ທ່ານ ລິນຄໍາ ດວງສະຫວັນ ກ່າວວ່າ: ການຈັດຕັ້ງປະຕິບັດວຽກງານຜ່ານມາ, ພາຍຫຼັງ ທີ່ລັດຖະບານ ໄດ້ອອກຂໍ້ຕົກລົງແຕ່ງຕັ້ງຄະນະຮັບຜິດຊອບດຸ່ນດ່ຽງທານດ້ານການຄໍ້າປະກັນສະບຽງອາຫານ ສະບັບເລກທີ 76/ນຍ, ຄະນະດັ່ງກ່າວໄດ້ຈັດກອງປະຊຸມປຶກສາຫາລືວຽກງານດັ່ງກ່າວ ໃນວັນທີ 5 ກໍລະກົດ 2024 ເພື່ອແບ່ງຄວາມຮັບຜິດຊອບ ແລະ ກໍານົດກອບເວລາ ຕໍ່ບັນດາໜ້າວຽກຕ່າງໆທີ່ຕິດພັນ.ຫຼັງຈາກນັ້ນ, ໄດ້ມີກອງປະຊຸມທີ່ກ່ຽວຂ້ອງຮ່ວມກັບກະຊວງອຸດສາຫະກຳ ແລະ ການຄ້າ (ອຄ), ອົງການປົກຄອງນະຄອນຫຼວງ ແລະ ພາກສ່ວນຕ່າງໆທີ່ກ່ຽວຂ້ອງຫຼາຍຄັ້ງໃນການປຶກສາຫາລືກ່ຽວກັບການກຳນົດໂຄງປະກອບລາຄາສິນຄ້າກະສິກຳ ໂດຍສະເພາະລາຄາຊີ້ນໝູ, ໄຂ່ໄກ່ ແລະ ປາ.ນອກຈາກນີ້, ຂະແໜງການຍັງໄດ້ກຳນົດບັນດາພືດ-ສັດ ບຸລິມະສິດຂອງແຕ່ລະແຂວງ ທີ່ເປັນທ່າແຮງ ຕາມຈຸດພິເສດ ຂອງທ້ອງຖິ່ນ ແລະ ເຂດແຄວ້ນ ແລະ ໄດ້ກຳນົດເປັນຄາດໝາຍສູ້ຊົນໃຫ້ແຂວງ ແລະ ມອບໃຫ້ແຂວງ ເປັນຜູ້ຊຸກຍູ້ ແລະ ສົ່ງເສີມ.ນອກນັ້ນ, ການຜະລິດເຂົ້ານາແຊງບັນລຸໄດ້ 94% ແລະ ພືດລະດູແລ້ງ ໄດ້ລື່ນແຜນ 7% ແລະ ການຜະລິດຊີ້ນ, ໄຂ່, ປາ ຕອບສະໜອງໄດ້ 50% ຂອງແຜນການປີ, ພວກເຮົາຕີລາຄາວ່າ: ໂດຍລວມແມ່ນສາມາດຕອບສະໜອງໄດ້ຕາມຄວາມຕ້ອງການບໍລິໂພກພາຍໃນ, ແຕ່ພວກເຮົາກໍຍອມຮັບວ່າມີບາງແຂວງຍັງມີບາງລາຍການສິນຄ້າກະສິກຳບໍ່ທັນສາມາດກຸ້ມຕົນເອງໄດ້ ຕ້ອງອາໄສການດຸນດ່ຽງຈາກແຂວງໃກ້ຄຽງ ຫຼື ນໍາເຂົ້າຈາກຕ່າງປະເທດຕາມຈຸດພິເສດຂອງເຂດດັ່ງກ່າວ.
ທ່ານ ລິນຄໍາ ດວງສະຫວັນ ກ່າວຕື່ມວ່າ: ທິດທາງແຜນການໃນຕໍ່ໜ້າຈະສືບຕໍ່ຕິດຕາມຊຸກຍູ້ ທ້ອງຖິ່ນເພື່ອບໍ່ໃຫ້ມີການນໍາເຂົ້າແບບຊະຊາຍ ໂດຍສະເພາະຢູ່ດ່ານທ້ອງຖິ່ນ ແລະ ດ່ານປະເພນີແລະ ລົງເລິກກວດກາ ການນໍາເຂົ້າຢູ່ບັນດາດ່ານສາກົນ (ຕ້ອງໄດ້ຜ່ານການກວດກາຄຸນນະພາບຢູ່ບັນດາດ່ານກັກກັນພືດ-ກັກກັນສັດໃນ 28 ດ່ານ ທົ່ວປະເທດ);ສືບຕໍ່ຊຸກຍູ້ທ້ອງຖິ່ນທີ່ມີທ່າແຮງໃນການຜະລິດ ເພື່ອໃຫ້ສາມາດກຸ້ມກິນ ແລະ ໃຫ້ສາມາດດຸ່ນດ່ຽງໃຫ້ແຂວງໃກ້ຄຽງ ຫຼື ແຂວງອື່ນໃຫ້ພຽງພໍໂດຍສະເພາະຮັບປະກັນ ດ້ານແນວພັນ, ປັດໄຈການຜະລິດ ແລະ ການເຂົ້າເຖິງສິນເຊື່ອ;ຊຸກຍູ້ການຈັດຕັ້ງກຸ່ມການຜະລິດ, ສະຫະກອນຕາມກົດໝາຍວ່າດ້ວຍສະຫະກອນ;ຊຸກຍູ້ສົ່ງເສີມຜູ້ປະກອບການທີ່ມີທ່າແຮງ ແລະ ຄວາມພ້ອມໃນການລົງທຶນຜະລິດແນວພັນພືດ-ສັດ, ປັດໄຈການຜະລິດ (ປຸຍ, ຫົວອາຫານສັດ);ຊຸກຍູ້ສົ່ງເສີມຜູ້ປະກອບການ ເພື່ອຜະລິດ, ປຸງແຕ່ງຜະລິດຕະພັນກະສິກຳ ເພື່ອສົ່ງອອກເຊັ່ນດຽວກັບກໍລະນີກະກຽມສົ່ງອອກເຂົ້າໄປບຣູໄນ. ພ້ອມທັງພິຈາລະນາໃຫ້ພາກທຸລະກິດ ມີສ່ວນຮ່ວມໃນການສ້າງຕັ້ງບໍລິສັດຮ່ວມໃນການຄໍ້າປະກັນດ້ານສະບຽງອາຫານ.
(ຂ່າວ: ວັນເພັງ, ພາບ: ສຸກສະຫວັນ)
ຄໍາເຫັນ