ກອງ​ປະ​ຊຸມສ້າງຕັ້ງສະມາຄົມຖົ່ວລຽນລາວ

ກອງປະຊຸມໄດ້ຜ່ານ ແລະ ຮັບຮອງເອກກະສານຕ່າງໆຄື: ຂໍ້ຕົກລົງ ວ່າດ້ວຍການອະນຸມັດເປີດກອງປະຊຸມສ້າງຕັ້ງສະມາຄົມຖົ່ວລຽນລາວ, ບັນຊີລາຍຊື່ສະມາຊິກສາມັນຂອງສະມາຄົມ, ກົດລະບຽບຂອງສະມາຄົມ ແລະ ແຜນການເຄື່ອນໄຫວ/ແຜນດຳເນີນງານ ຂອງສະມາຄົມ; ຈາກທ່າແຮງດັ່ງກ່າວ, ຄະນະຂົນຂວາຍສ້າງຕັ້ງສະມາຄົມຈຶ່ງໄດ້ມີການເຄື່ອນໄຫວຮ່ວມກັນສ້າງຕັ້ງສະມາຄົມນີ້ຂຶ້ນ ເພື່ອເປັນຕົວແທນຊ່ວຍພາກລັດໃນການຄຸ້ມຄອງວຽກງານຖົ່ວລຽນລາວ (ຜູ້ປະກອບການກ່ຽວກັບຖົ່ວລຽນຢູ່ ສປປ ລາວ, ຊາວສວນຖົ່ວລຽນ) ໃຫ້ເຂົ້າສູ່ການຄຸ້ມຄອງດ້ວຍກົດໝາຍ ແລະ ລະບຽບການ, ເພື່ອປະກອບສ່ວນເຂົ້າໃນການຜັນຂະຫຍາຍແນວທາງນະໂຍບາຍຂອງພັກ ແລະ ລັດຖະບານໃນການຫຼຸດຜ່ອນຄວາມທຸກຍາກຂອງປະຊາຊົນ, ແນໃສ່ເຕົ້າໂຮມຄວາມສາມັກຄີ ແລະ ສົ່ງເສີມໃຫ້ສະມາຊິກຂອງສະມາຄົມມີຄວາມຮູ້ຄວາມສາມາດ ກ່ຽວກັບເຕັກນິກການປູກ ແລະ ການບົວລະບັດຮັກສາຖົ່ວລຽນຢ່າງຖືກຕ້ອງຕາມເຕັກນິກວິຊາການ, ເພື່ອເຮັດໃຫ້ໄດ້ຖົ່ວລຽນທີ່ມີຄຸນນະພາບ, ໄດ້ມາດຕະຖານ, ສາມາດເປັນສິນຄ້າຈຳໜ່າຍພາຍໃນ ແລະ ສົ່ງອອກຂາຍຕ່າງປະເທດ ຫຼື ການແປຮູບເປັນຜະລິດຕະພັນຖົ່ວລຽນລາວ ຕາມມາດຕະຖານຂອງສາກົນ.

