວ ກໍຕ້ອງມີຈຸດສຸມໃນການພັດທະນາ, ຈະຍາດແຍ່ງການຊ່ວຍເຫຼືອໃນຂົງເຂດລະດົມທຶນການປະກອບສ່ວນຂອງທຸກພາກສ່ວນໃນສັງຄົມ ເພື່ອພັດທະນາພື້ນຖານໂຄງການຂອງກິລາໃຫ້ລວມສູນ ໄປລວງດຽວໃນວຽກງານກິລາລາວເປັນຕົ້ນແມ່ນສະຖານທີ່ສ້າງ, ຝຶກນັກກິລາ, ຄົ້ນຄວ້າວຽກກິລາ ຢ່າງເປັນລະບົບ. ເພື່ອເປັນການຫ້າງຫາກະກຽມໃຫ້ແກ່ການເປັນເຈົ້າພາບງານມະຫາກໍາກິລາຊີເກມ ທີ່ ສປປ ລາວ ເຮົາຈະເປັນເຈົ້າພາບໃນປີ 2031.
ຂ່າວ-ພາບ: ບຸນອູ້ມ
ຄໍາເຫັນ