ກົນໄກ ແລະ ມາດຕະການຈັດຕັ້ງປະຕິບັດຂະແໜງ ພບ ໃນທ້າຍສະໄໝ

ໂດຍ: ສຳນານ ພົມພັກດີ
ກະຊວງພະລັງງານ-ບໍ່ແຮ່ (ພບ)ໄດ້ວາງກົນໄກ ແລະ ມາດຕະການຈັດຕັ້ງປະຕິບັດແຜນພັດທະນາຂະແໜງພະລັງງານ-ບໍ່ແຮ່5ປີ ຄັ້ງທີ IX (2021-2025)ໃນທ້າຍສະໄໝ ໂດຍຈະພັດທະນາແຫຼ່ງຜະລິດໄຟຟ້າທີ່ອີງໃສ່ຄວາມຕ້ອງການຕົວຈິງໃນແຕ່ລະໄລຍະ, ໃນຂະນະດຽວກັນຈະເລັ່ງລັດປະເມີນປະລິມານສະສົມແຮ່,ຈັດປະເພດເຂດທີ່ມີທ່າແຮງດ້ານແຮ່ ແລະ ຈຳແນກຊັບພະຍາກອນແຮ່ທາດຕາມລະບົບສາກົນ.
    ກົນໄກ ແລະ ມາດຕະການຈັດຕັ້ງປະຕິບັດ ຂະແໜງພະລັງານ ແລະ ບໍ່ແຮ່ ໂດຍສະເພາະການພັດທະນາແຫຼ່ງຜະລິດໄຟຟ້າຕ້ອງອີງໃສ່ຄວາມຕ້ອງການຕົວຈິງໃນແຕ່ລະໄລຍະໂດຍຈະສົ່ງເສີມແຫຼ່ງຜະລິດທີ່ມີອ່າງໂຕ່ງເປັນບຸລິມະສິດ ພ້ອມນັ້ນກໍພັດທະນາໄຟຟ້າຄວາມຮ້ອນຖ່ານຫີນ ແລະ ພະລັງານທົດແທນ ຕາມສັດສ່ວນທີ່ກໍານົດໄວ້ ເພື່ອຮັບປະກັນການຕອບສະໜອງພະລັງງານໄຟຟ້າພາຍໃນປະເທດ ແລະ ສົ່ງອອກໃຫ້ມີສະຖຽນລະພາບ,ສົ່ງເສີມການເຊື່ອມໂຍງລະບົບຕາຂ່າຍ ກັບ ສາຍສົ່ງໄຟຟ້າໃນຂອບເຂດທົ່ວປະເທດ ເພື່ອສ້າງຄວາມໝັ້ນຄົງດ້ານພະລັງງານໄຟຟ້າຢູ່ພາຍໃນປະເທດຢ່າງພຽງພໍ ແລະ ທົ່ວເຖິງ,ສຶກສາຕະຫຼາດຈຳໜ່າຍໄຟຟ້າທີ່ແນ່ນອນ, ໂດຍເຈລະຈາຂາຍໄຟຟ້າກັບປະເທດເພື່ອນບ້ານ ແລະ ບັນດາປະເທດອາຊຽນໃຫ້ປະກົດຜົນເປັນຈິງ.ພ້ອມທັງກຳນົດນະໂຍບາຍລາຄາໄຟຟ້າທີ່ຊັດເຈນ ໃນຂະແໜງອຸດສາຫະກຳໜັກ ແລະ ອຸດສາຫະກຳຂຸດຄົ້ນແຮ່ທາດ ທີ່ມີຄວາມຕ້ອງການໄຟຟ້າສູງ ທັງເປັນການສ້າງຕະຫຼາດຈໍາໜ່າຍໄຟຟ້າຢູ່ພາຍໃນປະເທດໃຫ້ຫຼາຍຂຶ້ນ,ແບ່ງປັນງົບປະມານຂອງລັດ ເພື່ອມານຳໃຊ້ເຂົ້າໃນການສໍາຫຼວດສ້າງຂໍ້ມູນພື້ນຖານ ເພື່ອສ້າງເປັນແຜນທີ່ທໍລະນີສາດ ແລະ ແຮ່ທາດ ມາດຕາສ່ວນ 1/200.000 ແລະ 1/50.000 ແລະ ສ້າງຖານຂໍ້ມູນທໍລະນີສາດ ແລະ ແຮ່ທາດທໍລະນີວິສະວະກໍາບໍ່ແຮ່, ທໍລະນີໄພພິບັດ, ທໍລະນີສິ່ງແວດລ້ອມ ແລະ ທໍລະນີແຫຼ່ງທ່ອງທ່ຽວ,ສ້າງຖານຂໍ້ມູນດ້ານຊັບພະຍາກອນແຮ່ທາດ, ຖານຂໍ້ມູນເຂດເນື້ອທີ່ສຳລັບດໍາເນີນການສໍາຫຼວດ, ທົດລອງ,ສຶກສາ ຫຼື ການວິໄຈກ່ຽວກັບແຮ່ທາດ.