ຈາກນັ້ນ, ທ່ານ ແສງປະເສີດ ມັດທຸຈັນ ປະທານຄະນະຂົນຂວາຍສ້າງຕັ້ງສະມາຄົມ ໄດ້ກ່າວເປີດກອງປະຊຸມຢ່າງເປັນທາງການໂດຍໄດ້ຍົກໃຫ້ເຫັນວ່າ: “ການສ້າງຕັ້ງສະມາຄົມຖົ່ວລຽນລາວ ແມ່ນບາດກ້າວທີ່ສຳຄັນ ຂອງວຽກງານຖົ່ວລຽນລາວທີ່ມີການພັດທະນາຢ່າງໄວວາ, ແນໃສ່ຮັບປະກັນການ ຈັດຕັ້ງປະຕິບັດພາລະບົດບາດ, ໜ້າທີ່ໃຫ້ມີຄວາມໂປ່ງໃສ, ເປັນລະບົບ ແລະ ປົກປ້ອງສິດຜົນ ປະໂຫຍດອັນຊອບທຳຂອງສະມາຊິກ ແລະ ສະມາຄົມຖົ່ວລຽນລາວ ຄື: 1). ເພື່ອປະກອບສ່ວນຈັດຕັ້ງປະຕິບັດ ແຜນພັດທະນາເສດຖະກິດ ແລະ ສັງຄົມແຫ່ງຊາດ ເວົ້າລວມ ເວົ້າສະເພາະ ໃນວຽກງານທີ່ຕິດພັນກັບການຜະລິດ, ການກວດກາຄຸນນະພາບ, ການຫຸ້ມຫໍ່, ການປຸງແຕ່ງ, ການຄ້າ ແລະ ການສົ່ງອອກຖົ່ວລຽນ, 2). ເພື່ອຊຸກຍູ້, ສົ່ງເສີມປະຊາຊົນ ແລະ ສະມາຊິກຂອງສະມາຄົມ ປູກຖົ່ວລຽນໃຫ້ຖືກຕ້ອງຕາມເຕັກນິກວິຊາການ(ການກ້າເບ້ຍຖົ່ວລຽນ, ການບົວລະບັດສວນກ້າ, ການກະກຽມດິນ, ການບົວລະບັດຮັກສາ, ການໃສ່ຝຸ່ນ, ໃສ່ປຸຍເຄມີ, ປຸຍຊີວະພາບ ຕາມມາດຕະຖານກະສິກຳສະອາດ ແລະ ມາດຕະຖານຖົ່ວລຽນສົ່ງອອກ), 3). ເຕົ້າໂຮມສະມາຊິກ ທີ່ເປັນບຸກຄົນ ແລະ ນິຕິບຸກຄົນ ທີ່ດຳເນີນທຸລະກິດຕິດພັນກັບວຽກງານຖົ່ວລຽນ ແລະ ກຸ່ມຊາວສວນຖົ່ວລຽນລາວ ເຂົ້າສູ່ການຈັດຕັ້ງດຽວກັນ ເພື່ອສ້າງເປັນກຳລັງແຮງ, ສະສົມທຶນຮອນ, ເສີມຂະຫຍາຍສະຕິປັນຍາ, ທ່າແຮງ ເພື່ອພ້ອມກັນພັດທະນາວຽກງານຖົ່ວລຽນລາວ ໃຫ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ມີຄວາມເຂັ້ມແຂງ ແລະ ຍືນຍົງ, ສອດຄ່ອງກັບກົນໄກຕະຫຼາດ, ແນວທາງນະໂຍບາຍ, ກົດໝາຍ ແລະ ລະບຽບການຂອງ ສປປ ລາວ; 4). ສົ່ງເສີມ ແລະ ປົກປ້ອງສິດ ຜົນປະໂຫຍດອັນຊອບທຳຂອງສະມາຊິກສະມາຄົມ, ຜູ້ປະກອບການ ແລະ ນິຕິບຸກຄົນທີ່ກ່ຽວຂ້ອງກັບການຜະລິດ, ການເກັບຊື້, ການກວດກາຄຸນນະພາບ, ໂຮງເຮືອນຫຸ້ມຫໍ່, ການປຸງແຕ່ງ, ການສົ່ງອອກຂອງກຸ່ມຊາວສວນຖົ່ວລຽນ ແລະ ຜູ້ປະກອບການ ກ່ຽວກັບຖົ່ວລຽນ, ສົມທົບກັບພາກລັດ ສະກັດກັ້ນການນຳເຂົ້າຖົ່ວລຽນຈາກຕ່າງປະເທດ.“

