ໂດຍການເປັນປະທານ ຂອງ ທ່ານ ນາງ ພອນວັນ ອຸທະວົງ ຮອງລັດຖະມົນຕີກະຊວງ ແຜນການ ແລະ ການລົງທຶນ, ມີບັນດາທ່ານແຂກຖືກເຊີນທີ່ມາຈາກ ກະຊວງ, ຂະແໜງການ ແລະ ອົງການປົກຄອງທ້ອງຖິ່ນ ເຂົ້າຮ່ວມ.
ຈຸດປະສົງໃນກອງປະຊຸມ, ແມ່ນເພື່ອພ້ອມກັນສະຫຼຸບຕີລາຄາຄືນຕໍ່ກັບການຈັດຕັ້ງປະຕິບັດທຶນຊ່ວຍເຫຼືອທາງການເພື່ອການພັດທະນາ(ຊກພ) ທົ່ວປະເທດຄັ້ງທີ 8ປະຈໍາປີ 2024 ແລະ ພ້ອມກັນວາງທິດທາງໃນສຸມປີຕໍ່ໜ້າລວມທັງຕີລາຄາ ຂໍ້ສະດວກ,ຂໍ້ຫຍຸ້ງຍາກ ແລະ ມາດຕະການແກ້ໄຂໃນການຈັດຕັ້ງປະຕິບັດທຶນຊກພ ຮ່ວມກັນໃຫ້ມີປະສິດທິຜົນ, ກ້າວໄປເຖິງການພັດທະນາແບບຍືນຍົງຕາມທິດສີຂຽວ ແລະ ທິດທາງພັດທະນາຂອງລັດຖະບານ.
ສຳລັບການຊ່ວຍເຫຼືອທາງການເພື່ອການພັດທະນາ ໃນໄລຍະຜ່ານມາຈົນເຖິງປັດຈຸບັນແມ່ນມີຄວາມສຳຄັນຫຼາຍໃນການປະກອບສ່ວນເຂົ້າໃນການພັດທະນາ ສປປ ລາວ, ໃນນັ້ນການຊ່ວຍເຫຼືອດັ່ງກ່າວ ຂອງບັນດາຄູ່ຮ່ວມພັດທະນາແມ່ນມີຄວາມຕັ້ງໜ້າເອົາໃຈໃສ່ໃນການສະໜັບສະໜູນທຶນ ຊກພ ໃຫ້ເຂົ້າເຖິງແຕ່ລະຂະແໜງການທັງຂັ້ນສູນກາງຈົນເຖິງຂັ້ນທ້ອງຖິ່ນທີ່ຫ່າງໄກສອກຫຼີກ ແລະ ໄດ້ປະກອບສ່ວນຢ່າງຕໍ່ເນື່ອງເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ ຂອງ ສປປ ລາວໃນແຕ່ລະໄລຍະ, ເຖິງແມ່ນວ່າປະເທດລາວຍັງສືບຕໍ່ປະເຊີນກັບສີ່ງທ້າທ້າຍແລະຄວາມຫຍຸ້ງຍາກຫຼາຍຢ່າງເປັນຕົ້ນບັນຫາດ້ານເສດຖະກິດ-ການເງິນ, ຄ່າຄອງຊີບແພງ, ໄພພິບັດທຳມະຊາດ,ນ້ຳຖ້ວມຫຼາຍແຂວງ, ການລະບາດຂອງພະຍາດສັດ, ການກະກຽມກອງປະຊຸມອາຊຽນ, ແຕ່ກໍຍ້ອນການນຳພາ-ຊີ້ນຳຂອງສູນກາງພັກ, ລັດຖະບານແລະການຕິດຕາມຂອງສະພາແຫ່ງຊາດຢ່າງໃກ້ຊິດບວກກັບການສະໜັບສະໜູນຊ່ວຍເຫຼືອຈາກບັນດາປະເທດເພື່ອນມິດສາກົນກໍຄືເພື່ອນມິດຍຸດທະສາດໃນຂອບການຮ່ວມມືສອງຝ່າຍແລະຫຼາຍຝ່າຍ ໄດ້ເຮັດໃຫ້ການພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີIX ສຳລັບປີ 2024 ມີຄວາມຄືບໜ້າ ແລະ ມີທ່າອຽງທີ່ດີຂຶ້ນ, ສັງຄົມມີຄວາມສະຫງົບແລະມີຄວາມເປັນລະບຽບຮຽບຮ້ອຍໂດຍພື້ນຖານຊຶ່ງເຫັນໄດ້ລວມຍອດຜະລິດຕະພັນພາຍໃນ(GDP) ຕາມແຜນປີ 2024 ແມ່ນຂະຫຍາຍຕົວໃນລະດັບ 4,6% ສາມາດບັນລຸໄດ້ຕາມແຜນ(ມະຕິສະພາແຫ່ງຊາດໝົດປີໃຫ້ບັນລຸ 4,5%)ແລະ ປັດຈຸບັນລັດຖະບານສປປລາວໄດ້ເຜີຍແຜ່, ສ້າງຄວາມຮັບຮູ້ແລະເຂົ້າໃຈກ່ຽວກັບຂະບວນການຫຼຸດພົ້ນອອກຈາກສະຖານະພາບປະເທດດ້ອຍພັດທະນາຂອງສປປລາວ, ຂົນຂວາຍການສະໜັບສະໜູນແລະ ການຊ່ວຍເຫຼືອທາງການຈາກສາກົນ, ລວມທັງການເຂົ້າເຖິງມາດຕະການສະໜັບສະໜູນສາກົນສໍາລັບການສະໜອງທຶນເພື່ອການພັດທະນາ, ຂະແໜງສັງຄົມ, ການອໍານວຍຄວາມສະດວກດ້ານການຄ້າ, ການປ່ຽນແປງດິນຟ້າອາກາດ, ການຫັນເປັນດີຈີຕອນ, ການພັດທະນາພື້ນຖານໂຄງລ່າງ, ປະສານສົມທົບກັບບັນດາຄູ່ຮ່ວມພັດທະນາເພື່ອຕິດຕາມຢ່າງໃກ້ຊິດກ່ຽວກັບສະພາບການພັດທະນາຂອງປະເທດໂດຍຜ່ານກົນໄກການຕິດຕາມແບບມີສ່ວນຮ່ວມ.
(ຂ່າວ: ຜທ, ພາບ: ແສງຈັນ)
ຄໍາເຫັນ