ໃນຂະນະດຽວກັນຈະເລັ່ງລັດປະເມີນປະລິມານສະສົມແຮ່ທາດ, ການຈັດປະເພດເຂດທີ່ມີທ່າແຮງດ້ານແຮ່ທາດ ແລະ ຈໍາແນກຊັບພະຍາກອນແຮ່ທາດຕາມລະບົບສາກົນໃນເຂດພື້ນທີ່ທີ່ມີທ່າແຮງດ້ານແຮ່ທາດທີ່ເປັນເປົ້າໝາຍເພື່ອການກຳນົດພື້ນທີ່ທີ່ມີທ່າແຮງໃນການຂຸດຄົ້ນ ເພື່ອໃຊ້ເປັນຂໍ້ມູນພິຈາລະນາສ້າງແຜນແມ່ບົດ, ແຜນຍຸດທະສາດໃນການບໍລິຫານຈັດການແຮ່ທາດເປັນແຕ່ລະໄລຍະເຊັ່ນ:ແຮ່ບໍລິມາດໜ້ອຍມູນຄ່າສູງ, ແຮ່ບໍລິມາດຫຼາຍມູນຄ່າຕໍ່າ, ແຮ່ທາດຍຸດທະສາດ, ແຮ່ອະໂລຫະສຳລັບອຸດສາຫະກຳ ແລະ ກໍ່ສ້າງ ແລະ ແຮ່ທາດຫາຍາກທົ່ວປະເທດ,ເລັ່ງສ້າງ ແລະ ປັບປຸງ ກົດໝາຍ, ລະບຽບການ ແລະ ນິຕິກຳຕ່າງໆ ເພື່ອເປັນເຄື່ອງມືໃນການຄຸ້ມຄອງວຽກງານດ້ານພະລັງງານໄຟຟ້າ ແລະ ບໍ່ແຮ່,ປັບປຸງ ແລະ ສ້າງຄວາມເຂັ້ມແຂງໃຫ້ແກ່ລັດວິສາຫະກິດອ້ອມຂ້າງກະຊວງ,ໄຟຟ້າລາວ, ລັດວິສາຫະກິດຖືຮຸ້ນລາວ, ລັດວິສາຫະກິດກໍ່ສ້າງ ແລະ ຕິດຕັ້ງໄຟຟ້າ, ບໍລິສັດຜະລິດໄຟຟ້າລາວມະຫາຊົນ ແລະ ລັດວິສາຫະກິດພັດທະນາແຮ່ທາດລາວ, ຄຸ້ມຄອງໂຄງການ, ບັນດາໜີ້ສິນ, ສະພາບຄ່ອງທາງດ້ານການເງິນ.
ຂໍ້ມູນດັ່ງກ່າວແມ່ນການລາຍງານ ຂອງທ່ານ ໂພໄຊ ໄຊຍະສອນ ລັດຖະມົນຕີ ກະຊວງພະລັງງານ ແລະ ບໍ່ແຮ່ ຕໍ່ກອງປະຊຸມກາງສະໄໝຂອງອົງຄະນະພັກ ກະຊວງ ພະລັງງານ ແລະ ບໍ່ແຮ່ເມື່ອບໍ່ດົນມານີ້.