ກຸ່ມບໍລິສັດເຄມີຫວຽດນາມ ມຸ່ງໝັ້ນຂະຫຍາຍຕະຫຼາດ ແລະ ຮັດແໜ້ນຄວາມຮ່ວມມືເສດຖະກິດ ໃນສປປ ລາວ

ງານໃນປີນີ້, ຖືເປັນກິດຈະກຳສົ່ງເສີມການຄ້າ ແລະ ການລົງທຶນຂອງຫວຽດນາມ ຢູ່ ສປປ ລາວ ທີ່ມີຂະໜາດໃຫຍ່ທີ່ສຸດ ໂດຍການຮ່ວມມືຈັດຕັ້ງຂອງກະຊວງອຸດສາຫະກຳ ແລະ ການຄ້າ ຫວຽດນາມ ແລະ ລາວ.

ໃນນັ້ນ, ກຸ່ມບໍລິສັດເຄມີຫວຽດນາມ ຊຶ່ງເປັນລັດວິສາຫະກິດຊັ້ນນຳຂອງຫວຽດນາມ ທີ່ໄດ້ຮັບການຈັດອັນດັບທີ 148 ໃນຈຳນວນ 500 ບໍລິສັດຊັ້ນນຳຂອງອາຊີຕາເວັນອອກ ສຽງໃຕ້ ໄດ້ເຂົ້າຮ່ວມວາງສະແດງຜະລິດຕະພັນຢ່າງຍິ່ງໃຫຍ່ ເພື່ອສະແດງເຖິງຄວາມພ້ອມໃນການຂະຫຍາຍຕະຫຼາດ ແລະ ຊຸກຍູ້ການຄ້າຊາຍແດນລະຫວ່າງສອງປະເທດ.

ງານວາງສະແດງສິນຄ້າລາວ-ຫວຽດນາມ ໃນປີນີ້, ມີຫ້ອງວາງສະແດງທັງໝົດ 250 ຫ້ອງ ໂດຍມີບໍລິສັດ ແລະ ຫ້າງຮ້ານຈາກຫວຽດນາມເຂົ້າຮ່ວມ 80 ແຫ່ງມາວາງສະແດງຈໍານວນ 120 ຫ້ອງ.

ສໍາລັບກຸ່ມບໍລິສັດເຄມີຫວຽດນາມ ໄດ້ຈັດຕັ້ງຫ້ອງວາງສະແດງຂະໜາດໃຫຍ່ທີ່ມີເນື້ອທີ່ລວມ 108 ຕາແມັດ (ທຽບເທົ່າ 12 ຫ້ອງວາງສະແດງມາດຕະຖານ) ຕັ້ງຢູ່ຈຸດສູນກາງ ຫັນໜ້າໃສ່ຫ້ອງວາງສະແດງມູນເຊື້ອສາຍພົວພັນມິດຕະພາບ ລາວ-ຫວຽດນາມ.

ພາຍໃນຫ້ອງວາງສະແດງດັ່ງກ່າວ, ມີບໍລິສັດທີ່ເປັນສະມາຊິກເຂົ້າຮ່ວມ 9 ແຫ່ງ (ຈາກທັງໝົດຫຼາຍກວ່າ 30 ແຫ່ງໃນເຄືອຂ່າຍ) ທີ່ດໍາເນີນກິດຈະການໃນຂົງເຂດເຊັ່ນ: ປຸຍເຄມີບິ່ງດຽນ, ແຟັບຊັກເຄື່ອງ, ຖ່ານໄຟສາຍ ແລະ ໝໍ້ໄຟພາກໃຕ້ ປີນາໂກ, ຢາງລົດໃຫຍ່ພາກໃຕ້ຊີເອສເອັມ ແລະ ບໍລິສັດຫຸ້ນສ່ວນຜະລິດຕະພັນຄົວເຮືອນ ຮ່າໂນ້ຍ.

ຊຶ່ງບັນດາສະມາຊິກຂອງກຸ່ມບໍລິສັດເຄມີຫວຽດນາມ ໄດ້ນໍາເອົາຜະລິດຕະພັນທີ່ມີຊື່ສຽງຂອງຕົນນໍາມາວາງສະແດງໃນຄັ້ງນີ້ໄດ້ແບ່ງອອກເປັນ 4 ກຸ່ມຄື: ກຸ່ມປຸຍເຄມີ ແລະ ປຸຍຊີວະພາບ: ປຸຍຢູເຣຍ, DAP, NPK, ສູເປີຟົດສະຟັດ, ປຸຍຟົດສະຟັດຫຼອມລະລາຍ, ປຸຍສະເພາະດ້ານ ແລະ ປຸຍອິນຊີ; ກຸ່ມຜະລິດຕະພັນເຄື່ອງໃຊ້ຄົວເຮືອນ: ແຟັບຊັກເຄື່ອງ, ນໍ້າຢາຊັກເຄື່ອງ, ນໍ້າຢາລ້າງຖ້ວຍ, ນໍ້າຢາຖູພື້ນ; ກຸ່ມຢາງລົດ: ຢາງໃນລົດ ແລະ ຢາງລົດສຳລັບລົດຖີບ, ລົດຈັກ, ລົດເກງ, ລົດບັນທຸກ ແລະ ລົດອຸດສາຫະກໍາ; ກຸ່ມຖ່ານ ແລະ ໝໍ້ໄຟ: ຖ່ານໄຟສາຍ, ໝໍ້ໄຟລົດຈັກ, ລົດຍົນ ແລະ ໝໍ້ໄຟອຸດສາຫະກໍາ.

