ໃນວັນທີ 12 ພະຈິກຜ່ານມາ ທີ່ນະຄອນຫຼວງວຽງຈັນ ໂດຍການເປັນປະທານຂອງທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີລັດຖະມົນຕີກະຊວງການຕ່າງປະເທດ ທັງເປັນປະທານຄະນະກຳມະການພົວພັນຄົນເຊື້ອຊາດລາວຢູ່ຕ່າງປະເທດ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໂອກາດນີ້, ທ່ານ ຈັນເພັງ ສຸດທິວົງ ຮອງປະທານສູນກາງແນວລາວສ້າງຊາດ (ສນຊ) ໄດ້ສະຫຼຸບລາຍງານວ່າ: ກອງປະຊຸມຄັ້ງນີ້,ໄດ້ດໍາເນີນໄປດ້ວຍບັນຍາກາດອັນອົບອຸ່ນຟົດຟື້ນເບີກບານມ່ວນຊື່ນມີຄວາມສາມັກຄີຮັກແພງ ແລະ ມີເນື້ອໃນອຸດົມສົມບູນ ພີ່ນ້ອງເຊື້ອຊາດລາວໄດ້ຈາກກັນໄປເປັນເວລາດົນນານແລ້ວໄດ້ມາພົບພໍ້ກັນໃນກອງປະຊຸມຄັ້ງປະຫວັດສາດນີ້. ໃນວາລະກອງປະຊຸມໄດ້ຮັບຟັງການສັງລວມນະໂຍບາຍ ແລະ ນິຕິກຳທີ່ຈະອຳນວຍຄວາມສະດວກໃຫ້ແກ່ຄົນເຊື້ອຊາດລາວຢູ່ຕ່າງປະເທດແນໃສ່ສ້າງເງື່ອນໄຂຂໍ້ສະດວກໃຫ້ພີ່ນ້ອງຊາວລາວຢູ່ຕ່າງປະເທດໄດ້ອວ່າຍໜ້າມາຫາປະເທດຊາດອັນເປັນບ້ານເກີດເມືອງນອນຂອງຕົນ ເພື່ອປະກອບສ່ວນດ້ານເຫື່ອແຮງ, ສະຕິປັນຍາ, ທຶນຮອນເຂົ້າໃນພາລະກິດສ້າງສາພັດທະນາປະເທດຊາດ; ຮັບຟັງການລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9ຊຶ່ງເປັນແຜນພັດທະນາເສດຖະກິດ-ສັງຄົມໄລຍະທ້າຍສະໄໝທີ່ລັດຖະບານພວມຈັດຕັ້ງປະຕິບັດໃນປັດຈຸບັນ ແລະ ຮ່າງແຜນພັດທະນາເສດຖະກິດ-ສັງຄົມ 5 ປີຄັ້ງທີ 10 ຈະມີບົດບາດສໍາຄັນຢ່າງຍິ່ງໃນການສືບຕໍ່ຈັດຕັ້ງປະຕິບັດວິໄສທັດການພັດທະນາຂອງລັດຖະບານ ຮອດປີ 2030.
ພ້ອມນີ້, ຍັງໄດ້ສະເໜີໃຫ້ຄະນະພົວພັນຄົນເຊື້ອຊາດລາວຢູ່ຕ່າງປະເທດຄົ້ນຄວ້າໃຫ້ວັດລາວ ຢູ່ແຕ່ລະປະເທດໂດຍມີການປະສານກັບສະຖານເອກອັກຄະລັດຖະທູດລາວໃນປະເທດນັ້ນໆ ສ້າງເງື່ອນໄຂອຳນວຍຄວາມສະດວກໃນວຽກງານພະສະມະນະທູດລາວ (ສະໜອງພະສົງລາວໃຫ້ວັດລາວຢູ່ຕ່າງປະເທດ) ໃຫ້ຖືກຕ້ອງຕາມກົດໝາຍຂອງແຕ່ລະປະເທດ; ສະໜີໃຫ້ພີ່ນ້ອງເຊື້ອຊາດລາວຮຸ້ນຄົນຕ່າງໆ, ນັກວິທະຍາສາດ, ນັກຮຽນຮູ້ປັນຍາຊົນ, ນັກກິລາ, ນັກທຸລະກິດ ແລະ ອາຊີບອື່ນໆ ຄົ້ນຄວ້າເບິ່ງວ່າ ພາຍໃຕ້ຄໍາຂວັນ “ຮັກບ້ານເກີດ” ຕົນເອງຈະສາມາດປະກອບສ່ວນແນວໃດໃນການສ້າງສາພັດທະນາປະເທດລາວ; ຄະນະພົວພັນຄົນເຊື້ອຊາດລາວຢູ່ຕ່າງປະເທດທີ່ມີໜ້າທີ່ຮັບຜິດຊອບໃນວຽກງານຄົນເຊື້ອຊາດລາວຢູ່ຕ່າງປະເທດສືບຕໍ່ປັບປຸງບັນດານິຕິກຳລະດັບຕ່າງໆ ທີ່ມີແລ້ວຕໍ່ພີ່ນ້ອງຄົນເຊື້ອຊາດລາວໃຫ້ສົມບູນຂຶ້ນກວ່າເກົ່າ ແລະ ສ້າງໃໝ່ຕາມຄວາມຈຳເປັນແນໃສ່ສ້າງຄວາມສະດວກ ໃຫ້ພີ່ນ້ອງລາວຢູ່ຕ່າງປະເທດໃນການປະກອບສ່ວນສ້າງສາພັດທະນາປະເທດຊາດ; ສນຊ ສົມທົບກັບສະຖານເອກອັກຄະລັດຖະທູດລາວ ແລະ ກໍາມະການ ສນຊ ຢູ່ຕ່າງປະເທດຂະຫຍາຍຈໍານວນທີ່ປຶກສາ ແລະ ຄູ່ຮ່ວມງານຂອງ ສນຊ ຢູ່ຕ່າງປະເທດໃຫ້ກວ້າງຂວາງອອກຢູ່ໃນແຕ່ລະປະເທດ.
(ຂ່າວ-ພາບ: ວັນເພັງ+ແສງຈັນ)
ຄໍາເຫັນ