ວິທະຍຸກະຈາຍສຽງຫວຽດນາມລາຍງານວ່າ: ກອງປະຊຸມເວທີປາໄສເສດຖະກິດໂລກ (WEF) ປີ 2024 ຢູ່ ນະຄອນດາໂວສ ຂອງສະວິດ ໄດ້ດຳເນີນແຕ່ວັນທີ 15 – 19 ມັງກອນ 2024, ດ້ວຍຫົວຂໍ້: ສ້າງຄວາມເຊື່ອໝັ້ນຄືນ ໃໝ່.
ຂ່າວລະບຸວ່າ: ຫົວຂໍ້ດັ່ງກ່າວໄດ້ສະແດງໃຫ້ເຫັນເປົ້າໝາຍຂອງ WEF ໃນປີນີ້ ໂດຍໄດ້ເນັ້ນໜັກເຖິງຄວາມຈຳເປັນຕ້ອງຟື້ນຟູຄວາມເຊື່ອໝັ້ນຕໍ່ສິ່ງທ້າທາຍຕ່າງໆໃນທົ່ວໂລກ, ລວມທັງການປະທະກັນດ້ານພູມີສາດການເມືອງ, ການປ່ຽນແປງຂອງດິນຟ້າອາກາດ ແລະ ບັນດາຄວາມຄືບໜ້າໃນເຕັກໂນໂລຊີ ເປັນຕົ້ນແມ່ນປັນຍາປະດິດ (AI). ໄປຄຽງຄູ່ກັນນັ້ນ, ຈຸດສຸມຂອງການປຶກສາຫາລືຄັ້ງຕ່າງໆ ແມ່ນມຸ່ງໄປເຖິງການຊອກຫາມາດຕະການ, ສຸມໃສ່ລັກສະນະໂປ່ງໃສ, ສະເໝີຕົ້ນສະເໝີປາຍ ແລະ ມີຄວາມຮັບຜິດຊອບ.
ຕາມຂໍ້ມູນຈາກ WEF ແລ້ວ, ມີຜູ້ຕາງໜ້າປະມານ 100 ປະເທດ, ບັນດາອົງການຈັດຕັ້ງສາກົນໃຫຍ່ ແລະ ບໍລິສັດຄູ່ຮ່ວມມື 1.000 ແຫ່ງ ເຂົ້າຮ່ວມ ພ້ອມກັບນັກຊ່ຽວຊານ, ຜູ້ເຄື່ອນໄຫວວຽກງານຊາວໜຸ່ມ, ນັກທຸລະກິດ ແລະ ວົງການສື່ມວນຊົນ. ດ້ວຍຄວາມປາຖະໜາວ່າ ກອງປະຊຸມຈະແມ່ນເວທີປາໄສແບ່ງປັນທັດສະນະ ແລະ ບັນດາມາດຕະການ, WEF ຫວັງວ່າ ເຫດການນີ້ ຈະສ້າງຜົນກະທົບທີ່ເປັນຮູບປະທຳ, ຫັນແນວຄວາມຄິດໃຫ້ເປັນການກະທຳຕົວຈິງ ແລະ ປະຕິບັດມາດຕະການຕ່າງໆໃຫ້ປະກົດຜົນເປັນຈິງ.
ຄໍາເຫັນ