ທີ່ຄະນະໂຄສະນາອົບຮົມສູນກາງພັກ (ຄອສພ). ມາຮອດ ວັນທີ 24 ມັງກອນນີ້, ກອງປະຊຸມດັ່ງກ່າວ ໄດ້ປິດລົງດ້ວຍຜົນສໍາເລັດອັນຈົບງາມ ໂດຍການເປັນກຽດເຂົ້າຮ່ວມຂອງ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກຜູ້ປະຈຳການຄະນະເລຂາທິການສູນກາງພັກຮອງປະທານປະເທດແຫ່ງ ສປປ ລາວ ແລະ ໂດຍການເປັນປະທານຂອງສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ, ມີບັນດາຮອງ ຄອສພ, ມີບັນດາສະຫາຍຄະນະປະຈຳພັກ, ຫົວໜ້າ-ຮອງຫົວໜ້າຄະນະໂຄສະນາອົບຮົມແຂວງ, ນະຄອນຫຼວງ, ຜູ້ຮັບຜິດຊອບວຽກງານໂຄສະນາອົບຮົມ ຂອງບັນດາກະຊວງ-ອົງການໃນຂອບເຂດທົ່ວປະເທດ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໃນພິທີ, ສະຫາຍຄໍາພັນ ເຜີຍຍະວົງໄດ້ກ່າວວ່າ: ກອງປະຊຸມໃນຄັ້ງນີ້, ໄດ້ຮັບຟັງລາຍງານການສະຫຼຸບຕີລາຄາການຈັດຕັ້ງປະຕິບັດວຽກງານໂຄສະນາອົບຮົມ ໃນໄລຍະ 1 ປີ ຜ່ານມາ ແລະ ວາງທິດທາງວຽກງານຈຸດສຸມສໍາລັບປີ 2025 ແລະ ບົນຈິດໃຈເອກະລາດເປັນເຈົ້າຕົນເອງ ໃນວຽກງານໂຄສະນາອົບຮົມໃນໄລຍະໃໝ່.ພ້ອມກັນນັ້ນ, ຜູ້ເຂົ້າຮ່ວມໄດ້ຄົ້ນຄວ້າປະກອບຄວາມຄິດຄວາມເຫັນຢ່າງກົງໄປ-ກົງມາຕໍ່ບັນຫາຕ່າງໆທີ່ຕັ້ງຂຶ້ນເຮັດໃຫ້ບັນຍາກາດຂອງກອງປະຊຸມມີຄວາມຟົດຟື້ນ, ສ້າງສັນ, ຈິງອົກຈິງໃຈ ແລະ ມີເນື້ອໃນຄວາມໝາຍຢ່າງເລິກເຊິ່ງ;ກອງປະຊຸມວຽກງານໂຄສະນາອົບຮົມທົ່ວປະເທດ ປະຈໍາປີ 2024 ໄດ້ສໍາເລັດລົງຕາມຈຸດປະສົງລະດັບຄາດໝາຍ ແຕ່ບັນດາໜ້າທີ່ວຽກງານທີ່ໄດ້ປຶກສາຫາລື ແລະ ຕົກລົງໃນກອງປະຊຸມຄັ້ງນີ້ ແມ່ນຍັງໜັກໜ່ວງ ແລະ ແມ່ນພາລະໜ້າທີ່ຂອງໝົດທຸກຄົນ ພວກເຮົາຕ້ອງຈັດຕັ້ງຜັນຂະຫຍາຍໃຫ້ປະກົດຜົນເປັນຈິງ.