ລາຄາເຂົ້າສານໃນຍີ່ປຸ່ນຍັງສືບຕໍ່ເພີ່ມສູງຂຶ້ນ

 ໂດຍລາຄາເຂົ້າສານທີ່ຮ້ານສັບພະສິນຄ້າໄດ້ເພີ່ມຂຶ້ນ 62 ເຢນຈາກອາທິດກ່ອນແລະເພີ່ມຂຶ້ນ 90% ເມື່ອທຽບໃສ່ໄລຍະດຽວກັນຂອງປີ 2024.

ບົດລາຍງານລະບຸວ່າ: ລາຄາເຂົ້າສານໃນຮ້ານສັບພະສິນຄ້າໄດ້ເພີ່ມຂຶ້ນ 7 ອາທິດຕິດຕໍ່ກັນ, ເຖິງແມ່ນວ່າລັດຖະບານມີແຜນການທີ່ຈະປ່ອຍເຂົ້າສານສຳຮອງເພື່ອຮັກສາສະຖຽນລະພາບຂອງລາຄາ. ໂດຍກ່ອນໜ້ານີ້, ລັດຖະບານໄດ້ປະກາດແຜນການປ່ອຍເຂົ້າສານສຳຮອງ 210,000 ໂຕນອອກສູ່ຕະຫຼາດ. ພາຍຫຼັງທີ່ລາຄາເຂົ້າສານເພີ່ມຂຶ້ນຢ່າງຕໍ່ເນື່ອງ ສົ່ງຜົນກະທົບຕໍ່ຄົວເຮືອນຍີ່ປຸ່ນ

ເຂົ້າສານສຳຮອງຈະຖືກຈຳໜ່າຍຜ່ານຂະບວນການປະມູນ. ໂດຍຈະເລີ່ມຈຳໜ່າຍເບື້ອງຕົ້ນ 150,000 ໂຕນໃນກາງເດືອນມີນານີ້. ສ່ວນປະລິມານເຂົ້າສານສຳຮອງສໍາລັບຮອບຕໍ່ໄປຈະຖືກກໍານົດໂດຍອີງໃສ່ການປະເມີນເງື່ອນໄຂການແຈກຢາຍເຂົ້າ.

ເຖິງຢ່າງໃດກໍຕາມ, ລາຄາເຂົ້າທີ່ເພີ່ມຂຶ້ນຍັງບໍ່ມີທ່າທີທີ່ຈະຜ່ອນຄາຍ. ສິ່ງດັ່ງກ່າວໄດ້ເຮັດໃຫ້ຊາວກະສິກອນ ແລະ ຜູ້ຄ້າຂາຍຍົກໃນຍີ່ປຸ່ນມີຄວາມເປັນຫ່ວງເພີ່ມຂຶ້ນ. ເນື່ອງຈາກວ່າລາຄາທີ່ເພີ່ມສູງຂຶ້ນອາດຈະເຮັດໃຫ້ຄວາມຕ້ອງການຂອງຜູ້ບໍລິໂພກຫຼຸດລົງ.