ເລຂາພັກແຂວງສາລະວັນ ເນັ້ນການໂຄສະນາ​ຕ້ອງ​ມີຫຼາຍຮູບ-ຫຼາຍສີ

ໃນໂອກາດນີ້, ສະຫາຍ ດາວວົງ ພອນແກ້ວ ໄດ້ຮັບຟັງການລາຍງານໂດຍສັງເຂບ ກ່ຽວກັບຜົນການຈັດຕັ້ງປະຕິບັດວຽກງານໂຄສະ ນາອົບຮົມ ໃນໄລຍະຜ່ານມາ, ທັງດ້ານດີ ແລະ ຂໍ້ຫຍຸ້ງຍາກ, ດ້ານຕ່າງໆກ່ອນ ແລະ ຫຼັງການໂອນວຽກງານສື່ມວນຊົນ ມາຂື້ນກັບຄະນະໂຄສະນາອົບຮົມແຂວງ.

ສະຫາຍ ເລຂາພັກແຂວງ ໄດ້ໃຫ້ກຽດໂອ້ລົມ ແລະ ເນັ້ນຫຼາຍບັນຫາໂດຍສະເພາະ ເພື່ອນໍາເອົາແນວທາງ ນະໂຍບາຍຂອງພັກ ແລະ ລັດ ໃຫ້ປະຊາຊົນຮັບຮູ້-ເຂົ້າໃຈເລິກເຊິ່ງ ແລະ ກວ້າງຂວາງ, ຮອດຮາກຖານບ້ານ, ພວກເຮົາຕ້ອງມີການໂຄສະນາບັນດາແນວທາງຂອງພັກ, ລັດ, ມະຕິ ຄຳສັ່ງຕ່າງໆ ທີ່ວາງອອກ ໃນແຕ່ລະໄລະຍະ, ຕ້ອງມີວິທີການ, ຮູບການໂຄສະນາດ້ວຍຫຼາຍຮູບ, ຫຼາຍສີ, ນອກຈາກໂຄສະນາຜ່ານສື່ວິທະຍຸກະຈາຍສຽງ, ໂທລະພາບ, ສື່ໜັງສືພິມ ແລະ ສື່ອ່ອນລາຍຕ່າງໆແລ້ວ ຕ້ອງໂຄ ສະນາຜ່ານທາງລະບົບໂທລະໂຄ່ງບ້ານນຳອີກ, ໂດຍນໍາເອົາເນື້ອໃນບົດປາໃສ ຂອງການນໍາຂັ້ນສູງ, ຄລິບວິດີໂອ, ບົດເພງປະຕິວັດ ແລະ ອື່ນໆ... ອອກຜ່ານໂທລະໂຄ່ງໃນແຕ່ລະວັນ.

ນອກນັ້ນ ໃຫ້ເພີ່ມທະວີຄວາມຮັບຜິດຊອບສູງ ໃນການຕິດຕາມ, ເກັບກຳຫາງສຽງສັງຄົມ ກໍຄືການໃສ່ຮ້າຍປ້າຍສີ, ຖ້ອຍທໍານອງບິດເບືອນ ຕໍ່ການນໍາພາຂອງພັກ ແລະ ການຄຸ້ມຄອງລັດ ໂດຍສະເພາະແມ່ນຮູບການ, ວິທີການຕອບໂຕ້ ແມ່ນໃຫ້ແຫຼມຄົມ, ວ່ອງໄວ ແລະ ທັນການ, ພ້ອມນັ້ນຕ້ອງ ຫັນວຽກງານສື່ມວນຊົນໄປສູ່ຄຸນນະພາບໃໝ່ຢ່າງແຂງແຮງ, ດ້ວຍການນໍາໃຊ້ປັນຍາປະດິດ (AI ), ເຂົ້າໃນວຽກງານສື່ມວນຊົນໂດຍສະເພາະໃນການຜະລິດຂ່າວ, ຜະລິດບົດ ແລະ ການໂຄສະນາຕ່າງໆ ເຂົ້າຊ່ວຍ ເພື່ອໃຫ້ມີຄວາມວ່ອງໄວ, ຄົບຖ້ວນ, ທັນເຫດການ ແລະ ອື່ນໆ.

ສະຫາຍ ດາວວົງພອນແກ້ວ ຍັງໄດ້ເນັ້ນຕື່ມອີກວ່າ: ສິ່ງສຳຄັນ ຄະນະພັກ, ຄະນະນໍາ ຕ້ອງເອົາໃຈໃສ່ໃນການສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານຫຼັກແຫຼ່ງພາຍໃນຄະນະໂຄສະນາອົບຮົມແຂວງ ໃຫ້ມີຄວາມສາມັກຄີ, ຊ່ວຍເຫຼືອເຊິ່ງກັນ ແລະ ກັນ, ມີການສະຫຼຸບ-ຖອດ ຖອນບົດຮຽນ ເພື່ອເຮັດວຽກງານໂຄສະນາອົບຮົມຂອງພັກ ໃຫ້ເຂັ້ມແຂງ ແລະ ປະກອບສ່ວນເຂົ້າໃນການພັດທະນາແຂວງສາລະວັນ ໃຫ້ກ້າວຂຶ້ນຢ່າງບໍ່ຢຸດຢັ້ງ.

ຂ່າວ: ຄໍາສອນ ແກ້ວບຸນທະວົງ