ທ່ານ ຄໍາພັນ ເຜີຍຍະວົງຍັງໄດ້ສະເໜີບັນດາສະຫາຍເຂົ້າຮ່ວມກອງປະຊຸມ, ຈົ່ງເອົາໃຈໃສ່ບາງວຽກງານດັ່ງນີ້: 1. ໃຫ້ບັນດາສະຫາຍຫົວໜ້າຄະນະໂຄສະນາອົບຮົມແຂວງ, ນະຄອນຫຼວງ ແລະ ບັນດາສະຫາຍ ທີ່ຮັບຜິດຊອບວຽກງານໂຄສະນາອົບຮົມຂອງບັນດາກະຊວງ-ອົງການອ້ອມຂ້າງສູນກາງ ຈົ່ງນໍາເອົາເນື້ອໃນຈິດໃຈຂອງກອງປະຊຸມຄັ້ງນີ້ ໄປເຜີຍແຜ່ເຊື່ອມຊຶມໃນຂະແໜງການ ແລະ ທ້ອງຖິ່ນຕົນໃຫ້ເລິກເຊິ່ງ, ທົ່ວເຖິງໃນຂົງເຂດຄວາມຮັບຜິດຊອບຂອງຕົນ;2.ໃຫ້ບັນດາສະຫາຍຄະນະປະຈຳພັກ, ຄະນະພັກ, ຜູ້ຮັບຜິດຊອບວຽກງານການເມືອງ-ແນວຄິດເວົ້າລວມ, ວຽກງານໂຄສະນາອົບຮົມ. ເວົ້າສະເພາະຕ້ອງມີຄວາມຮັບຜິດຊອບໂດຍກົງໃນການຫັນເອົາເນື້ອໃນຈິດໃຈກອງປະຊຸມຄັ້ງນີ້ ເປັນແຜນງານ ແລະ ໂຄງການອັນລະອຽດຂອງຂະແໜງການ ແລະ ທ້ອງຖິ່ນຕົນ, ທັງນໍາພາຈັດຕັ້ງປະຕິບັດໃຫ້ປະກົດຜົນເປັນຈິງ ແນໃສ່ເຮັດໃຫ້ວຽກງານໂຄສະນາອົບຮົມແຕ່ລະຂັ້ນມີການຫັນປ່ຽນໃໝ່ຢ່າງເລິກເຊິ່ງ, ແຂງແຮງ ແລະ ຮອບດ້ານເຮັດໃຫ້ວຽກງານໂຄສະນາອົບຮົມມີຊີວິດຊີວາກວ່າເກົ່າ ທັງຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່;3. ຄະນະພັກແຕ່ລະຂັ້ນຕ້ອງເພີ່ມທະວີການນໍາພາ-ຊີ້ນໍາ ຄະນະໂຄສະນາອົບຮົມໃນຂັ້ນຂອງຕົນ ໃນການຄົ້ນຄວ້າປັບປຸງກົງຈັກການຈັດຕັ້ງຕິດພັນກັບວຽກງານຈັດວາງສັບຊ້ອນພະນັກງານ, ການບຳລຸງສ້າງຖັນແຖວພະນັກງານທີ່ເຮັດວຽກງານການເມືອງ-ແນວຄິດ ໃຫ້ມີຄວາມຮູ້-ຄວາມສາມາດ, ມີທັດສະນະຫຼັກໝັ້ນການເມືອງໜັກແໜ້ນ, ມີອຸດົມການ ແລະ ເຊື່ອໝັ້ນຕໍ່ການນໍາພາຂອງພັກ.ພ້ອມກັນນັ້ນ, ຕ້ອງສ້າງສິ່ງອໍານວຍຄວາມສະດວກໃນການເຄື່ອນໄຫວຈັດຕັ້ງປະຕິບັດໜ້າທີ່ຂອງຕົນໃຫ້ມີຄຸນນະພາບ ແລະ ມີປະສິດທິຜົນ;4.ຄະນະໂຄສະນາອົບຮົມແຕ່ລະຂັ້ນ ຕ້ອງເພີ່ມທະວີການປະສານສົມທົບກັບພາກສ່ວນຕ່າງໆ ທັງພາຍໃນ ແລະ ພາຍນອກ ເພື່ອສ້າງເງື່ອນໄຂສະດວກໃນການເຄື່ອນໄຫວປະຕິບັດໜ້າທີ່ວຽກງານຂອງຕົນ ໃຫ້ມີຜົນສໍາເລັດໃຫຍ່ຫຼວງກວ່າເກົ່າ.
