ລາວ-ຟີລິບປິນ ສືບຕໍ່ຮັດແໜ້ນ ແລະ ເສີມຂະຫຍາຍການຮ່ວມມືຂະແໜງກະສິກຳ

ການພົບປະໃນຄັ້ງນີ້ ແມ່ນສືບເນື່ອງມາຈາກການພົບປະສົນທະນາອັນມີໝາກຜົນໃນ ລະຫວ່າງ ກອງປະຊຸມອົງການ FAO ພາກພື້ນອາຊີ-ປາຊີຟິກ ຄັ້ງທີ 38 (APRC 38) ຢູ່ ປະເທດບຣູໄນ ໃນເດືອນເມສາ ທີ່ຜ່ານມາ ແລະ ການພົບປະກັນຄັ້ງນີ້ ເປັນການພົບປະທາງການຄັ້ງທີ 2 ຖືເປັນຂີດໝາຍສຳຄັນອີກລະດັບໜ່ຶ່ງ ໃນສາຍພົວພັນ ຂອງ ສອງກະຊວງ ເພື່ອສືບຕໍ່ໃນການສົ່ງເສີມການຮ່ວມມືຂອງສອງກະຊວງ ກໍຄືສອງຂະແໜງການຂອງພວກເຮົາ, ເພື່ອເຊັນບົດບັນທຶກຄວາມເຂົ້າໃຈ (MOU) ຮ່ວມກັນ ແລະ ເພື່ອປຶກສາຫາລືຂອບການຮ່ວມມືອື່ນໆທີ່ຕິດພັນ.

