 |
ວັນທີ 16 ຕຸລາ 2026, ທ່ານ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກດອມມູນິດຈີນໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ນະຄອນອູລານຊັບ ເຂດປົກຄອງຕົນເອງມົງໂກໃນ, ເພິ່ນໄດ້ລົງສຳຫຼວດເກັບກຳຂໍ້ມູນຢູ່ເຂດພັດທະນາເຕັກໂນໂລຊີຂັ້ນສູງຊາຮາ ເພື່ອຊອກຮູ້ສະພາບການຕ່າງໆກ່ຽວກັບເຂດປົກຄອງຕົນເອງມົງໂກໃນ ຊຸກຍູ້ການສ້າງສູນກາງເຊື່ອມຕໍ່ໂຄງການ “ການປະມວນຜົນຂໍ້ມູນຕາເວັນອອກ-ຕາເວັນຕົກ”, ການພັດທະນາອຸດສາຫະກຳກຳລັງການປະມວນຜົນສີຂຽວ ແລະ ອື່ນໆ ເປັນຕົ້ນ, ໂອກາດດັ່ງກ່າວເພິ່ນໄດ້ສະເໜີຂໍ້ຮຽກຮ້ອງຢ່າງຈະແຈ້ງວ່າ: “ຕັ້ງໃຈຈັດຕັ້ງປະຕິບັດຕາມທິດປະສິດທິພາບສູງ, ສີຂຽວ ແລະ ປອດໄພ, ເອົາໃຈໃສ່‘ “ການພັດທະນາກຳລັງການປະມວນຜົນປະສານສົມທົບກັບພະລັງງານໄຟຟ້າ ແລະ ຊັບພະຍາກອນນ້ຳ”.
ໃນໄລຍະປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີຄັ້ງທີ 14 (2021-2025), ຈີນໄດ້ເລີ່ມປະຕິບັດໂຄງການ “ການປະມວນຜົນຂໍ້ມູນຕາເວັນອອກ-ຕາເວັນຕົກ’” ຢ່າງຮອບດ້ານ.
ກຳລັງການປະມວນຜົນໃນຖານະເປັນກຳລັງການຜະລິດແກນກາງຂອງຍຸກເສດຖະກິດດິີຈີຕອນ, ເມື່ອພັດທະນາຂະຫຍາຍຕົວຢ່າງວ່ອງໄວແນນ່ອນຈະພາໃຫ້ການສິ້ນເປືອງພະລັງງານເພີ່ມຂຶ້ນຢ່າງຫຼວງຫຼາຍ. ສະນັ້ນ, “ການພັດທະນາກຳລັງການປະມວນຜົນປະສານສົມທົບກັບພະລັງງານໄຟຟ້າ” ຈຶ່ງກາຍເປັນຫົວຂໍ້ແຫ່ງຍຸກສະໄໝທີ່ຕ້ອງແກ້ໄຂໃຫ້ໄດ້.
 |
ນະຄອນອູລານຊັບ ອຸດົມສົມບູນໄປດ້ວຍຊັບພະຍາກອນໄຟຟ້າພະລັງງານລົມ ແລະ ໄຟຟ້າພະລັງງານແສງຕາເວັນ, ສະນັ້ນຈຶ່ງໄດ້ດຳເນີນການຄົ້ນຄວ້ານຳໜ້າໄປກ່ອນແລ້ວບົນເສັ້ນທາງ “ການພັດທະນາກຳລັງການປະມວນຜົນປະສານສົມທົບກັບພະລັງງານໄຟຟ້າ”.
ເດືອນກໍລະກົດ ປີ 2025, ໂຄງການ “ໄຟຟ້າສີຂຽວເຊື່ອມຕໍ່ໂດຍກົງ + ໂຮງໄຟຟ້າ, ເຄືອຂ່າຍໄຟຟ້າ, ຜູ້ໃຊ້ໄຟຟ້າ ແລະ ລະບົບສະສົມໄຟຟ້າເຊື່ອມໂຍງເຂົ້າກັນ” ສູນຂໍ້ມູນແຫ່ງທຳອິດຂອງຈີນໄດ້ເປີດນຳໃຊ້ຢ່າງເປັນທາງການຢູ່ນະຄອນອູລານຊັບ. ກຳລັງການຕິດຕັ້ງໄຟຟ້າພະລັງງານລົມຂອງໂຄງການນີ້ບັນລຸເຖິງ 300,000 ກິໂລວັດ, ປະກອບລະບົບສະສົມພະລັງງານໄຟຟ້າເຖິງ 45,000 ກິໂລວັດ, ໄຟຟ້າສີຂຽວທີ່ຜະລິດໂດຍໂຄງການແມ່ນສົ່ງຜ່ານສາຍສົ່ງສະເພາະ ສະໜອງໂດຍກົງໃຫ້ຖານກຳລັງການປະມວນຜົນທີ່ຢູ່ໄກຈາກໂຄງການດັ່ງກ່າວ 16 ກິໂລແມັດ.
ໂດຍຖືໂຄງການດັ່ງກ່າວເປັນຈຸດບຸກທະລຸ, ນະຄອນອູລານຊັບ ໄດ້ອະນຸມັດກໍ່ສ້າງໂຄງການໄຟຟ້າສີຂຽວເຊື່ອມຕໍ່ໂດຍກົງ 14 ແຫ່ງ, ກຳລັງຕິດຕັ້ງໄຟຟ້າພະລັງງານໃໝ່ບັນລຸເຖິງ 5.46 ລ້ານກິໂລວັດ ຊຶ່ງໄດ້ສະໜອງແບບຢ່າງທີ່ດີສາມາດເປັນບ່ອນອີງໃຫ້ແກ່ການຈັດຕັ້ງປະຕິບັດ “ການພັດທະນາກຳລັງການປະມວນຜົນປະສານສົມທົບກັບພະລັງງານໄຟຟ້າ” ຢ່າງຂະໜາດໃຫຍ່ໃຫ້ເປັນຮູບປະທຳໃນທົ່ວປະເທດຈີນ.
ໃນການພັດທະນາອຸດສາຫະກຳ ກຳລັງການປະມວນຜົນສີຂຽວ, ນອກຈາກໄຟຟ້າແລ້ວຍັງຕ້ອງພິຈາລະນາເຖິງຊັບພະຍາກອນນ້ຳ.
ການລະບາຍຄວາມຮ້ອນຂອງເຄື່ອງເຊີເວີ (server) ໃນສູນຂໍ້ມູນກໍຄືການຜະລິດໄຟຟ້າ, ແຜ່ນຊິບ ແລະ ຂອດອື່ນໆລ້ວນແຕ່ຕ້ອງການຊັບພະຍາກອນນ້ຳ.
ປັດຈຸບັນ, ສູນຂໍ້ມູນຈີນກຳລັງເລັ່ງພັດທະນາໄປໂຮມສູນຢູ່ເຂດພາກຕາເວັນຕົກ. ແຕ່ວ່າການຂາດແຄນຊັບພະຍາກອນນ້ຳເປັນຂໍ້ຫຍຸ້ງຍາກພົ້ນເດັ່ນທີ່ເຂດແຄວ້ນດັ່ງກ່າວພວມປະເຊີນຢູ່.
 |
ຢູ່ເຂດປົກຄອງຕົນເອງມົງໂກໃນ, ສູນຂໍ້ມູນຈີນິງອູລານຊັບຢູຄລາວ (Ucloud) ໄດ້ສ້າງຜົນງານພົ້ນເດັ່ນໃນການປະຢັດນ້ຳ. ສູນດັ່ງກ່າວໄດ້ປະຖິ້ມແນວຄິດດັ້ງເດີມທີ່ຈຳຕ້ອງປັບຕົວເຂົ້າກັບສະພາບຂາດແຄນນ້ຳແບບຕົກທ່າຮັບ, ອີງໃສ່ທ່າແຮງດ້ານດິນຟ້າອາກາດທຳມະຊາດຂອງພາກເໜືອຈີນ, ນຳໃຊ້ແຜນການເຄື່ອງຈັກທຳຄວາມເຢັນດ້ວຍນ້ຳເຢັນຜ່ານອາກາດໜາວທຳມະຊາດແບບ ຄົບວົງຈອນໂດຍສາມາດຫຼຸດປະລິມານການໃຊ້ນ້ຳເພື່ອທຳຄວາມເຢັນໃຫ້ໜ້ອຍລົງຢ່າງມີປະສິດທິຜົນ. ທຽບໃສ່ແຜນການທຳຄວາມເຢັນດ້ວຍນ້ຳທົ່ວໄປແລ້ວ, ແຜນໃໝ່ດັ່ງກ່າວສາມາດປະຢັດນ້ຳໄດ້ຫຼາຍກວ່າ 92%.
