ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ສຳນັກງານສະຖິຕິແຫ່ງຊາດຂອງ ສ ເກົາຫຼີ ໄດ້ເປີດເຜີຍບົດລາຍງານໂດຍລະບຸວ່າ: ພະຍາດມະເຮັງຍັງຄົງເປັນສາເຫດການເສຍຊີວິດອັນດັບທຳອິດຂອງປະເທດໃນປີ 2022.
ບົດລາຍງານລະບຸວ່າ: ຈຳນວນຜູ້ເສຍຊີວິດດ້ວຍພະຍາດມະເຮັງຄິດເປັນ 162,7 ຄົນຕໍ່ປະຊາກອນ 100.000 ຄົນ ໃນປີ 2022 ເພີ່ມຂຶ້ນຈາກ 161,1 ຄົນໃນປີ 2021 ເຮັດໃຫ້ຍັງຄົງເປັນສາເຫດການເສຍຊີວິດອັນດັບ 1 ນັບຕັ້ງແຕ່ເລີ່ມຕົ້ນມີການຮວບຮວມຂໍ້ມູນທີ່ກ່ຽວຂ້ອງໃນປີ 1983. ບົດລາຍງານຍັງລະບຸຕື່ມວ່າ: ອັດຕາການເສຍຊີວິດຈາກມະເຮັງປອດຢູ່ທີ່ 36,3 ຄົນ ຕໍ່ປະຊາກອນ 100.000 ຄົນ ຊຶ່ງສູງທີ່ສຸດໃນບັນດາຜູ້ເສຍຊີວິດຈາກພະຍາດມະເຮັງ ຮອງລົງມາແມ່ນມະເຮັງຕັບ 19,9 ຄົນ, ມະເຮັງລຳໄສ້ 17,9 ຄົນ, ມະເຮັງຕັບອ່ອນ 14,3 ຄົນ ແລະ ມະເຮັງກະເພາະອາຫານ 13,9 ຄົນ. ສ່ວນສາເຫດການເສຍຊີວິດອັນດັບທີ 2 ໃນປີ 2022 ໄດ້ແກ່ ພະຍາດຫົວໃຈ ຊຶ່ງມີອັດຕາການເສຍຊີວິດຢູ່ທີ່ 65,8 ຄົນຕໍ່ປະຊາກອນ 100.000 ຄົນ, ສ່ວນອັນດັບທີ 3 ຄື ການຕິດເຊື້ອການແຜ່ລະບາດຂອງພະຍາດໂຄວິດ-19 ຊຶ່ງມີອັດຕາການເສຍຊີວິດ 61 ຄົນ ຕໍ່ປະຊາກອນ 100.000 ຄົນ ເພີ່ມຂຶ້ນຈາກສາເຫດການເສຍຊີວິດສູງທີ່ສຸດອັນດັບທີ 12 ໃນປີ 2021. ສ່ວນສາເຫດການເສຍຊີວິດ 10 ອັນດັບທຳອິດ ປະກອບດ້ວຍພະຍາດປອດອັກເສບ ຊຶ່ງມີການເສຍຊີວິດ 52,1 ຄົນຕໍ່ປະຊາກອນ 100.000 ຄົນ, ພະຍາດຫຼອດເລືອດໃນສະ ໝອງ ເສຍຊີວິດ 49,6 ຄົນຕໍ່ປະຊາກອນ 100.000 ຄົນ, ພະຍາດອັນໄຊເມີ 22,7 ຄົນ, ພະຍາດເບົາຫວານ 21,8 ຄົນ, ພະຍາດຄວາມດັນໂລຫິດສູງ 15,1 ຄົນ ແລະ ພະຍາດຕັບ 14,7 ຄົນ.
ຄໍາເຫັນ