ກອງປະຊຸມໄດ້ເລືອກຕັ້ງຄະນະບໍລິຫານສະມາຄົມ ມີຜູ້ສະໝັກຈຳນວນ 7 ທ່ານ ເລືອກເອົາ 5 ທ່ານ, ກອງປະຊຸມຄັ້ງປະຖົມມະລືກ ໄດ້ເຫັນດີເປັນເອກະພາບ ສະເໜີເອົາຄະນະບໍລິຫານສະມາຄົມຖົ່ວລຽນລາວ ປະກອບມີ: ທ່ານ ແສງປະເສີດ ມັດທຸຈັນ ເປັນປະທານສະມາຄົມ; ທ່ານ ນາງ ປຸກກີ່ ພົງສະວັດ ແລະ ທ່ານ ແກ້ວຕາ ແລວຄຳ ເປັນຮອງປະທານ; ທ່ານ ປັນຈາ ລາດຊະວົງ ແລະ ທ່ານ ສຸວັນນີ ສຸທຳມະວົງ ເປັນຄະນະ; ທ່ານ ອຸດົງ ແກ້ວມີເພັດ ເປັນປະທານກວດກາສະມາຄົມ; ທ່ານ ສີສຸພັນ ຫຼ້າວິໄລແສງ ເປັນຮອງປະທານ ແລະ ທ່ານ ສຸກັນ ວັນວິໄລ ເປັນຄະນະ.

ໃນຕອນທ້າຍ, ກອງປະຊຸມໄດ້ຮັບຟັງການປະກອບຄຳເຫັນຈາກ ທ່ານ ຫວັງ ຊິນຢີ້ ປະທານບໍລິສັດ ຢີ້ກົວ ກະສິກຳຈຳກັດຜູ້ດຽວ ສະມາຊິກຂອງສະມາຄົມ ໄດ້ມີຄຳເຫັນກ່ຽວກັບວຽກງານຖົ່ວລຽນຢູ່ ສປ ຈີນ. ສະມາຄົມຖົ່ວລຽນຈີນ ເປັນຜູ້ກຳນົດມາດຕະຖານຖົ່ວລຽນ, ຈີນແມ່ນຕະຫຼາດໃຫຍ່ ນຳເຂົ້າຖົ່ວລຽນຫຼາຍທີ່ສຸດ ປະມານ 90% ຂອງຜົນຜະລິດຈາກບັນດາປະທດໃນທົ່ວໂລກ. ທ່ານ ສັງຄົມ ຈັນສຸກ ຮອງປະທານສະພາການຄ້າ ແລະ ອຸດສາຫະກຳ ແຫ່ງຊາດລາວ. ທ່ານໄດ້ສະແດງຄວາມເຊື່ອໝັ້ນຕໍ່ຄະນະບໍລິຫານງານສະມາຄົມ ແລະ ເນັ້ນໜັກໃຫ້ຄະນະບໍລິຫານສະມາຄົມ ແບ່ງງານກັນຢ່າງລະອຽດ, ຮັກສາຄວາມສາມັກຄີ, ປະທານຕ້ອງມີຄວາມເຂັ້ມແຂງ, ວາງຍຸດທະສາດ, ແຜນດຳເນີນງານເປັນແຕ່ລະໄລຍະ, ຫັນເປັນແຜນການ, ແຜນດຳເນີນງານຕົວຈິງ. ພ້ອມດຽວກັນນັ້ນ ພາກລັດຕ້ອງໃຫ້ຄວາມສຳຄັນ, ທ່ານໄດ້ເນັ້ນໜັກໃຫ້ກຸ່ມຊາວສວນຖົ່ວລຽນ ເສີມຂະຫຍາຍສະຕິປັນຍາ ນຳເອົາແນວທາງນະໂຍ ບາຍຂອງພັກ ສອດແຊກເຂົ້າໃນວຽກງານການຜະລິດ, ການເກັບຊື້, ການກວດກາຄຸນນະພາບ, ໂຮງເຮືອນຫຸ້ມຫໍ່, ການປຸງແຕ່ງ, ການສົ່ງອອກຂອງກຸ່ມຊາວສວນຖົ່ວລຽນ ເພື່ອໃຫ້ເຂົ້າເຖິງຈິດໃຈຂອງປະຊາຊົນຢ່າງເລິກເຊິ່ງ.

(ຂ່າວ: ກະຊວງ ກສ)