 |
ບົດບັນທຶກຄວາມເຂົ້າໃຈສະບັບນີ້ ໄດ້ສະແດງໃຫ້ເຫັນເຖິງຄວາມມຸ່ງໝັ້ນຮ່ວມກັນຂອງທັງສອງລັດຖະບານ ໃນການລົງເລິກການຮ່ວມມືດ້ານບໍລິການທາງດ້ານການເງິນ ພ້ອມທັງສົ່ງເສີມການພັດທະນາຕະຫຼາດຄຳທີ່ມີປະສິດທິພາບ, ມີຄວາມໂປ່ງໃສ ແລະ ສາມາດເຊື່ອມໂຍງກັບສາກົນ. ນອກຈາກນີ້ ຍັງໄດ້ກຳນົດຂອບການຮ່ວມມືໃນຫຼາຍຂົງເຂດ ເປັນຕົ້ນແມ່ນ ການອໍານວຍຄວາມສະດວກທາງດ້ານຕະຫຼາດຄໍາ, ການເຊື່ອມໂຍງຕະຫຼາດການເງິນ, ການພັດທະນາບຸກຄະລາກອນ ເເລະ ການຫັນເປັນທັນສະໄໝ, ຄວາມຮ່ວມມືດ້ານລະບຽບການ ແລະ ການພັດທະນາຕ້ອງໂສ້ຕະຫຼາດຄໍາ.
ການລົງນາມໃນບົດບັນທຶກຄວາມເຂົ້າໃຈຄັ້ງນີ້ ຖືເປັນບາດກ້າວອັນສໍາຄັນໃນການສະໜັບສະໜູນວິໄສທັດຂອງລັດຖະບານລາວ ເພື່ອພັດທະນາລະບົບນິເວດຕະຫຼາດຄໍາ ຊຶ່ງຈະປະກອບສ່ວນເຂົ້າໃນການເຕີບໂຕທາງເສດຖະກິດແບບຍືນຍົງ, ສ້າງຄວາມເຂັ້ມແຂງໃຫ້ແກ່ໂຄງລ່າງພື້ນຖານຕະຫຼາດການເງິນ ແລະ ເພີ່ມທະວີການເຊື່ອມໂຍງຂອງປະເທດເຂົ້າກັບຕະຫຼາດພາກພື້ນ ແລະ ສາກົນ. ພາຍໃຕ້ຍຸດທະສາດນີ້, ກະຊວງການເງິນ ແຫ່ງ ສປປ ລາວ ໄດ້ໃຫ້ການສະໜັບສະໜູນ ທະນາຄານຄຳລາວ ເປັນທະນາຄານຍຸດທະສາດ ເພື່ອຊຸກຍູ້ການຫັນຕະຫຼາດຄຳພາຍໃນປະເທດໃຫ້ມີຄວາມທັນສະໄໝ ແລະ ສ້າງຄວາມເຂັ້ມແຂງໃຫ້ແກ່ໂຄງລ່າງພື້ນຖານທາງດ້ານການເງິນຂອງໂລຫະປະເສີດພາຍໃນປະເທດ.
 |
ທະນາຄານຄຳລາວ ໄດ້ມີບົດບາດສຳຄັນໃນການສະໜັບສະໜູນຈຸດປະສົງດ້ານນະໂຍບາຍຂອງກະຊວງການເງິນ ໂດຍການສົ່ງເສີມການບໍລິການທະນາຄານຄຳທີ່ມີຄວາມໂປ່ງໃສ, ຊຸກຍູ້ການລະດົມແຫຼ່ງທຶນຄຳພາຍໃນປະເທດເຂົ້າສູ່ລະບົບການເງິນ ແລະ ສົ່ງເສີມຄວາມຮ່ວມມືສາກົນກັບບັນດາສະຖາບັນການເງິນຊັ້ນນໍາ ແລະ ຜູ້ມີສ່ວນຮ່ວມໃນອຸດສາຫະກຳວັດຖຸມີຄ່າ. ບົດບັນທຶກຄວາມເຂົ້າໃຈສະບັບນີ້ ຍັງໄດ້ຊ່ວຍຮັດແໜ້ນຄວາມພະຍາຍາມດັ່ງກ່າວ ໂດຍການສ້າງຂອບການຮ່ວມມືແບບ ລັດຖະບານ ຫາ ລັດ
ຖະບານ (G2G) ເພື່ອສະໜັບສະໜູນການແລກປ່ຽນບົດຮຽນ, ຄວາມຮ່ວມມືລະຫວ່າງສະຖາບັນ ແລະ ການພັດທະນາການຮ່ວມມືກັບສາກົນ ພ້ອມທັງຍົກລະດັບການເຊື່ອມໂຍງລະຫວ່າງ ສປປ ລາວ ແລະ ເຂດປົກຄອງພິດເສດຮົງກົງ, ສປ ຈີນ ຊຶ່ງເປັນໜຶ່ງໃນສູນກາງການເງິນສາກົນ ແລະ ເປັນສູນກາງການຄ້າວັດຖຸມີຄ່າຊັ້ນນໍາຂອງໂລກ.ຂ່າວ: ຍຸພິນທອງ
ຄໍາເຫັນ