ທ່ານ ຫງວຽນ ຮືວ ຕູ໋ (Nguyen Huu Tu) ຜູ້ອໍານວຍການໃຫຍ່ກຸ່ມບໍລິສັດເຄມີຫວຽດນາມ ໄດ້ໃຫ້ສຳພາດຕໍ່ສື່ມວນຊົນລາວໃນວັນທີ 16 ກໍລະກົດຜ່ານມາ, ທີ່ສູນການຄ້າລາວ-ໄອເຕັກວ່າ: ຂ້າພະເຈົ້າຮູ້ສຶກພາກພູມໃຈທີ່ໄດ້ເຂົ້າຮ່ວມງານຄັ້ງນີ້, ຊຶ່ງເປັນໂອກາດດີໃນການແນະນຳຜະລິດຕະພັນທີ່ມີຄຸນນະພາບສູງ ທີ່ໄດ້ສົ່ງອອກໄປ 80 ປະເທດທົ່ວໂລກ ໃຫ້ປະຊາຊົນລາວ.

ພິເສດ, ກຸ່ມບໍລິສັດພວກເຮົາໄດ້ບັນລຸຂໍ້ຕົກລົງ ແລະ ເຊັນສັນຍາຮ່ວມມືກັບກຸ່ມບໍລິສັດພົງສະຫວັນຂອງ ສປປ ລາວ ເພື່ອຂະຫຍາຍການຮ່ວມມື ແລະ ນໍາເອົາສິນຄ້າມາວາງຈໍາໜ່າຍ ຊຶ່ງຖືເປັນການປະກອບສ່ວນເພີ່ມພູນຄູນສ້າງສາຍພົວພັນມິດຕະພາບລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ, ໃນໂອກາດທີ່ຈະຮ່ວມກັນສະເຫຼີມສະຫຼອງວັນເຊັນສົນທິສັນຍາມິດຕະພາບ ຫວຽດນາມ-ລາວ ຄົບຮອບ 50 ປີ ໃນປີ 2027 ທີ່ຈະມາເຖິງນີ້.

ໂອກາດນີ້, ທ່ານ ເລ ຫວຽດ ເຟືອງ ຜູ້ອໍານວຍການໃຫຍ່ບໍລິສັດຫຸ້ນສ່ວນຜະລິດຕະພັນຄົວເຮືອນ ຮ່າໂນ້ຍ (ບໍລິສັດຍ່ອຍຂອງ Vinachem) ກໍໄດ້ໃຫ້ຮູ້ວ່າ: "ນີ້ແມ່ນປີທໍາອິດທີ່ພວກເຮົາໄດ້ເຂົ້າຮ່ວມງານ. ເຫັນວ່າຕະຫຼາດສິນຄ້າຄົວເຮືອນທັງຢູ່ລາວ ແລະ ຫວຽດນາມ ມີທ່າແຮງບົ່ມຊ້ອນທີ່ຄ້າຍຄືກັນ. ຫວັງວ່າພາຍຫຼັງສໍາເລັດງານນີ້ ຈະສາມາດຮ່ວມມືກັບບໍລິສັດຂອງ ສປປ ລາວ ເພື່ອຊອກຫາຕົວແທນຈໍາໜ່າຍ ແລະ ພັນທະມິດທຸລະກິດ ເພື່ອເຮັດໃຫ້ຜະລິດຕະພັນເປັນທີ່ຮູ້ຈັກຂອງປະຊາຊົນລາວຫຼາຍຂຶ້ນ.

ຕະຫຼອດໄລຍະເວລາເກືອບ 20 ປີຜ່ານມາ, ງານວາງສະແດງສິນຄ້າລາວ-ຫວຽດນາມ ໄດ້ເຮັດໜ້າທີ່ເປັນຂົວຕໍ່ການຄ້າທີ່ສໍາຄັນ ໂດຍມີສ່ວນຊຸກຍູ້ໃຫ້ມູນຄ່າການຄ້າສອງຝ່າຍບັນລຸໄດ້ 4 ຕື້ໂດລາໃນປີ 2026 ນີ້ ແລະ ໄດ້ຕັ້ງເປົ້າໝາຍໃຫ້ບັນລຸ 10 ຕື້ໂດລາ ໃນປີ 2030.

ການເຂົ້າຮ່ວມງານຂອງກຸ່ມບໍລິສັດເຄມີຫວຽດນາມ ໃນຄັ້ງນີ້, ບໍ່ພຽງແຕ່ເປັນບາດກ້າວທຳອິດໃນການສ້າງເຄືອຂ່າຍຈໍາໜ່າຍສິນຄ້າ ແລະ ເຂົ້າເຖິງຕະຫຼາດລາວ ລວມເຖິງພາກຕາເວັນອອກສຽງເໜືອຂອງໄທເທົ່ານັ້ນ, ແຕ່ຍັງເປັນການຢືນຢັນເຖິງບົດບາດຂອງລັດວິສາຫະກິດຊັ້ນນໍາໃນການຮັດແໜ້ນສາຍພົວພັນຮ່ວມມືດ້ານເສດຖະກິດ, ການຄ້າລະຫວ່າງສອງຊາດ ລາວ-ຫວຽດນາມ ໃຫ້ກ້າວເຂົ້າສູ່ລວງເລິກ ແລະ ເຊື່ອມໂຍງພາກພື້ນຢ່າງໝັ້ນຄົງ.

ຂ່າວ-ພາບ: ວັນເພັງ