 |
ກອງປະຊຸມ ໄດ້ຮັບຟັງການລາຍງານ ການຈັດຕັ້ງປະຕິບັດວຽກງານຕາແສງ ໃນໄລຍະ 3 ເດືອນຜ່ານມາ ລວມເຖິງທີ່ຕັ້ງ, ພາລະບົດບາດ ການເຄື່ອນໄຫວຂອງຄະນະກຳມະການປົກຄອງຕາແສງ ຈາກຄະນະຈັດຕັ້ງແຂວງຄໍາມ່ວນ ຊຶ່ງການສ້າງຕັ້ງຕາແສງຈຳນວນ 44 ຕາແສງຂອງແຂວງຄໍາມ່ວນສຳເລັດ 100% ຕາມຄາດໝາຍ, ເປັນບາດກ້າວບຸກທະລຸອັນສຳຄັນໃນການຫັນເອົາການປົກຄອງ ແລະ ການພັດທະນາລົງສູ່ຮາກຖານຢ່າງເປັນຮູບປະທຳ. ພ້ອມທັງໄດ້ເປີດໂອກາດໃຫ້ຄະນະກຳມະການປົກຄອງຕາແສງ ໄດ້ມີຄໍາເຫັນແລກປ່ຽນ ເຖິງຂໍ້ສະດວກ, ຂໍ້ຫຍຸ້ງຍາກ ໃນການຈັດຕັ້ງປະຕິບັດໃນໄລຍະທີ່ຜ່າມານ.
ສະຫາຍເລຂາພັກແຂວງຄໍາມ່ວນ ໄດ້ມີຄໍາເຫັນໂອ້ລົມ ຊຶ່ງການສ້າງຕັ້ງຕາແສງ ບໍ່ແມ່ນການສ້າງຕັ້ງຂຶ້ນໃໝ່ ແຕ່ເປັນການປັບປຸງຄືນ ເພື່ອໃຫ້ສອດຄ່ອງກັບໄລຍະໃໝ່, ເປັນການຜັນຂະຫຍາຍແນວທາງ ຍຸດທະສາດ ໃນໄລຍະໃໝ່ຂອງພັກ ຈາກທິດສະດີ ໃຫ້ເຂົ້າສູ່ພຶດຕິກຳຕົວຈິງ, ແມ່ນຄວາມຮຽກຮ້ອງຕ້ອງການອັນຈໍາເປັນໃນການພັດທະນາເສດຖະກິດ-ສັງຄົມ ໃຫ້ມີຄວາມເຂັ້ມແຂງ ແລະ ຍືນຍົງ.
 |
ສະຫາຍເລຂາພັກແຂວງໄດ້ຮຽກຮ້ອງໃຫ້ຄະນະກຳມະການປົກຄອງຕາແສງ ສືບຕໍ່ເອົາໃຈໃສ່ປະຕິບັດໜ້າທີ່ວຽກງານຈຸດສຸມທີ່ສຳຄັນຄື: ໃຫ້ເອົາໃຈໃສ່ສຶກສາອົບຮົມປະຊາຊົນທຸກເຜົ່າໃຫ້ມີຄວາມສາມັກຄີປອງດອງ, ພ້ອມທັງຮັກສາ ແລະ ເສີມຂະຫຍາຍມູນເຊື້ອວັດທະນະທຳອັນດີງາມພາຍໃຕ້ລະບຽບກົດໝາຍ, ເອົາໃຈໃສ່ຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ເຮັດໃຫ້ທົ່ວຕາແສງ ມີຄວາມສະຫງົບໜັກແໜ້ນ, ຕ້ານທຸກກົນອຸບາຍທີ່ຫວັງມ້າງເພຄວາມສາມັກຄີ, ພ້ອມທັງກໍ່ສ້າງຕາແສງໃຫ້ເປັນເຂດທີ່ປອດໄພ ແລະ ໜ້າຢູ່, ສືບຕໍ່ປະສານສົມທົບກັບຂະແໜງການທີ່່ກ່ຽວຂ້ອງຂອງເມືອງ ເພື່ອປັບປຸງການຈັດຕັ້ງຕາແສງໃຫ້ພຽງພໍ ແລະ ມີຄວາມເຂັ້ມແຂງ, ເປັນເຈົ້າການນຳພາປະຊາຊົນແກ້ໄຂຄວາມທຸກຍາກ, ມີແຜນຊ່ວຍເຫຼືອບັນດາຄອບຄົວທຸກຍາກໃຫ້ກາຍເປັນຄອບຄົວພັດທະນາ ແລະ ຄອບຄົວຕົວແບບ ດ້ານການຜະລິດ, ການເຮັດອຸດສາຫະກຳປຸງແຕ່ງ ແລະ ສົ່ງເສີມອາຊີບທີ່ໝັ້ນຄົງ, ຈັດຕັ້ງປະຕິບັດໂຄງການຕົວຈິງທີ່ປະຊາຊົນສາມາດເຮັດໄດ້, ສົ່ງເສີມການຜະລິດ, ປູກໄມ້ໃຫ້ໝາກ, ໄມ້ອຸດສາຫະກຳ ໂດຍອີງໃສ່ເງື່ອນໄຂຕົວຈິງ ແລະ ສ້າງຕະຫຼາດຮອງຮັບສິນຄ້າໃນທ້ອງຖິ່ນ, ຊຸກຍູ້, ສົ່ງເສີມ ແລະ ຮັບປະກັນໃຫ້ລູກຫຼານໃນເກນອາຍຸໄດ້ເຂົ້າໂຮງຮຽນ ຢ່າງເປັນປົກກະຕິ, ໃຫ້ມີການກຳນົດລະບຽບການແບ່ງຂັ້ນຄຸ້ມຄອງລາຍຮັບ-ລາຍຈ່າຍ ຢູ່ຂັ້ນຕາແສງ ໃຫ້ຊັດເຈນ ແລະ ສອດຄ່ອງກັບຄວາມເປັນຈິງ, ສືບຕໍ່ຫັນມະຕິຕ່າງໆຂອງພັກລົງສູ່ບ້ານ ແລະ ຕາແສງ ໃຫ້ມີຜົນສຳເລັດເປັນຮູບປະທຳ.
ຂ່າວ: ກອງຄໍາ
ຄໍາເຫັນ