 |
ທ່ານ ບຸນເລື່່ອມ ມະນີວົງ ໄດ້ລາຍງານສະພາບການພັດທະນາແຂວງໃນໄລຍະຜ່ານມາ ພາຍໃຕ້ການນໍາພາ-ຊີ້ນໍາວຽກງານຮອບດ້ານ ຂອງຄະນະບໍລິຫານງານພັກແຂວງ ໃນໄລຍະ 06 ເດືອນຜ່ານມາ ເຫັນວ່າມີຜົນສໍາເລັດຫຼາຍດ້ານ, ບາງດ້ານສາມາດບັນລຸຄາດໝາຍ ແລະ ລື່ນຄາດໝາຍທີີ່ວາງໄວ້, ອັນພົ້ນເດັ່ນ ໄດ້ກໍານົດແບບແຜນວິທີເຮັດວຽກ ຂອງປະທານ-ຮອງປະທານຄະນະກໍາມະການປົກຄອງແຂວງ ແລະ ແບ່ງຄວາມຮັບຜິດຊອບ ໃຫ້ມີຄວາມສອດຄ່ອງ, ສ້າງແຜນກໍານົດພະນັກງານນໍາພາ ຄຸ້ມຄອງ (ຂັ້ນແຂວງຄຸ້ມຄອງ) ຢູ່ເມືອງໂພນທອງ, ເມືອງວຽງຄໍາ ແລະ ເມືອງງອຍ ແລະພະແນກການ-ອົງການ ຈໍານວນໜຶ່ງ; ປັບປຸງກົງຈັກຢູ່ບັນດາພະແນກການຈໍານວນໜຶ່ງ, ປະກາດການສ້າງຕັັ້ງຕາແສງໄດ້ 08 ຕາແສງ ຄື: ຕາແສງຊຽງທອງ ນະຄອນ ຫຼວງພະບາງ, ຕາແສງປາກອູ, ຕາແສງປາກແຈກ, ຕາແສງຫາດປາງ ເມືອງປາກອູ; ຕາແສງພູຄູນ, ຕາແສງຜາເກັ່ງ, ຕາແສງພູວຽງ ແລະ ຕາແສງທ່າບໍ່ແກ້ວ ເມືອງພູຄູນ, ໃນນັ້ນ ຕາແສງຊຽງທອງ ນະຄອນ ຫຼວງພະບາງ ທີີ່ເຄື່ອນໄຫວຈັດຕັ້ງປະຕິບັດວຽກງານ ຕາມພາລະບົດບາດ, ສິດ, ໜ້າທີ່ ເປັນປົກກະຕິ ແລະ ຄາດວ່າ ຈະປະກາດສ້າງຕັ້ງຕາງແສງໃນທົ່ວແຂວງ ໃຫ້ສໍາເລັດໃນເດືອນຕຸລາ ປີ 2026 ນີ້; ພ້ອມນີ້ ທ່ານໄດ້ສະເໜີໃຫ້ເລຂາທິການໃຫຍ່ ຊ່ວຍຊຸກຍູ້ ໂຄງການສ້າງຂົວຂ້າມນໍ້າຂອງ ລະຫວ່າງ ນະຄອນ ຫຼວງພະບາງ ຫາ ເມືອງຈອມເພັດ ໃຫ້ໄດ້ຮັບການຈັດຕັ້ງປະຕິບັດ ຕາມແຜນການໄດ້ກໍານົດໄວ້, ຊ່ວຍຊຸກຍູ້ ໂຄງການກໍ່ສ້າງເສັ້ນທາງແຕ່ ພູທິດເຜີ້ງ ເຊື່ອມຈອດຊາຍແດນ ແຂວງ ດຽນບຽນ ສສ ຫວຽດນາມ ຄວາມຍາວ 107 ກິໂລແມັດ ແລະ ການກໍ່ສ້າງຍົກລະດັບ ດ່ານຊາຍແດນປະເພນີນາຊອນ-ຫ້ວຍປວກ ຈາກດ່ານປະເພນີຂຶ້ນເປັນດ່ານສາກົນ ເພື່ອອຳນວຍຄວາມສະດວກໃຫ້ແກ່ການສັນຈອນ ແລະ ການຂົນສົ່ງສີນຄ້າ.
 |
ທ່ານ ທອງລຸນ ສີສຸລິດ ໄດ້ສະແດງຍ້ອງຍໍຊົມເຊີຍຕໍ່ຜົນງານທີ່ແຂວງຫຼວງພະບາງ ຍາດມາໄດ້, ພ້ແມທັງ ເນັ້ນໃຫ້ການນຳຂອງແຂວງ ສືບຕໍ່ເອົາໃຈໃສ່ວຽກງານສຶກສາອົບຮົມ ການເມືອງ-ແນວຄິດ ໃຫ້ພະນັກງານ, ສະມາຊິກພັກ ແລະ ປະຊາຊົນ; ເສີມຂະຫຍາຍມູນເຊື້ອ ຄວາມສາມັກຄີເປັນເອກະພາບພາຍໃນພັກ, ເປັນຫຼັກແຫຼ່ງເຕົ້າໂຮມຄວາມສາມັກຄີໃນທົ່ວປວງຊົນ, ຍົກສູງຄວາມເປັນແບບຢ່າງນໍາໜ້າ ຂອງຄະນະພັກແຕ່ລະຂັ້ນ; ເສີມຂະຫຍາຍທ່າແຮງບົ່ມຊ້ອນໃນການພັດທະນາ ໂດຍສຸມໃສ່ຈັດຕັ້ງປະຕິບັດບັນດາຄາດໝາຍ, ແຜນພັດທະນາເສດຖະກິດ-ສັງຄົມ ໃຫ້ບັນລຸຕາມແຜນທີ່ວາງໄວ້, ຖືສຳຄັນ ການປົກປັກຮັກສາ ວັດທະນະທຳ, ຮີດຄອງປະເພນີອັນດີງາມຂອງຊາດ ກໍຄືຂອງທ້ອງຖີ່ນຫຼວງພະບາງ ໃຫ້ມີຄວາມຍືນຍົງ, ຮັກສາໄດ້ຄວາມເປັນມໍລະດົກໂລກຫຼວງພະບາງ, ບໍ່ໃຫ້ມີການສວຍໃຊ້ບັນດາອາຄານສະຖານທີ່ເກົ່າແກ່ ໃຫ້ເປັນການພັດທະນາໃໝ່ ທີ່ບໍ່ກົມກືນກັບຄວາມເປັນມໍລະດົກໂລກຫຼວງພະບາງ, ສຸມໃສ່ການບຸກທະລຸ ດ້ານການແກ້ໄຂຄວາມທຸກຍາກຂອງປະຊາຊົນ ຮັບປະກັນໃຫ້ປະຊາຊົນມີຊີວິດການເປັນຢູ່ທີ່ດີຂຶ້ນ ດ້ວຍການນຳໃຊ້ທ່າແຮງຂອງທ້ອງຖີ່ນ ຕາມທິດພັດທະນາສີຂຽວ ແລະ ຍືນຍົງ.
 |
ພາບ-ຂ່າວ: ອາພຸດເດດ ບຸບຜາ
ຄໍາເຫັນ