ໃນໂອກາດນີ້, ສະຫາຍ ບຸນທອງ ຈິດມະນີ ໄດ້ໃຫ້ກຽດມີຄໍາເຫັນໂອ້ລົມກ່ອນອື່ນໄດ້ສະແດງຄວາມຍ້ອງຍໍຊົມເຊີຍຜົນງານທີ່ຍາດມາໄດ້ໃນໄລຍະຜ່ານມາພ້ອມມີຄຳເຫັນເຈາະຈິ້ມຈຳນວນໜຶ່ງດັ່ງນີ້: 1.ສ້າງການຫັນປ່ຽນວຽກງານໂຄສະນາອົບຮົມ ໄປສູ່ຄຸນນະພາບໃໝ່ ຕ້ອງສອດຄ່ອງກັບແນວທາງຂອງພັກ ໃນແຕ່ລະໄລຍະ.ການສ້າງການຫັນປ່ຽນວຽກງານໂຄສະນາອົບຮົມໄປສູ່ຄຸນນະພາບໃໝ່ ຕ້ອງຢູ່ບົນພື້ນຖານແນວທາງນະໂຍບາຍຂອງພັກ ໃນແຕ່ລະໄລຍະ; ຕ້ອງຮັບໃຊ້ແນວທາງ, ຈຸດປະສົງ ແລະ ເປົ້າໝາຍຂອງພັກ; ໃນເງື່ອນໄຂປັດຈຸບັນ ທີ່ທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ ພວມສືບຕໍ່ດໍາເນີນພາລະກິດປ່ຽນແປງໃໝ່ຮອບດ້ານຢ່າງມີຫຼັກການຂອງພັກ, ການບູລະນະລະບອບປະຊາທິປະໄຕປະຊາຊົນ ເພື່ອກ້າວເດີນສູ່ຈຸດໝາຍສັງຄົມນິຍົມ ກໍຄືສ້າງປະເທດຊາດມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ປະຊາທິປະໄຕ, ຍຸຕິທໍາ ແລະ ສີວິໄລ. ບັນຫາສໍາຄັນອັນໜຶ່ງຕ້ອງກໍາແໜ້ນທິດທາງ, ໜ້າທີ່ວຽກງານຈຸດສຸມໃນການປັບປຸງ ແລະ ຍົກສູງຄຸນນະພາບວຽກງານໂຄສະນາອົບຮົມ ທີ່ກໍານົດໄວ້ຢູ່ໃນກອງປະຊຸມໃຫຍ່ສະມາຊິກພັກ ຄັ້ງທີ V ຂອງອົງຄະນະພັກ, ຄະນະໂຄສະນາອົບຮົມສູນກາງພັກທີ່ໄດ້ເນັ້ນໜັກວ່າ: “ການປັບປຸງວຽກງານໂຄສະນາອົບຮົມ ໃຫ້ສາມາດຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນສະພາບການໃໝ່, ມີຄວາມຈໍາເປັນຕ້ອງສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ນັບແຕ່ດ້ານແນວຄິດ-ຈິນຕະນາການ ແບບແຜນການນໍາພາ, ວິທີເຮັດວຽກຂອງຄະນະພັກ ແລະ ສະມາຊິກພັກ-ພະນັກງານ ບົນພື້ນຖານຢຶດໝັ້ນຕາມຫຼັກການຂອງພັກຢ່າງເຂັ້ມງວດ, ສ້າງບາດກ້າວບຸກທະລຸ ເພື່ອໃຫ້ຜົນການປະຕິບັດໜ້າທີ່ວຽກງານມີຄຸນນະພາບຢ່າງແທ້ຈິງ; 2. ສ້າງການຫັນປ່ຽນວຽກງານໂຄສະນາອົບຮົມ ໄປສູ່ຄຸນນະພາບໃໝ່ ຕ້ອງຮັບປະກັນລັກສະນະພັກ, ລັກສະນະຕໍ່ສູ້, ລັກສະນະວິທະຍາສາດ-ຕົວຈິງ ແລະ ລັກສະນະມະຫາຊົນ. ຮັບປະກັນລັກສະນະນໍາພາ ຫຼື ລັກສະນະພັກ;ຮັບປະກັນລັກສະນະຕໍ່ສູ້; ຮັບປະກັນລັກສະນະວິທະຍາສາດ-ຕົວຈິງ ແລະ ຮັບປະກັນລັກສະນະມະຫາຊົນ; 3.ສ້າງການຫັນປ່ຽນວຽກງານໂຄສະນາອົບຮົມໄປສູ່ຄຸນນະພາບໃໝ່ ຕ້ອງຕອບສະໜອງໄດ້ກັບຄວາມຮຽກຮ້ອງຕ້ອງການໜ້າທີ່ການເມືອງຂອງພັກໃນໄລຍະໃໝ່.ວຽກງານໂຄສະນາອົບຮົມ ຕ້ອງໄດ້ເອົາໃຈໃສ່ສຶກສາອົບຮົມໃຫ້ພະນັກງານ, ສະມາຊິກພັກ ແລະ ປະຊາຊົນບັນດາເຜົ່າ ມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ແນວທາງນະໂຍບາຍຂອງພັກ ໂດຍສະເພາະແມ່ນການດໍາເນີນພາລະກິດປ່ຽນແປງໃໝ່ຮອບດ້ານຢ່າງມີຫຼັກການຂອງພັກ ຊຶ່ງແມ່ນແນວທາງປະຕິບັດພື້ນຖານແຫ່ງການສ້າງລະບອບປະຊາທິປະໄຕປະຊາຊົນ ເພື່ອກ້າວເດີນສູ່ສັງຄົມນິຍົມ ໂດຍອີງໃສ່ຫຼັກມູນພື້ນຖານຂອງທິດສະດີມາກ-ເລນິນ, ອີງໃສ່ສະພາວະຄວາມເປັນຈິງຂອງປະເທດຊາດ ແລະ ບົດຮຽນແຫ່ງການນໍາພາ-ຊີ້ນໍາພາລະກິດປະຕິວັດ ໃນໄລຍະຜ່ານມາສົມທົບກັບບົດຮຽນການນໍາພາຂອງພັກອ້າຍນ້ອງ ແລະ ບົດຮຽນແຫ່ງການສ້າງສາພັດທະນາຂອງປະເທດຕ່າງໆ. ພ້ອມກັນນັ້ນ, ກໍໃຫ້ເຂົາເຈົ້າເຫັນແຈ້ງຈຸດປະສົງຕົ້ນຕໍ ແນໃສ່ເພື່ອປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ມີປະຊາທິປະໄຕ, ຍຸຕິທໍາ ແລະ ສີວິໄລ; ເພື່ອໃຫ້ໄດ້ຕາມທິດດັ່ງກ່າວວຽກງານໂຄສະນາອົບຮົມ ຕ້ອງໄດ້ສ້າງການຫັນປ່ຽນໄປສູ່ຄຸນນະພາບໃໝ່ຢ່າງແຂງແຮງ, ເລິກເຊິ່ງ ແລະ ຮອບດ້ານ ດ້ວຍການສ້າງເອກະສານໂຄສະນາອົບຮົມ ໃຫ້ມີຈໍານວນພຽງພໍ ສໍາລັບເປົ້າໝາຍຕ່າງໆ, ມີເນື້ອໃນທີ່ອຸດົມສົມບູນ, ມີລັກສະນະປຸກລະດົມຊວນເຊື່ອ, ເຂົ້າໃຈງ່າຍ ແລະ ແທດເໝາະກັບແຕ່ລະເປົ້າໝາຍ ຈຶ່ງສາມາດເຮັດໃຫ້ມະຫາຊົນເຊື່ອໝັ້ນຕໍ່ການນໍາພາຂອງພັກ, ການຄຸ້ມຄອງຂອງລັດ, ຕັ້ງໜ້າປະກອບສ່ວນຈັດຕັ້ງປະຕິບັດໃຫ້ປະກົດຜົນເປັນຈິງ. ໃນນັ້ນ, ໃຫ້ເອົາໃຈໃສ່ຊຸກຍູ້ວຽກດີ-ຄົນເດັ່ນ ໃນຂະບວນການແຂ່ງຂັນຮັກຊາດ ແລະ ພັດທະນາໃຫ້ແຂງແຮງ, ມີບັນຍາກາດຟົດຟື້ນ ແລະ ກວ້າງຂວາງກວ່າເກົ່າ ໂດຍການສ້າງໃຫ້ມີລາຍການອອກຂ່າວໂຄສະນາຜ່ານສື່ຕ່າງໆປະຈໍາວັນເປັນຕົ້ນແມ່ນ ວຽກດີຜົນງານໃໝ່ເຊັ່ນ: ປຶ້ມ, ເພງ, ການປະດິດແຕ່ງ, ການປະດິດສ້າງ, ການຄົ້ນພົບ, ເຕັກນິກ, ວິທະຍາສາດ, ວັດທະນະທໍາ, ຂະບວນການຜະລິດ, ການເຮັດວຽກງານ, ການຮໍ່າຮຽນ, ການສ້າງຄວາມດີໄປພ້ອມກັບການຍົກໃຫ້ເຫັນຄົນເດັ່ນເຊັ່ນ: ນັກວິທະຍາສາດ, ນັກຂຽນ, ນັກຄົ້ນຄວ້າ, ວິຈິດຕະກອນ, ສິລະປະກອນ, ລັດຖະກອນ, ກະສິກອນ, ນັກກິລາ, ຜູ້ຊົງຄຸນວຸດທິ, ຜູ້ສ້າງຄຸນງາມຄວາມດີ, ຜູ້ເປັນແບບຢ່າງ, ຜູ້ແກ້ໄຂບັນຫາຄວາມຫຍຸ້ງຍາກ, ຜູ້ນໍາໜ້າພາທາງຂະບວນພັດທະນາ; 4.ສ້າງການຫັນປ່ຽນວຽກງານໂຄສະນາອົບຮົມ ໄປສູ່ຄຸນນະພາບໃໝ່ ຕ້ອງຕິດພັນກັບຍຸດທະສາດພັດທະນາວຽກງານໂຄສະນາອົບຮົມ.ຍຸດທະສາດພັດທະນາວຽກງານໂຄສະນາອົບຮົມຮອດປີ 2030 ແລະ ແຜນພັດທະນາວຽກງານໂຄສະນາອົບຮົມແຕ່ປີ 2021-2025 ທີ່ກອງປະຊຸມໃຫຍ່ສະມາຊິກພັກ ຄັ້ງທີ V ອົງຄະນະພັກ ຄອສພ ໄດ້ກໍານົດໄວ້. ທັງໝົດນັ້ນ, ແມ່ນເພື່ອສ້າງການຫັນປ່ຽນວຽກງານໂຄສະນາອົບຮົມຂອງພັກໄດ້ຮັບການເຊີດຊູສູງຂຶ້ນເຮັດໃຫ້ວຽກງານດັ່ງກ່າວຂຶ້ນສູ່ຄຸນນະພາບໃໝ່, ສາມາດເຮັດຫຼ້ອນໜ້າທີ່ການເມືອງ ທີ່ພັກມອບໝາຍໃຫ້.
(ຂ່າວ-ພາບ: ວັນເພັງ+ແສງຈັນ)
ຄໍາເຫັນ