ລັດຖະບານເຂັ້ມງວດໃນການຄຸ້ມຄອງປົກປັກຮັກສາ ແລະ ພັດທະນາປ່າໄມ້

ທ່ານ ລິນຄຳ ດວງສະຫວັນ ລັດຖະມົນຕີກະຊວງກະສິກຳ ແລະ ສິ່ງແວດລ້ອມ ໄດ້ຊີ້ແຈງຕໍ່ຄຳຊັກຖາມ ຂອງບັນດາສະມາຊິກສະພາແຫ່ງຊາດ ໃນກອງປະຊຸມສະໄໝວິສາມັນ ເທື່ອທີ I ຂອງສະພາແຫ່ງຊາດ ຊຸດທີ X ໃນວັນທີ 8 ກໍລະກົດນີ້, ທີ່ສະພາແຫ່ງຊາດ ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.
ທ່ານ ລິນຄຳ ດວງສະຫວັນ ຊີ້ແຈງວ່າ: ຜ່ານມາ, ລັດຖະບານໄດ້ສະເໜີຂໍຫັນປ່ຽນທີ່ດິນປ່າໄມ້ ເປັນທີ່ດິນປະເພດອື່ນເພື່ອນໍາໃຊ້ເຂົ້າໃນການພັດທະນາໂຄງການຕ່າງໆ ຕໍ່ບັນຫາດັ່ງກ່າວ, ເພື່ອຮັບປະກັນຄາດໝາຍສູ້ຊົນດັ່ງກ່າວ, ລັດຖະບານ ກໍຄື ຂະແໜງກະສິກຳ ແລະ ສິ່ງແວດລ້ອມໄດ້ກຳນົດທິດທາງ, ແຜນການ, ວິທີການ ແລະ ມາດຕະການ ໂດຍໄດ້ເຂັ້ມງວດໃນການຄຸ້ມຄອງ, ປົກປັກຮັກສາ ແລະ ພັດທະນາປ່າໄມ້ ແລະ ທີ່ດິນປ່າໄມ້ທີ່ມີຢູ່ໃນປັດຈຸບັນ ແລະ ສົ່ງເສີມການເຂົ້າຮ່ວມຂອງທຸກພາກສ່ວນໃນສັງຄົມ, ສູ້ຊົນ ສໍາຫຼວດ, ຈັດສັນ ແລະ ກຳນົດ ເຂດທີ່ດິນປ່າໄມ້ທຳມະຊາດທີ່ຍັງບໍ່ທັນບັນລຸຄາດໝາຍ ໄປຄຽງຄູ່ກັບການຍູ້ແຮງຂະບວນການຟື້ນຟູປ່າ ແລະ ສົ່ງເສີມການປູກໄມ້, ໃນນັ້ນຂະແໜງການໄດ້ມີແຜນການສູ້ຊົນໃຫ້ບັນລຸເປົ້າໝາຍທີ່ໄດ້ກຳນົດໄວ້ ມີບັນດາໜ້າວຽກ ຄື: ຟື້ນຟູປ່າ ໂດຍທຳມະຊາດໃຫ້ໄດ້ 520,000 ເຮັກຕາ; ສົ່ງເສີມປູກໄມ້ອຸດສາຫະກຳໃຫ້ໄດ້ 200,000 ເຮັກຕາ ແລະ ບວກກັບເນື້ອທີ່ດິນປ່າໄມ້ທີ່ກຳລັງສໍາຫຼວດ ແລະ ຈັດສັນຈຳນວນ 14.7 ລ້ານເຮັກຕາ ເພື່ອໃຫ້ໄດ້ 15.4 ລ້ານເຮັກຕາ ຫຼື ເທົ່າກັບ 65% ຂອງເນື້ອທີ່ທົ່ວປະເທດໃນປີ 2030 ແລະ ມາດຕະການເລັ່ງດ່ວນປີ 2026 ໄດ້ເລັ່ງເກັບລາຍຮັບງົບປະມານຟື້ນຟູປ່າ ແລະ ປູກປ່າທົດແທນ ຈາກໂຄງການພັດທະນາທີ່ມີມະຕິສະພາແຫ່ງຊາດ ຮັບຮອງໃນການຫັນປ່ຽນປ່າ ໂດຍກອງທຶນປົກປັກຮັກສາສິ່ງແວດລ້ອມ ແລະ ປ່າໄມ້ ເປັນເຈົ້າການສົມທົບກັບພາກສ່ວນກ່ຽວຂ້ອງ ແລະ ງົບປະມານແຫຼ່ງອື່ນໆ, ຄຸ້ມຄອງ ແລະ ຈັດສັນງົບປະມານໃນການຟື້ນຟູປ່າ ແລະ ປູກປ່າທົດແທນທີ່ໄດ້ອະນຸມັດໃນຈໍານວນ 11 ຕື້ກີບ ເພື່ອໃຫ້ສາມາດຈັດຕັ້ງປະຕິບັດຢ່າງມີປະສິດທິຜົນ, ໃນການຈັດ ຕັ້ງປະຕິບັດຕົວຈິງ ຂະແໜງການໄດ້ກຳນົດກົນໄກ ລະຫວ່າງ ສູນກາງ ແລະ ທ້ອງຖິ່ນ ໂດຍກະຊວງກະສິກຳ ແລະ ສິ່ງແວດລ້ອມ (ກົມປ່າໄມ້) ເປັນຈຸດໃຈກາງປະສານງານ, ສ້າງບົດສະເໜີໂຄງການ ແລະ ເຈລະຈາ ກັບ ບໍລິສັດ ຜູ້ພັດທະນາໂຄງການຕາມສັນຍາສຳປະທານ ໃນການວາງແຜນການນໍາໃຊ້ງົບປະມານ ເຂົ້າໃນໜ້າວຽກຕົວຈິງຕາມຂັ້ນຕອນ ແລະ ລະບຽບການທີ່ກ່ຽວຂ້ອງ, ພະແນກກະສິກຳ ແລະ ສິ່ງແວດລ້ອມຂັ້ນແຂວງ ເປັນຜູ້ຈັດຕັ້ງປະຕິບັດການຟື້ນຟູປ່າ ແລະ ປູກປ່າທົດແທນຕົວຈິງ ແລະ ຫ້ອງການກະສິກຳ ແລະ ສິ່ງແວດລ້ອມຂັ້ນເມືອງ ຮ່ວມກັບປະຊາຊົນທີ່ເຂດໂຄງການຟື້ນຟູ ແລະ ປູກປ່າຕັ້ງຢູ່, ມອບໃຫ້ພະແນກກະສິກຳ ແລະ ສິ່ງແວດລ້ອມຂັ້ນແຂວງ ແລະ ພາກສ່ວນກ່ຽວຂ້ອງຂັ້ນທ້ອງຖິ່ນ ເປັນຜູ້ຮັບຜິດຊອບບົວລະບັດຮັກສາປ່າປູກ (ພາຍຫຼັງສຳເລັດການປູກ) ລວມທັງສ້າງລະບຽບການຄຸ້ມຄອງ, ປົກປັກຮັກສາຮ່ວມກັບປະຊາຊົນ, ແຕ່ງຕັ້ງຄະນະກຳມະການຮັບຜິດຊອບ ຄຸ້ມຄອງ, ຊຸກຍູ້ ແລະ ຕິດຕາມການຈັດຕັ້ງປະຕິບັດໂຄງການ ຂັ້ນສູນກາງ ແລະ ຂັ້ນທ້ອງຖິ່ນ ເປັນແຕ່ລະໂຄງການ; ສຳລັບບັນດາໜ້າວຽກຈຸດສຸມທີ່ກຳນົດໃນວາລະແຫ່ງຊາດແມ່ນໄດ້ກຳນົດ 5 ວຽກງານຈຸດສຸມ ຄື: 1. ສ້າງອາຊີບ ແລະ ແຫຼ່ງລາຍຮັບທີ່ໝັ້ນຄົງ, 2. ພັດທະນາພື້ນຖານໂຄງລ່າງ ແລະ ສິ່ງອໍານວຍຄວາມສະດວກຢູ່ຊົນນະບົດ, 3. ສ້າງຄວາມເຂັ້ມແຂງໃຫ້ທ້ອງຖິ່ນ ແລະ ຊາວຊົນນະບົດ, 4. ຂົນຂວາຍລະດົມທຶນເຂົ້າໃນການພັດທະນາຊົນນະບົດ ແລະ 5. ປັບປຸງນິຕິກຳ ແລະ ກົນໄກການເຮັດວຽກໃຫ້ມີປະສິດທິຜົນ. ບັນດາໜ້າວຽກດັ່ງກ່າວເຫັນວ່າມີການເຊື່ອມໂຍງ ແລະ ສະໜັບສະໜູນເຊິ່ງກັນ ແລະ ກັນ ແລະ ຕ້ອງໄດ້ຈັດຕັ້ງປະຕິບັດຄຽງຄູ່ກັນ. ໃນການປະຕິບັດຕົວຈິງຕ້ອງໄດ້ອີງໃສ່ສະພາບຈຸດພິເສດ ແລະ ຄວາມຕ້ອງການຮີບດ່ວນຂອງແຕ່ລະທ້ອງຖິ່ນ ເປັນຕົ້ນ ເຂດຊົນນະບົດຫ່າງໄກສອກຫຼີກຕ້ອງໄດ້ສຸມໃສ່ວຽກງານພັດທະນາພື້ນຖານໂຄງລ່າງ ໄປພ້ອມກັບການພັດທະນາອາຊີບ; ເຂດຊົນນະບົດຢູ່ທົ່ງພຽງ ຫຼື ເຂດທີ່ມີການພັດທະນາພື້ນຖານໂຄງລ່າງຈໍານວນໜຶ່ງ ຕ້ອງໄດ້ພັດທະນາອາຊີບ ແລະ ແຫຼ່ງລາຍຮັບທີ່ໝັ້ນຄົງ ແລະ ອື່ນໆ ຕາມແຕ່ລະກໍລະນີ, ເພື່ອຮັບປະກັນໃຫ້ການຜັນຂະຫຍາຍວາລະແຫ່ງຊາດດັ່ງກ່າວ ດໍາເນີນໄປຢ່າງມີວິທະຍາສາດ, ມີຈຸດສຸມ, ພາວະວິໄສ ແລະ ແທດເໝາະກັບສະພາບຄວາມເປັນຈິງຂອງທ້ອງຖິ່ນ. (ຂ່າວ-ພາບ: ສຳນານ)
.