ບົດລາຍງານລະບຸວ່າ: ຖ້າໄດ້ຮັບການອະນຸມັດຈາກລັດຖະສະພາ, ງົບປະມານປີ 2027 ຈະເປັນໂຕເລກງົບປະມານປະຈຳປີທີ່ເພີ່ມຂຶ້ນໄວທີ່ສຸດ ເກີນສະຖິຕິກ່ອນໜ້ານີ້ທີ່ເພີ່ມຂຶ້ນ 10.6% ໃນໄລຍະວິກິດການການເງິນໂລກປີ 2009, ເພື່ອຊຸກຍູ້ການເຕີບໂຕທາງເສດຖະກິດຜ່ານນະໂຍບາຍການເງິນທີ່ຂະຫຍາຍຕົວ.
ການຂະຫຍາຍຕົວທາງງົບປະມານທີ່ບໍ່ເຄີຍມີມາກ່ອນນີ້ແມ່ນຂັບເຄື່ອນໂດຍການເຕີບໂຕຂອງອຸດສາຫະກຳເຊມິຄອນດັກເຕີ ຊຶ່ງຄາດວ່າຈະເພີ່ມລາຍຮັບພາສີຂອງ ສ ເກົາຫຼີ 194.2 ພັນຕື້ວອນ, ເປັນ 584.4 ພັນຕື້ວອນ ໃນປີ 2027.
ໂດຍລວມແລ້ວ, ລາຍຮັບທັງໝົດຂອງລັດຖະບານ ສ ເກົາຫຼີ ຊຶ່ງລວມທັງລາຍຮັບຈາກພາສີ ແລະ ລາຍຮັບທີ່ບໍ່ແມ່ນພາສີ ຄາດວ່າຈະເພີ່ມຂຶ້ນ 30.4% ເປັນ 880.8 ພັນຕື້ວອນ ໃນປີ 2027, ໃນຂະນະທີ່ອັດຕາສ່ວນໜີ້ສິນສາທາລະນະຕໍ່ GDP ຄາດວ່າຈະຫຼຸດລົງ 3.3% ເປັນ 48.3% ໃນປີ 2027.
ງົບປະມານປີ 2027 ຂອງ ສ ເກົາຫຼີ ຈະສຸມໃສ່ການຟື້ນຟູຂະແໜງອຸດສາຫະກຳ ແລະ ເຕັກໂນໂລຊີໃນອະນາຄົດ. ໂດຍງົບປະມານການຄົ້ນຄວ້າ ແລະ ພັດທະນາ (R&D) ຖືກກຳນົດໄວ້ທີ່ 39.5 ພັນຕື້ວອນ, ເພີ່ມຂຶ້ນ 11.2% ເມື່ອທຽບກັບປີ 2026.
ການເພີ່ມຂຶ້ນສອງໂຕເລກນີ້ມີຈຸດປະສົງເພື່ອຮັກສາອະທິປະໄຕດ້ານເຕັກໂນໂລຊີ ແລະ ຊຸກຍູ້ການເຕີບໂຕໃນອະນາຄົດໂດຍຜ່ານການລົງທຶນຢ່າງຕັ້ງໜ້າໃນ 10 ເຕັກໂນໂລຊີຍຸດທະສາດໃນອະນາຄົດ, ລວມທັງປັນຍາປະດິດ (AI), ຫຸ່ນຍົນທີ່ກ້າວໜ້າ ແລະ ເຊມິຄອນດັກເຕີ, ພ້ອມທັງເລັ່ງການເຊື່ອມໂຍງ AI ເຂົ້າໃນອຸດສາຫະກຳທີ່ສຳຄັນທັງໝົດ.
ງົບປະມານດ້ານອຸດສາຫະກຳ, ວິສາຫະກິດຂະໜາດນ້ອຍ - ຂະໜາດກາງ (SMEs) ແລະ ພະລັງງານເພີ່ມຂຶ້ນ 29.7% ເປັນ 41.2 ພັນຕື້ວອນ. ງົບປະມານດ້ານສິ່ງແວດລ້ອມເພີ່ມຂຶ້ນ 5.2% ເປັນ 14.6 ພັນຕື້ວອນ. ງົບປະມານວັດທະນະທຳ, ກິລາ ແລະ ການທ່ອງທ່ຽວເພີ່ມຂຶ້ນ 20.4% ເປັນ 11.6 ພັນຕື້ວອນ.
ງົບປະມານປ້ອງກັນປະເທດເພີ່ມຂຶ້ນ 8.2% ເປັນ 73.3 ພັນຕື້ວອນ. ງົບປະມານດ້ານສາທາລະນະສຸກ, ສະຫວັດດີການ ແລະ ການຈ້າງງານເພີ່ມຂຶ້ນ 9.3% ເປັນ 289 ພັນຕື້ວອນ. ສ່ວນງົບປະມານດ້ານການສຶກສາເພີ່ມຂຶ້ນ 10.8% ເປັນ 110.7 ພັນຕື້ວອນ.
ຄໍາເຫັນ