ທ່ານ ລິນຄຳ ດວງສະຫວັນ ກ່າວວ່າ: ເຊື່ອໝັ້ນວ່າ ການເຮັດວຽກຮ່ວມກັນຄັ້ງນີ້ ຈະເປັນການສືບຕໍ່ ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການເປັນຄູ່ຮ່ວມຍຸດທະສາດໃນຕໍ່ໜ້າ ໂດຍສະເພາະ ການສົ່ງເສີມການຮ່ວມມື ແລະ ລົງທຶນໃນຂະແໜງກະສິກໍາ ລະຫວ່າງ ສອງກະຊວງກໍຄືສອງປະ ເທດພວກເຮົາໃຫ້ມີປະສິດທິພາບ ແລະ ປະສິດທິຜົນຍິ່ງຂຶ້ນ, ທັງເປັນຂີດໝາຍສຳຄັນຂອງຂອບການຮ່ວມມື ໃນຂົງເຂດກະສິກຳ ຂອງປະເທດພວກເຮົາ, ສປປ ລາວ ແລະ ຟີລິບປິນ ແມ່ນມີມູນເຊື້ອແຫ່ງສາຍພົວພັນມິດຕະພາບອັນຍາວນານ, ໂດຍສະເພາະໃນຂະແໜງກະສິກຳ, ນັບຕັ້ງແຕ່ພວກເຮົາໄດ້ກໍານົດຂອບການຮ່ວມມືດ້ານເຕັກນິກຮ່ວມກັນ ໃນເດືອນຕຸລາ 2002 ຊຶ່ງກວມເອົາການວິໄຈແນວພັນເຂົ້າ, ການພັດທະນາຊັບ ພະຍາກອນມະນຸດ, ເຕັກໂນໂລຊີ ຫຼັງການເກັບກ່ຽວເຂົ້າ ແລະ ສາລີ, ການລ້ຽງສັດນ້ຳ, ພືດສວນ, ລວມທັງ ການແລກປ່ຽນຊ່ຽວຊານດ້ານເຕັກນິກຕ່າງໆ ແລະ ອື່ນໆ; ທ່ານລັັດຖະມົນຕີກະຊວງກະສິກໍາ ແລະ ສິ່ງແວດ ລ້ອມ ກ່າວຕື່ມວ່າ: ບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມືດ້ານກະສິກຳ ຂອງພວກເຮົາ ແມ່ນໄດ້ຮັບການສະຫຼຸບຢ່າງສົມບູນ ແລະ ພ້ອມແລ້ວທີ່ຈະລົງນາມຮ່ວມກັນ, MOU ສະບັບນີ້ ບໍ່ສະເພາະແຕ່ເປັນເອກະສານດ້ານການຮ່ວມມືຂອງພວກເຮົາເທົ່ານັ້ນ, ແຕ່ຍັງເປັນເຄື່ອງມືອັນສຳຄັນທີ່ຈະຊ່ວຍສ້າງກົນໄກການຮ່ວມມືສອງຝ່າຍທີ່ພວກເຮົາຕ້ອງໄດ້ຈັດຕັ້ງປະຕິບບັດວຽກງານຮ່ວມກັນໂດຍສະເພາະ, ຊຸກຍູ້ ແລະ ອຳນວຍຄວາມສະດວກ ໃຫ້ແກ່ການນຳເຂົ້າ ແລະ ສົ່ງອອກຜະລິດຕະພັນກະສິກຳ ໂດຍສະເພາະແມ່ນເຂົ້າ, ສາລີ, ຜະລິດຕະພັນສັດນ້ຳ ແລະ ພືດສວນ, ປັບປຸງມາດຕະຖານສຸຂານາໄມ ແລະ ສຸຂານາໄມພືດ (SPS) ໃຫ້ສອດຄ່ອງກັນເພື່ອຮັບປະກັນການຄ້າຂ້າມແດນທີ່ໂລ່ງລ່ຽນ, ສ້າງສະພາບແວດລ້ອມອັນເອື້ອອຳນວຍ ໃຫ້ແກ່ການລົງທຶນຂອງພາກເອກະຊົນ ແລະ ການຮ່ວມທຶນໃນທຸລະກິດກະສິກຳ ລະຫວ່າງ ສປປ ລາວ ແລະ ຟີລິບປິນ, ເພື່ອຮັບປະກັນການຈັດຕັ້ງປະຕິບັດໃນທັນທີ ແລະ ເພື່ອການຮ່ວມມືຢ່າງຍືນຍົງ ແລະ ເພື່ອການຮັກສາທ່າແຮງຂອງ MOU ທີ່ຈະໄດ້ລົງນາມກັນໃນຄັ້ງນີ້, ຝ່າຍ ສປປ ລາວ ໄດ້ກຳນົດເອົາກົມແຜນການ ແລະ ການຮ່ວມມື (ຫຼື DOPC) ແລະ ກົມປູກຝັງ (ຫຼື DOA) ເປັນຈຸດປະສານງານຫຼັກດ້ານເຕັກນິກ ຂອງພວກເຮົາ, ຫວັງເປັນຢ່າງຍິ່ງວ່າຈະກຳນົດເອົາກົມຄູ່ຮ່ວມງານຂອງຝ່າຍຟີລິບປິນ ໃນລັກສະນະດຽວກັນ ເພື່ອໃຫ້ຄະນະກຳມະການຮ່ວມງານ (ຫຼື Joint Working Group) ຂອງພວກເຮົາ ສາມາດເລີ່ມຈັດຕັ້ງປະຕິບັດວຽກງານໄດ້ທັນທີ ຊຶ່ງຄະນະກຳມະການຊຸດນີ້ ຈະພົບປະກັນຢ່າງເປັນປົກກະຕິ ເພື່ອວາງແຜນ, ຈັດຕັ້ງປະຕິບັດ ແລະ ຕິດຕາມການຮ່ວມມື, ພ້ອມທັງຫັນເອົາເນື້ອໃນຂອງ MOU ສະບັບນີ້ ໄປສູ່ໝາກຜົນຕົວຈິງ ທີ່ເປັນປະໂຫຍດຕໍ່ ສອງຂະແໜງການ ແລະ ສອງປະເທດຊາດ ຂອງພວກເຮົາ.

(ຂ່າວ-ພາບ: ສຳນານ)