ໃນການເຄື່ອນໄຫວຢ້ຽມຢາມເຂດມົງໂກໃນຄັ້ງນີ້, ທ່ານ ສີຈິ້ນຜິງ ຍັງໄດ້ເດີນທາງໄປສຳຫຼວດຄົ້ນຄວ້າວຽກງານຢູ່ເຂດສະຫງວນທຳມະຊາດທະເລສາບຫວງສີໄຫ ເປັນການສະເພາະ. ເພິ່ນມີຂໍ້ຮຽກຮ້ອງຢ່າງຈະແຈ້ງວ່າ: “ຕ້ອງຮັກສາເສັ້ນແດງຂອງການອະນຸລັກສິ່ງແວດລ້ອມທຳມະຊາດຢ່າງເຂັ້ມງວດ.” ຂໍ້ຮຽກຮ້ອງນີ້ໄດ້ຊີ້ໃຫ້ເຫັນຕັກກະຢ່າງໜຶ່ງ: ຕ້ອງພັດທະນາອຸດສາຫະກຳ ກຳລັງການປະມວນຜົນ, ແຕ່ເດັດຂາດບໍ່ໃຫ້ລື່ນກາຍຂີດຈຳກັດຂອງສິ່ງແວດລ້ອມຊັບພະຍາກອນ.
ນະຄອນອູລານຊັບ ໄດ້ອີງໃສ່ທ່າແຮງດ້ານຊັບພະຍາກອນຂອງຕົນ, ວາງແຜນເປັນເອກະພາບກັນຊຸກຍູ້ “ການພັດທະນາກຳລັງການປະມວນຜົນປະສານສົມທົບກັບພະລັງງານໄຟຟ້າ ແລະ ຊັບພະຍາກອນນ້ຳ”
ນັບມາຮອດເດືອນສິງຫາປີນີ້, ອູລານຊັບ ໄດ້ລົງນາມສັນຍາໂຄງການສູນຂໍ້ມູນຫຼາຍກວ່າຮ້ອຍແຫ່ງ, ໃຫ້ບໍລິການດ້ານກຳລັງການປະມວນຜົນ ໄດ້ບັນລຸເຖິງ172,000P (ສາມາຄຳນວນ 1 ລ້ານຕື້ເທື່ອຕໍ່ວິນາທີ), ເພີ່ມຂຶ້ນ 112% ເມື່ອທຽບໃສ່ໄລຍະດຽວກັນຂອງປີກາຍ, ໃນນີ້ກຳລັງການປະມວນຜົນອັດສະລິຍະກວມເອົາຫຼາຍກວ່າ 95%.
ຈາກນະຄອນອູລານຊັບ ຮອດທົ່ວປະເທດຈີນ, ຈາກການຊອກຄົ້ນຂອງທ້ອງຖິ່ນສູ່ການເຜີຍແຜ່ຢ່າງທົ່ວເຖິງ, “ການພັດທະນາກຳລັງການປະມວນຜົນປະສານສົມທົບກັບພະລັງງານໄຟຟ້າ ແລະ ຊັບພະຍາກອນນ້ຳ” ກຳລັງກາຍເປັນຫຼັກການສຳຄັນສຳລັບການວາງແຜນພັດທະນາອຸດສາຫະກຳ ກຳລັງການປະມວນຜົນຂອງຈີນ.
ບົດໂດຍ: ວິທະຍຸ, ໂທລະພາບສູນກາງຈີນ (CMG)
ຄໍາເຫັນ